مه‌سيحيه‌يل له‌ناونى داعش موسڵ و به‌غدا

ماجد زه‌يدان

شه‌فه‌ق نيوز/ جه‌شنه‌يل له‌داڵگبوين و سه‌رساڵ له‌بان مه‌سيحيه‌يل وه‌ سه‌ڵامه‌ت نه‌گوزه‌ريه‌، له‌وانه‌يش له‌بان كووچبه‌ره‌يليان، ك بڕيگ له‌ ياساده‌رچگ له‌ ناوچه‌ى ئه‌لغه‌دير له‌ به‌غداد ئه‌لجديده‌ سێ كه‌س له‌ليان كوشتن و يه‌كيگيش زه‌خمدار كرن له‌وه‌ختيگ ك ته‌قه‌ له‌ليان كردن له‌ناو دوكانه‌يل خوه‌يان وه‌بى نواگيرى ئايينى و ئه‌خلاقى.

 

ئه‌و مه‌سيحيه‌يله‌ ك ئاهه‌نگسازى كردن له‌ به‌غداو به‌رته‌ڵه‌و هه‌رێم كوردستان، په‌كه‌ر و ترسياگ بوين له‌وه‌گ رووژگار چه‌ ئه‌رايان هه‌ڵگرتگه‌و كاميان ئه‌كه‌فێده‌ وه‌ر فيشه‌ك داعشيه‌يل، جى داخ و ژانه‌ ئه‌وانه‌گ كوشيان له‌ كووچبه‌ره‌يل موسڵن و له‌تاو داعشيه‌يل واين و كه‌فتنه‌ وه‌ر گوله‌ى داعشيه‌يل به‌غدا، ك له‌يوا دياره‌ هويچ په‌نايگ تر نه‌ياشتنه‌.

 

ئه‌و قسه‌يله‌ ك وتريان له‌ چوارچيوه‌ى ئه‌و ئاهه‌نگسازيه‌‌ دڵ ئه‌كاده‌ خوين و مايه‌ى ناڕه‌حه‌تيه‌ له وه‌رانوه‌ر ئه‌و بكوشه‌يله‌، مه‌سيحيه‌يليش له‌ زووان پياوه‌يل ئايينييان ئه‌پرسن ئيمه‌ چه‌ كرديمنه‌ تا خوينمان بڕشيه‌ێد و ماڵ و موڵكه‌يلمان تاڵان و زه‌فت بكريه‌ێد و بسزيه‌ێد، كاره‌ساته‌گه‌ ئه‌وه‌سه‌ ئه‌وانه‌گ ئى كاره‌يله‌ ئه‌نجام ئه‌يه‌ن هاوساى كويچه‌يى و جاده‌و پاريزگاو وڵاته‌گه‌ن، وه‌تايبه‌ت ئه‌وانه‌گ ئى كاره‌يل ناوه‌جيه‌ ئه‌كه‌ن جوور ئيمه‌ له‌ ئه‌هل كتاون، ئايا يه‌هوودى و مه‌سيحى و ئسلام له‌ كويه‌نترين ئايينه‌يليگ نين له‌ عراق.

 

وه‌ل ئه‌وه‌يشا ئه‌گه‌ر ته‌ماشاى حاڵه‌ت وه‌خشين و لێبورده‌يى و كاره‌يل تون وتيژى بكه‌يم، دوينيم ئه‌وان هه‌ر جووره‌ چه‌كدارييگ له‌ده‌يشت چوارچيوه‌ى ده‌وڵه‌ت ره‌ته‌و ئه‌كه‌ن و رينمايى رووڵه‌يليان ئه‌كه‌ن ئنتما ئه‌را هيزه‌يل چه‌كدار نيشتمانى وه‌گشت جووره‌يلى بياشتوون، چونيكه‌ له‌ غه‌يره‌ ده‌وڵه‌ت ياسايى و هاووڵاتيبوين بترازيه‌ێد هويچ رييگ تر نه‌يرن ئه‌را مقه‌يه‌تيكردنيان له‌ زوڵم و غه‌دركاره‌يل و ته‌كفيريه‌يل و مه‌ندنه‌وه‌يان له‌ نيشتمانيگ ئه‌زيز له‌ دڵه‌يليان.

 

وه‌ گووره‌ى ئه‌وه‌و په‌يڕه‌وه‌يل تر بنه‌ڕه‌تى ئه‌را بنيات ده‌وڵه‌ت يه‌كسانى و دادگه‌رى، داوا له‌ هيزه‌يل سياسى ئه‌كه‌ن وه‌تايبه‌ت ئه‌و هيزه‌يله‌ ك ده‌سگرتنه‌سه‌ جڵه‌و ده‌سڵات وه‌ل ئه‌و هه‌مگه‌ ئاژاوه‌و سه‌ره‌وه‌رى بته‌وتره‌ ك شيوه‌يگ له‌ ته‌سويه‌ت بويننه‌و ئه‌رايان، وه‌لێ هيمان شه‌مه‌نده‌فه‌رى وسياگه‌.

 

كه‌مينه‌يل له‌ى وڵاته‌ تويش جووره‌ها مه‌ترسى ئه‌يه‌ن، جوور كوشتن و كووچ وه‌پيكردن و دزى ماڵ و موڵك و سووكايه‌تى و له‌گشت ئه‌وانه‌يش خراوتر نه‌وين ده‌رفه‌ت كاره‌و ته‌نانه‌ت ئه‌و كه‌سه‌يليشه‌ ك تواناى ديرن له‌لى بيبه‌شن، وه‌ل ئه‌وه‌يشا دويا برياريگيش له‌ ياساى ئيرادات ده‌وڵه‌ت ئه‌وه‌ بوى ك بازرگانى وه‌ مه‌ى و شه‌راو قه‌يه‌غه‌ كريا.

 

وه‌ڕاسى كه‌مينه‌يل تويش روى وه‌ڕوى بوينه‌وه‌ هاتنه‌ له‌ڕوى وجووديان له‌بان خاك نيشتمان، ئه‌ويش وه‌گووره‌ى ئه‌و ريڕه‌وه‌ ك وه‌ يه‌واشى په‌يڕه‌و ئه‌كريه‌ێد له‌لايه‌ن هيزه‌يل تونڕه‌و ئايينى ك خوازيار نيه‌ فريه‌يى له‌ عراق وجوود داشتوود، ك يه‌يش له‌وه‌ختيگ بايه‌سه‌ هووكار بته‌وكردن يه‌كگرتگى كۆمه‌ڵگايى و نيشتمانى بوون له‌ى وڵاته‌ ك له‌بان بنه‌ماى هاووڵاتيبوين و يه‌كسانى له‌وه‌رده‌م ياسا بنيات نريا.

 

حكومه‌ت وه‌رپرسه‌ له‌بان مقه‌يه‌تيكردن له‌ كه‌مينه‌يل له‌ هه‌ر شوونيگ، ك بايه‌سه‌ روى وه‌ڕوى ئه‌و تاوانكاره‌يله‌ بدێ ك دژ مه‌سيحيه‌يل و ئێزيديه‌يل و باقى پيكهاته‌يل تر ملله‌ته‌گه‌مان ره‌فتار ئه‌كه‌ن.

 

مه‌ردمان فاميده‌ له‌ رووڵه‌يل ملله‌ته‌گه‌مان ته‌ماشاى سه‌قامگيرى و ئاسايش و قه‌ور داعش و كار و خوه‌شگوزه‌رى وه‌ خێر و به‌ير وڵاته‌گه‌و زيايكردن خوه‌شيه‌يليان ئه‌كه‌ن وه‌بى جياوازى ره‌گه‌زى و ئايينى و شيوازه‌يل تر.

 

هويچ كه‌سيگ له‌ى وه‌رپرسيارێتيه‌ جيا نيه‌ له‌وه‌ختيگ ك دوينێد لايه‌نيگ تون وتيژى ئه‌يه‌رێده‌ كار دژ هاووڵاتيه‌يل يا ئاگاداره‌ له‌ كرده‌وه‌يليان و خه‌وه‌ر له‌بانيان نايه‌ێد و هه‌وڵ نايه‌ێد پيشكه‌ش بكريه‌نه‌ دادگا ئه‌را ئه‌وه‌گ سزاى دادگه‌رانه‌ى خوه‌يان وه‌ربگرن.

 

دى نازانم نوێنه‌ره‌يل ئه‌نجومه‌نه‌گه‌مان چه‌ ئويشن له‌وه‌ختيگ ك دوينن هاوكاريگيان له‌ مه‌سيحيه‌يل چه‌و ئه‌سرينه‌ ئه‌را رووڵه‌يل نه‌ته‌وه‌گه‌ى داعشيه‌يل به‌غدا و كه‌سه‌يل تر ده‌سدريژى ئه‌كه‌ن بان سه‌روه‌رى وڵاته‌گه‌و ئه‌نجومه‌نه‌گه‌ى.

ماجد زه‌يدان