ژیان له‌ناونى خه‌یاڵ و ڕاسى

شفق نيوز

پیره‌ژنیگ وه‌ ماشته‌یگ جریوه‌وه‌ تیه‌یگه‌و ئه‌را ماڵ، نه‌ له‌مه‌به‌س مناڵه‌گه‌ فامیم و نه‌یش له‌ ماشته‌ى پیره‌ژنه‌گه‌).

ژیان وه‌ك كه‌شتى یا سه‌فینه‌یگه‌، نیه‌زانیم كه‌ى و له‌كوورا له‌نگه‌ر گریگ ، وه‌لى گرنگ ئه‌وه‌سه‌ ئه‌و وه‌خته‌یله‌ ك هایمه‌ ناو كه‌شتیه‌گه‌ خه‌ریك چه‌یم. به‌عزه‌جاریگ ئاده‌میزاد له‌ژیان ئاسایى خوه‌ى باوه‌ڕى له‌یواسه‌ ها له‌ناو بازنه‌ یا دایره‌ى به‌سیاگیگ و بایه‌سه‌ تا مردن له‌ناو بازنه‌ وه‌ بیده‌نگى بمینیگه‌وه‌، وه‌لى كه‌سه‌یلیگیش وه‌پیان له‌یواسه‌ ك ژیان هه‌وه‌جه‌ وه‌هه‌وڵ و ته‌قلاو ره‌سین وه‌ ئامانجه‌یل دیریگ ئه‌را ئه‌وه‌ك نه‌وگه‌ كه‌سیگ سه‌رنه‌كه‌فتگ ، هه‌ر له‌وه‌ر ئه‌وه‌یش ئه‌را ته‌نیا جاریگیش بووگ هه‌وڵ ده‌یگ  سه‌ركه‌فتگ بووگ له‌ژیانى. ماناى ئه‌وه‌سه‌ به‌عزه‌جاریگ ئاره‌زوومه‌ندیم بویمنه‌ ئه‌كته‌ریگ ك ده‌ور سه‌ره‌كى دوینیگ له‌ شانۆ یا مه‌سره‌ح ژیان. وه‌لى ئه‌و وه‌خته‌ ك دڵنیا بویم یا بى ئومید بویم له‌ وه‌ده‌سهاوردن ئومید و ئامانجه‌یلمان، یا خواسته‌یلمان و به‌رنامه‌یل ڕه‌نگاو ڕه‌نگمان، دى له‌و وه‌خته‌ ئه‌و چشته‌ ك له‌ژیان راسى وه‌پى نیه‌ڕه‌سیم، هه‌وڵ ده‌یم له‌ خه‌یاڵ باریمنه‌ى ده‌س.

له‌یرا خه‌یاڵ بووگه‌ به‌ش گه‌ورایگ له‌ ژیانمان، ك وه‌جووریگ داگیرمان ئه‌كا ئاره‌زوو ناكه‌یم كه‌س له‌و خه‌یاڵه‌ باریگه‌مانا خه‌وه‌را، له‌یوا هس كه‌یم ژیانكردن له‌ خه‌یاڵ پڕه‌ له‌ ئاسووده‌یى، چوینكه‌ وه‌ده‌س خوه‌مان ئه‌كته‌ره‌یل ئاڵشت كه‌یم و خوه‌مان كه‌یمنه‌ پاڵه‌وان داستانه‌یل، ئنجا له‌ژیان ئاسایى خوه‌مان ئه‌گه‌ر هات و له‌هه‌ر چشتیگ كه‌م داشتیم دى ئه‌و چشته‌یله‌ بوونه‌ ته‌وه‌ر یا محوه‌ر خه‌یاڵه‌یلمان.

دیل كارنگى، مامۆستاى گه‌وره‌ى هونه‌ر مامڵه‌كردن و گفتوگوو باس ئه‌كاو ئویشیگ: رووژیگ سه‌ردان نه‌خوه‌شخانه‌یگ ده‌روینى كردم، پرسیار له‌ دكتۆریگ كردم له‌بان نه‌خوه‌شیگ ده‌روینى ك له‌وه‌زع فره‌ ناخوه‌شیگ بوى، وتمه‌پى ئى نه‌خوه‌شه‌ تاچه‌نیگ ئومید خاسه‌وبوین دیریگ ؟ ئایا بار ده‌روینى ئى نه‌خوه‌شه‌ له‌ چ ئاستیگه‌؟ دكتۆره‌گه‌ له‌ جواوى وت: من حه‌ز ناكه‌م ئى نه‌خوه‌شه‌ خاسه‌و بووگ، له‌وه‌ر ئه‌وه‌ك ئى نه‌خوه‌شه‌ ك ژنیگه‌ له‌ژیان خوه‌ى نه‌زووكه‌و مناڵ ئه‌ڕاى نیه‌وگ و گشت خه‌میگیشى ئه‌وه‌سه‌ بووگه‌ دایگ ، وه‌لى وه‌داخه‌وه‌ نیه‌وگ و هه‌ر شه‌وه‌كیانیگ سه‌ردانى كه‌م و له‌لى پرسم ئمڕوو چوینید؟ خاسترید؟ ئه‌ویش جواوم ده‌یگه‌وه‌و ئویشیگ : دكتۆر ئمشه‌و مناڵیگ ئه‌رام بوى فره‌ جوان بوى، هه‌ر له‌وه‌ر ئه‌وه‌یش هس كه‌م ئه‌وه‌ك له‌ژیان راسى وه‌پى نه‌ڕه‌سى ئیسه‌ گشت شه‌ویگ تیه‌ریگه‌ ده‌س.

ئنجا دوینیم فره‌جار ئاده‌میزاده‌یل له‌ى لایه‌نه‌وه‌ فره‌ ئاسووده‌ن و فره‌یش خوه‌شحاڵن وه‌ ژیانكردنیان له‌ خه‌یاڵ، وه‌لى ئه‌گه‌ر هات و ئه‌را گشت كاریگ بى ئه‌نجام په‌نا بردیمنه‌ وه‌ر دونیاى خه‌یاڵى و هویچ هه‌وڵ راسه‌قینه‌یگ نه‌یایم و بى ئومیدى هه‌ڵوژانیم، ئه‌وه‌ بیگومان بووگه‌ هووكاریگ ئه‌را داوڕیانمان له‌ ده‌وروه‌ر و دویاكه‌فتنمان له‌ كاروان ژیان و كه‌شتى ژیانمان وه‌ وسیاگى مینیگه‌وه‌و چه‌وه‌ڕى به‌زه‌یى مه‌وجیگ ئه‌كا یا شنه‌وایگ به‌یگ له‌ماشته‌ى كه‌شتیه‌گه‌و كه‌میگ له‌شوون خوه‌مان ته‌كان ووه‌پیمان به‌یگ . هه‌ر له‌وه‌ر ئه‌وه‌یش شایه‌ت گشت جاریگ ئه‌و مه‌وجه‌یله‌ نه‌رم و ئارام نه‌ون و شایه‌ت سه‌یل و لافاویگ باریگه‌مانا خه‌وه‌را.

ماناى ئه‌وه‌سه‌ با نه‌ف له‌ خه‌یاڵه‌یلمان وه‌ربگریم و خه‌یاڵه‌یل جوانمان بكه‌یمنه‌ كردار تا به‌رهه‌م خه‌یاڵ خوه‌مان بكه‌فیگه‌ ده‌سمان. ئنجا ئه‌نشتاین قسه‌ى جوانیگ دیریگ و ئویشیگ (خه‌یاڵ له‌زانست گرنگتره‌)، ماناى ئه‌وه‌سه‌ گشت داناینیگ سه‌ره‌تا له‌ خه‌یاڵیگه‌وه‌ سه‌رچه‌وه‌ گریگ ، له‌وه‌ر ئه‌وه‌ با ئیمه‌یش داهینه‌ر یا موبدع بویمن و خه‌یاڵه‌یلمان ئبداعانه‌ بووگ.