گرفت پيكهاوردن حكوومه‌ت و ديد جياواز ليسته‌يل عراقی

شفق نيوز

سياسی و هه‌مان وه‌خت هيز و قه‌واره‌يل سياسی له‌بان خاڵه‌يل سه‌ره‌كی هاوبه‌شی و هاوپه‌يمانيه‌تی و پيكهاوردن حكوومه‌ت ريك نه‌كه‌فتنه‌ ، له‌ی روييشه‌وه‌ ئه‌وه‌ك بويه‌سه‌ بنه‌مای گشت كيشه‌يل ، ئه‌ويش پۆست سه‌رۆك حكوومه‌ته‌ ك تائيسه‌ هووكار كيشمه‌كيش تون ناونی ليست ئه‌لعراقيه‌و ده‌وڵه‌ت قانوون و ئئتلاف نيشتمانی .

ديدار و دانيشتنه‌يل ناونی ده‌وڵه‌ت قانوون وه‌ سه‌رۆكايه‌تی نوری مالكی و ئئتلاف نيشتمانی وه‌ سه‌رۆكايه‌تی حه‌كيم ئه‌را دروسكردن گه‌وراترين قه‌واره‌ی ناو په‌رله‌مان تازه‌ تائيسه‌ هويچ ئه‌نجاميگ نه‌ياشتگه‌و نه‌ڕه‌سيه‌سه‌ چاره‌سه‌ر ، دوباره‌ له‌يرايش پۆست سه‌رۆك حكوومه‌ت فاكته‌ر شكه‌ست دانيشتنه‌يل ناونی ئه‌و دو قه‌واره‌ی شيعه‌ مه‌زه‌وه‌ بويه‌ ، ئه‌ويش وه‌گووره‌ی ئه‌وه‌ك خه‌ت سه‌در و قه‌يريگ كه‌سايه‌تی سياسی تر ناو ئئتلاف نيشتمانی سه‌رۆكايه‌تی مالكی ئه‌را حكوومه‌ت ئاينده‌ ره‌ته‌و كه‌ن . ليست ئه‌لعراقيه‌يش وه‌ سه‌رۆكايه‌تی ئه‌ياد عه‌لاوی ك پله‌ی يه‌كم وه‌ده‌س هاورد له‌ناونی هه‌ر چوار ليسته‌ سه‌ركه‌فتگه‌گه‌ وه‌ هه‌ق ده‌ستووری خوه‌ی زانيگه‌ی ك پيكهاوردن حكوومه‌ت ئاينده‌ وه‌پی بسپاريه‌يگ و هه‌ر وه‌ی بڕياريشه‌وه‌ په‌يامه‌يل خوه‌ی ده‌يگه‌ وه‌رانوه‌ره‌يلی يا چووگه‌ ناو دانيشتن و گفتوگووه‌يله‌وه‌ ، وه‌تايبه‌ت له‌ وه‌رانوه‌ر ليسته‌گه‌ی نوری مالكی ك ناوبرياگ هيمان ئاماده‌ نيه‌ ده‌سوه‌ردار ده‌سڵات بووگ و حكوومه‌ته‌گه‌ به‌يگه‌ ده‌س ئه‌ياد عه‌لاوی و هويچ لايه‌نيگ تر ، وه‌ی شيوه‌يشه‌ وه‌زعه‌ سياسيه‌گه‌ له‌وه‌رده‌م سێ پاداگر قه‌واره‌و سه‌ركرده‌يليان گرفتيگ ئه‌رای دروس كرياگه‌و چاره‌سه‌ری خه‌ريكه‌ بووگه‌ مه‌حاڵ . پاداگرتن ئه‌ياد عه‌لاوی له‌بان پۆست سه‌رۆكايه‌تی حكوومه‌ت وه‌گووره‌ی ئه‌وه‌ك هه‌قيگ ده‌ستووريه‌و ليسته‌گه‌ی پله‌ی يه‌كمه‌و بايه‌سه‌ پيكهاوردن كابينه‌ی تازه‌ی حكوومه‌ت وه‌پی بدريه‌يگ و له‌وه‌رانوه‌ر ئه‌وه‌يش پاداگرتن نوری مالكی له‌بان وه‌رگرتنه‌وه‌ی پۆسته‌گه‌و هه‌وڵه‌يلی ئه‌را پيكهاوردن هاوپه‌يمانيه‌تيگ گه‌ورا ك گه‌وراترين قه‌واره‌ی په‌رله‌مانی له‌لی بكه‌فيگه‌وه‌ ئه‌را ئه‌وه‌ك ليست ئه‌لعراقيه‌ ئه‌و قه‌واره‌ی گه‌ورا نه‌كه‌فيگه‌ ده‌سی له‌ناو په‌رله‌مان . وه‌لی له‌وه‌رانوه‌ر ئه‌و هه‌وڵ و ئامانج مالكيه‌ سه‌دريه‌يل ناو ئئتلاف نيشتمانييش ك مالكی توايگ وه‌ك پشتگير بوونه‌ هاوپه‌يمان ليسته‌گه‌ی پا له‌بان ئه‌وه‌ داگرن ك مالكی ئه‌را ده‌وره‌يگ تازه‌ پۆست سه‌رۆكايه‌تی حكوومه‌ت وه‌پی نه‌دريه‌يگ و كه‌سايه‌تييگ تر دياری بكريه‌يگ . ئمجا هه‌رچه‌نی له‌ی ناونييشه‌ پاداگرتن چواره‌ميش هه‌س ك په‌يوه‌سه‌ وه‌ ئسپاتكردنه‌وه‌ی وه‌رده‌وام لايه‌ن كوردستانی له‌بان وجوود ديدگايگ خاس و ئاشكرايگ ئه‌و لايه‌نه‌ ك حكوومه‌ت پيك تيه‌ريگ وه‌رانوه‌ر وه‌كيشه‌و مه‌سه‌له‌يل چاره‌سه‌رنه‌كرياگ ناونی هه‌رێم كوردستان و به‌غدا وه‌تايبه‌ت مه‌سه‌له‌ی ناوچه‌يل داوڕياگ و ماده‌ی ١٤٠ك وجوود ئی ديدگايشه‌ لايه‌ن كوردی ره‌سنيگه‌ شه‌راكه‌ت ئه‌و لايه‌نه‌ ك حكوومه‌ت ئاينده‌ وه‌پی سپاريه‌يگ ، وه‌لی له‌يرا زياتر مه‌به‌سمان له‌بان پاداگرتن لايه‌نه‌يل عراقيه‌ ك بنه‌ماو هووكار نه‌ڕه‌سينه‌ وه‌هه‌ر ريككه‌فتن و چاره‌سه‌ريگ سياسی كيشه‌گه‌و كورديش هويچ وه‌ختيگ به‌شيگ نيه‌ له‌دروسكردن هه‌ر گرفتيگ . ئمجا ئه‌و سێ لايه‌نه‌ ك ئشاره‌ت وه‌پيان كرديم تا ئيسه‌ ريگر بوينه‌ له‌وه‌رده‌م وه‌ئه‌نجام ره‌سانن دانيشتن و گفتوگووه‌يل و هويچ لايه‌نيگ له‌ليان ئاماده‌ی ئه‌وه‌ نه‌وينه‌ نه‌رمی نيشان بيه‌ن و وه‌چاره‌سيگ رازی بوون .