ئه‌را نه‌وه‌یل ئاینده‌ى كورد

شفق نيوز

ئیمه‌ى كوردیش وه‌ قوناغه‌یل فره‌ سه‌ختیگا گوزه‌ر كردیمه‌و ره‌نج فره‌یگ كیشایمه‌و تاریخمان پڕه‌ له‌مه‌ینه‌تى و ده‌رده‌سه‌رى، وه‌لى وه‌ل ئه‌وه‌یشا خه‌بات بى وچان كردیمه‌و مقه‌یه‌تى له‌ كلتوور و شوناسنامه‌و زوان خوه‌مان كردیمه‌.

بیگومان ئه‌گه‌ر تا دویه‌كه‌ نه‌یاره‌یلمان خاكمان داگیر كردنه‌و به‌شبه‌شیه‌و كردنه‌، وه‌لى ئیسه‌ به‌شیگ له‌و زوڵم و زووره‌ نه‌مه‌ند و پارچه‌یگ له‌كوردستان گه‌ورا ئازاده‌و كورد له‌تى له‌سایه‌ى ئازادى و دیموكراسى ژیه‌ن. ئه‌گه‌ر تا دویه‌كه‌ ئه‌نفال و كیمیا وارانمان كریا، ئه‌وه‌سه‌ ئمڕوو له‌سایه‌ى خوین شه‌هیده‌یل و شووڕشه‌یل كوردستان زه‌نگ خوه‌شى له‌لى دریا، ئه‌گه‌ر تادویه‌كه‌ ڕوڵه‌یل ئه‌زیز و نازار كورده‌یل فه‌یلى زنگ وه‌ چاڵ و بى سه‌روشوون كریان، ئه‌وه‌ ئمڕوو دادگاى باڵاى تاوانه‌یل له‌عراق حوكم وژدان ده‌رهه‌قیان هاورده‌ كار و ڕووژ رووشنایگ  ئه‌ڵات له‌ى چین زوڵملیكریاگه‌. هه‌ر له‌وه‌ر ئه‌وه‌یش چه‌ن تاریفیگ  ئه‌را نه‌وه‌یل ئاینده‌ى كورد كه‌یم له‌باوه‌ت كورده‌وه‌:

* كورد ئه‌و ملله‌ته‌سه‌ ك خاك و نیشتمانه‌گه‌ى له‌لایه‌ن داگیركه‌ره‌یل فره‌نساو بریتانیاوه‌ له‌كووتایى جه‌نگ  جه‌هانى یه‌كم وه‌بى خواست خوه‌ى به‌شبه‌شه‌و كریا له‌بان چوار ده‌وڵه‌ت داگیر كه‌ر.

* كورد ئه‌و ملله‌ته‌سه‌ ك ته‌نیا پشت وه‌ جه‌وه‌ڵه‌یل سه‌ربه‌رز به‌ساو هه‌ر وه‌خوین شه‌هید و قوربانیه‌یل ڕوى وه‌ڕوى دوشمن وسیان.

* كورد ته‌عریب و ئاواره‌ كریاو گشت ماڵ و موڵكى له‌لى وه‌ زوور زه‌فت كریا.

* كورد وه‌گشت جووریگ سزا دریاو په‌ت سێداره‌ ئه‌را خه‌باتكه‌ر و سیاسه‌ته‌تمه‌داره‌یل فره‌یگى هه‌ڵخریا.

* كورد هه‌میشه‌ ئاشتیخواز و رزگاریخواز بوى ،وه‌لى دوشمنه‌یلى وه‌ل نه‌گونجیان و چه‌و بڕینه‌ خه‌یر وبه‌یر خاكه‌گه‌ى.

* كورد داواكار برایى و دووسى بوى، وه‌لى دوشمنه‌یل مه‌رگمان تواسن.

* كورد هه‌میشه‌ دروشم یا شعار ئازادى و دیموكراسى به‌رزه‌و كرد، وه‌لى حكوومه‌ته‌یل یه‌ك له‌شوون یه‌ك وه‌رده‌وام وه‌ ئاگر و ئاسن جواوى دانه‌وه‌.

* كورد باوگیگ  وه‌ك بارزانى نه‌مر داشت ك رابه‌ر له‌شكر هه‌ق بوى خاوه‌ن هونه‌ر و ماریفه‌ت بوى و خه‌یر وه‌گشت ملله‌تیگ  تواس، ده‌وڵه‌ته‌یل داگیركه‌ریش دكتاتۆر دڕنده‌و بى وژدان داشتن و هه‌ر یه‌كیگ  له‌لیان قه‌ساوخانه‌ى تایبه‌ت داشت ئه‌را له‌ناوبردن كورد.

با نه‌وه‌یل ئاینده‌ بزانن كورد چوین بویه‌و ڕووژگار چوین وه‌لیا چه‌رخیاگه‌و چ كاره‌ساته‌یلیگ ده‌رهه‌قى كریاگه‌!!!