لیواى ته‌به‌عیه‌.. كونیه‌ت و مه‌ویسى كورده‌یل فه‌یلى

شفق نيوز

 

كورده‌یل فه‌یلى تویش هاتن وه‌ده‌س مه‌ینه‌تى و مه‌ویسى فره‌یگه‌و له‌وه‌خت جه‌نگ ناونى عراق و ئیران، ك له‌وه‌یش سه‌ختتر مه‌ینه‌تى نه‌وین متمانى بوى وه‌پیان له‌لایه‌ن رژیم سته‌مكار سه‌دام حسێن دیكتاتۆر ك هه‌میشه‌ وه‌ مه‌ینه‌تى ئنتمابوین زه‌خمداریان كرد.

 

جه‌نگ وه‌ل ئیران هه‌وه‌جه‌ وه‌ له‌شكریگ داشت، هه‌ر له‌وه‌ر ئه‌وه‌یش سه‌دام بڕیار وه‌سه‌ربازیكردن كورده‌یل دا جوور باقى هاووڵاتیه‌یل تر عراقى، ئه‌وه‌ بوى ك سه‌دام سته‌مكار هویر له‌وه‌ كرد گشت سه‌ربازه‌یل كورد فه‌یلى له‌ یه‌ك شوون گرده‌و بكا خاستره‌ له‌وه‌ك به‌شبه‌شیانه‌و بكا له‌بان فه‌یله‌ق و تیم و لیوایه‌یل سوپاى عراقى، چوینكه‌ له‌یوا زانست ك لایه‌نگرى نین و جوور دوشمنن ئه‌ڕاى، دى وه‌و شیوه‌ جوور مار هه‌میشه‌ له‌وه‌رچه‌وى بوین و خسته‌یانه‌ ژیر چه‌ودیرى.

 

ئه‌وه‌ بوى ناو"تبه‌عیه‌" كرده‌ ناونیشان دامه‌زریاگ سه‌ربازییان و دى وه‌پیان وتیان "لیواى ته‌به‌عیه‌" یا هیز ته‌به‌عى، دى خود خوه‌ى وه‌و ناوه‌ جیایان كرده‌و له‌سوپاى عراقى و فه‌وجه‌گه‌یان له‌و وه‌خته‌ كرده‌ شه‌ش په‌ل، ك یه‌یش جیاواز بوى له‌رژیم سوپاى عراقى، چوینكه‌ فه‌وج وه‌گووره‌ى سستم سه‌ربازى پیكهاتیاد له‌ سێ په‌ل و هه‌ر په‌لیگیش یه‌كسان بوى وه‌ دو یا سێ له‌ په‌له‌یل سوپاى عراقى، هه‌ر له‌وه‌ر ئه‌وه‌یش سه‌ركردایه‌تى ناچار بوى بكاده‌یانه‌ لیوا یا هیزیگ و ناوى نریا لیواى"432" ك دویاخر ئاڵشت كریا ئه‌را لیواى "436"، وه‌لى سه‌دام قه‌ناعه‌ت نه‌یاشت وه‌ى ناوه‌و له‌ماوه‌ى كه‌میگ زیاتر له‌جاریگ ناوه‌گه‌ى ئاڵشت كرد، یه‌یش ماناى ئه‌وه‌سه‌ ك خود سه‌دام گرینگى دیاده‌ مه‌سه‌له‌ى ناوناینى تا زیاتر كینه‌تدار بوود له‌ هه‌نایان، هه‌ر له‌وه‌ر ئه‌وه‌یش دویاجار ناوه‌گه‌ ئاڵشت كرد ئه‌را لیواى(444)، چوینكه‌ شماره‌(4) جوور مار پیچه‌، یه‌یش ماناى ئه‌وه‌سه‌ ئه‌و لیوا وه‌ك سێ مار پیچخواردگ و ژه‌هرداره‌و ئاماده‌ى گه‌زین و جزداینه‌، ئه‌یه‌ له‌لایگ .

 

له‌لایگ تریشه‌و، ده‌فته‌ر خزمه‌ت سه‌رباز كورد فه‌یلى نیشانه‌یگ داشت جیا له‌گشت سه‌ربازه‌یل عراقى، یه‌یش جه‌نگ سه‌خت ده‌روینى بوى وه‌لیاناو خوسه‌و كینه‌ت و دڵته‌نگى له‌لایان دروس كرد.

 

رژیم سه‌دام شوونه‌یل مه‌شقكردن له‌ تكریت ئه‌ڕایان ده‌سنیشان كرد، وه‌لى باقى سه‌ربازه‌یل تر عراقى چیان ئه‌را شوونه‌یل جوراوجوور، دى وه‌جووره‌ له‌ تكریتیش جیا بوین له‌ سه‌ربازه‌یل نا ته‌به‌عیه‌، وه‌لى رژیم سه‌دام له‌ شوونه‌یل مه‌شقكردنیش نه‌یشته‌یان وه‌ته‌نیاو سه‌ربازه‌یلیگ ك خوه‌یان متمانه‌ وه‌پیان داشتن له‌ناویان دامه‌زرانن ئه‌را چه‌ودریكردن و جیوازكردن قسه‌و ره‌فتار كورده‌یل فه‌یلى، دى سه‌دام وه‌و سیاسه‌ته‌ وه‌لیانا ره‌فتار كرد.

 

بیجگه‌ ئه‌وه‌یش ته‌نانه‌ت سیاسه‌ت رژیم نه‌یشت كورده‌یل فه‌یلى وه‌ گووره‌ى سستم سه‌ربازى مه‌شق وه‌رزشى و سه‌ربازى بكه‌ن و ته‌نیا مه‌شق كه‌میگ وه‌پیان كردیان، یه‌یش له‌وه‌ر ئه‌وه‌ك بنیات لاشیان بته‌و نه‌ود و جوور باقى سه‌ربازه‌یل تر هووكاره‌ى هونه‌ر جه‌نگ  نه‌ون، هه‌ر له‌وه‌ر ئه‌وه‌یش ماوه‌ى مه‌شقداین كورده‌یل فه‌یلى كه‌متر بوى و دویاخر جیواز كریان ئه‌را سه‌ربازگا ك منستیاده‌ زندان سه‌ربازى و ئامانج له‌ى كاریشه‌ ئه‌وه‌ بوى تا فه‌یلیه‌یل دویره‌و بخا له‌ به‌ره‌ى جه‌نگ و ناوخود.

 

سه‌دام تویه‌نستیاد خزمه‌ت یه‌ربازییش وه‌پیان نه‌كا، وه‌لى له‌وه‌ ڕخى چى له‌دژى كار بكه‌ن و هویچ نه‌فیگ له‌ كورده‌یل فه‌یلى وه‌رنه‌گرت نه‌ له‌ڕوى سه‌ربازى نه‌یش مه‌ده‌نى، ئنجا له‌شوون ته‌واوكردن ماوه‌ى مه‌شقكردنیان به‌شبه‌شه‌و كریان له‌بان بنگه‌یل سه‌ربازى له‌ ناسریه‌و سه‌ماوه‌و دیوانیه‌و حله‌و به‌سره‌و نه‌جه‌ف و خریانه‌ بان" په‌له‌یل كاركردن" ك ئى په‌له‌ زیاتر سه‌ربازه‌یل بیچه‌ك و كه‌مئه‌ندامه‌یل گرتیاده‌ خوه‌ى، چوینكه‌ سه‌دام ترس چه‌كداركردنیان داشت و متمانه‌ وه‌پیان نه‌كرد، هه‌ر له‌وه‌ر ئه‌وه‌یش رووژانه‌ وه‌ كاردن خه‌ریك بوین له‌ كارخانه‌یل سوپا جوور كارخانه‌یل بلۆك و خشت له‌ دیوانیه‌و له‌وه‌خت سه‌خته‌وبوین جه‌نگیش له‌ بره‌یل جه‌نگ  چه‌ك و ته‌قه‌مه‌نى وه‌پیان بار كردیاد ئه‌را به‌ره‌ى جه‌نگ و شه‌وانه‌یش پاسه‌وانى وه‌پیان ئه‌نجام دیادو نه‌یشته‌یان تیر بخه‌فن.

 

ئنجا وه‌ختى ئاگر جه‌نگ ناونى عراق و ئیران بڵیزه‌ گرت و سه‌خته‌و بوى، سه‌دام سته‌مكار بریار كلكردیان دا ئه‌را زه‌ینه‌لقه‌وس ئه‌را ئه‌وه‌ بخریه‌نه‌ ناو جه‌نگ تا وه‌یكجارى له‌لیان قورتار بوود، هه‌ر له‌هه‌مان وه‌خت ده‌سكرده‌ ده‌ركردن خیزانه‌یلیان ئه‌را ده‌یشت عراق و خسته‌یانه‌ پشت مه‌رز ئیران و له‌ناوڕاس خاكه‌یل مینڕیژكریاگ، سه‌ربازه‌یل كورد فه‌یلى له‌ ئاكام ئه‌و كاره‌یله‌ نه‌تواسن دى به‌شدارى جه‌نگ بكه‌ن، ئنجا سه‌ركرده‌ى فه‌وج فه‌رماندا له‌هیز پشت سوپا بمیننه‌و، له‌و وه‌ختیشه‌ لیژنه‌یگ له‌ ماڵ كوماریه‌و هات ئه‌را له‌یه‌كه‌وداین ئه‌و مه‌سه‌له‌، سه‌ربازه‌یل فه‌یلى ده‌سكردنه‌ شكایه‌ت و هاوار كردیان وه‌ده‌نگ به‌رز له‌وه‌رده‌م لیژنه‌گه‌و وتیان ئه‌یه‌ كار ناڕه‌وایگه‌ ده‌رهه‌قمان ئه‌نجامى ده‌ن و جوور هاووڵاتى هساومان ناكه‌ن و دى چوین داواى به‌شداریكردن له‌جه‌نگ له‌لیمان كه‌ین و له‌ولایشه‌و خیزانه‌یلمان وه‌ زوور ده‌ركه‌ین و ناهه‌قى ده‌رهه‌قیان ئه‌نجام ده‌ین، هه‌ر له‌وه‌ر ئه‌وه‌یش رژیم سه‌دام ئاڵشت پلان خوه‌ى كردو فه‌رماندا تیكڵیان له‌ جه‌نگ نه‌كریه‌ێدو جیواز بكریه‌ن ئه‌را كه‌لار سه‌ر وه‌پاریزگاى سلێمانى، وه‌لى یه‌یش هه‌ر مه‌رام خراویگ له‌لى كه‌فته‌و، ك ئامانج رژیم ئه‌وه‌ بوى وه‌هه‌ر جووریگ بوود له‌ناویان بیه‌ێدو هه‌ر له‌وه‌ر ئه‌وه‌یش هه‌واڵه‌ى لیوایه‌یل جه‌نگكه‌ر كریان له‌ به‌ره‌ى جه‌نگ له‌مه‌رزه‌یل تره‌و تا مه‌رگ چنگ وه‌پیان هه‌ڵچنیدو بفه‌وتیه‌ن.

 

محه‌مه‌د عه‌لى سه‌ماوى

 

 

ج. ا