فه‌یلیه‌یل له‌ "شیستا ترف"، ره‌‌خنه‌ له‌‌ بیده‌‌نگى به‌غداو ره‌سانن كوردستان گرن

شفق نيوز

 

ئى رى وڕه‌سمه‌ له‌لایه‌ن بڕیگ له‌ ریكخریاگه‌یل و كوومه‌ڵه‌و كه‌سایه‌تیه‌یل كورد فه‌یلى ئه‌نجام گرت وه‌ ئاماده‌بوین عه‌لى حوسێن فه‌یلى نوێنه‌ر كورده‌یل فه‌یلى له‌ په‌رله‌مان كوردستان، له‌ هۆڵ " شیستا ترف " له‌ ستۆكهۆڵم پایته‌خت سوید وه‌ بوونه‌ى رووژ شه‌هید فه‌یلى و وه‌سه‌رچگن 33 ساڵ له‌بان تاوان كووچ وه‌پیكردنیان له‌وه‌خت رژیم وه‌رین ك" شه‌فه‌ق نیوز" و مه‌ردمان فره‌یگ ئاماده‌ى بوین و هۆڵه‌گه‌ پڕ بوى له‌ په‌نابه‌ره‌یل كورد فه‌یلى و عراقى و كوردستانى له‌گشت پارچه‌یل كوردستان.

 

نوێنه‌ر كورده‌یل فه‌یلى له‌ په‌رله‌مان كوردستان له‌ وتاریگ وه‌گووره‌ى به‌شداریكردنى له‌ زینگه‌وكردن ئه‌و بوونه‌ له‌ سوید وت: ئه‌وه‌ك ئمڕوو دوینیم و ژنه‌فیم و خوه‌نیمه‌وه‌ى له‌ى ساڵیاد و له‌ى ڕى وڕه‌سمه‌، به‌شیگه‌ له‌ مێژوو ئى پیكهاته‌و نه‌بایه‌د كه‌سیگ له‌ ئیمه‌ شه‌رم له‌باسكردن ئه‌و رویداگه‌یله‌ بكا ك تیه‌یده‌ تویشمان و بایه‌د فكره‌یلمان نیشان كه‌سه‌یل تر بیه‌یم وه‌ ده‌نگ به‌رز تا له‌لیمان بڕه‌سنه‌و و گشت مه‌ردم ئى هووكار راسكانى كووچ وه‌پیكردن و كوشتن جایه‌ڵه‌یلمانه‌ بزانن.

 

فه‌یلى هه‌میش وت: بیجگه‌ ئه‌و هه‌مگه‌ زوڵمه‌ ك ده‌رهه‌قمان ئه‌نجام دریا، هیمان تائیسه‌یش مایه‌ى خوه‌شه‌ویسییم ئه‌را عراق و عراقیه‌یل و ئه‌و لایه‌نه‌یلیشه‌ ك فه‌رامووشمان كردنه‌ ئیمه‌ له‌ئه‌وسا فیشتر هویریان كه‌یم و ئویشیمنه‌ پیان داخ ئه‌را زه‌خمه‌یلمان ناكیشیم ك هیمان ساڕیژ نه‌ویه‌و ئه‌را ئه‌و كیشه‌یلمانه‌ ك تائیسه‌ چاره‌سه‌ر نه‌ویه‌، به‌ڵكوو ژان ئیمه‌ ئه‌وه‌سه‌ ك به‌شیگ له‌و لایه‌نه‌یله‌ جه‌سه‌و رووح و دڵ و تاریخ ئیمه‌ له‌هویره‌و بردنه‌ .

فه‌یلى یه‌یش وت: ك بڕیگ له‌و لایه‌نه‌یله‌ به‌شیگ له‌ى ملله‌ت عراقه‌ له‌ده‌سدان ك هه‌میشه‌ جى شانازى و كه‌رامه‌ت و كاریگه‌رى بویه‌ ئه‌ڕایان و باوه‌ڕ ناكه‌ن و نازانن ك عراقیه‌یل ئاده‌میزاد فه‌یلى له‌ده‌سدانه‌ ك ماڵ و موڵكه‌یلیان زه‌فت كریاو فره‌یگ له‌ جایه‌ڵه‌یلیان كوشیاو كه‌سیگ نیه‌ شوونیان بگرید، زه‌فتكردن دارایى و ماڵ و موڵك كیشه‌ نیه‌، به‌ڵكوو ئه‌وانه‌ ئاده‌میزاد مقه‌یتیكه‌ر له‌بان ئى نیشتمانه‌و ئاشق ئى خاكه‌ له‌ده‌سدان ك وه‌ دڵسووزیه‌و خزمه‌ت نیشتمان كردیاد.

 

فه‌یلى زیاتر وت: هویچ كه‌سیگ جوور فه‌یلیه‌یل وه‌فادار نیه‌ ك ڕى شه‌ڕ له‌وه‌ر نه‌گرتنه‌ له‌گشت كیشمه‌كیش و جه‌نگ و قه‌یرانه‌یل، ك وه‌رده‌وام و هه‌میشه‌ ڕى خه‌یر و خاسسازى هه‌ڵوژانه‌.

 

له‌ وتار یه‌كێتى دیموكراتى كورد فه‌یلییش باس له‌وه‌ كریا، ك هیمان تائیسه‌ كورده‌یل فه‌یلى هویچ زانیارییگ له‌بان ئه‌و 20 هه‌زار جایه‌ڵ جوانه‌یل بى سه‌روشوونیانه‌ نه‌یرن و نازانن ته‌رمه‌یلیان ها له‌كوو، ك هه‌ر له‌وه‌ر ئه‌وه‌یش ره‌خنه‌ له‌ حكوومه‌ت به‌غدا گرتن و وتن: هووكار بیده‌نگى ده‌سڵاته‌یل عراقى له‌ى باوه‌ته‌و نازانیم چه‌سه‌و ره‌سانن هه‌رێم كوردستانیش له‌ وه‌رانوه‌ر له‌ناوبردن وه‌جه‌م كورده‌یل فه‌یلى له‌ ساڵیاد كووچ وه‌پیكردن ئى پیكهاته‌ فره‌ كزه‌ ك ته‌نیا سه‌رۆك هه‌رێم كوردستان نه‌ود وتاریگ له‌ى باوه‌ته‌و له‌ كۆنگره‌ى له‌ناوبردن وه‌جه‌م پیشكه‌ش كردگه‌.

یه‌كێتى دیموكرات فه‌یلى ره‌خنه‌ له‌ حزب و سه‌ركرده‌یل عراقییش گرت و وت: هه‌ڵویسته‌یل راسكانى و له‌وه‌رگرتن رى وشوون و گامه‌یل كرده‌وه‌یى كه‌میگ  له‌لایه‌ن سه‌ركرده‌و حزبه‌یل جیوه‌جیكار و ده‌سڵات دادگایى و ته‌شریعى و جیوه‌جیكردن ناوندى و هه‌رێمى كه‌فیده‌ وه‌رچه‌و ئه‌را چاره‌سه‌ر بنه‌ڕه‌تى كیشه‌یلمان.

 

وه‌ل ئه‌وه‌یشا ئاماده‌بویه‌یل بڕیگ داواكارى خسته‌ڕوى و له‌ هه‌ف خاڵ سه‌ره‌كه‌ى ده‌سنیشانى كردن و له‌وانه‌یش داوا له‌ ده‌سڵاته‌یل عراقى كردن چاره‌نویس زیاتر له‌  20هه‌زار روڵه‌یل بى سه‌روشوونیان ئاشكرا بكا وه‌ل جیوه‌جیكردن حوكم دادگاى باڵاى تاوانه‌یل ده‌رهه‌ق تاوانباره‌یل له‌ بڕیار 29/ 11/ 2010ك له‌لایه‌ن دادگاى ته‌میزیشه‌و په‌سه‌ن كریا.

 

له‌ هه‌مان وه‌خت داوا له‌ ئه‌نجوومه‌ن نوێنه‌ره‌یل عراقى و ئه‌نجوومه‌ن وه‌زیره‌یلیش كردن، گشت ئه‌و بڕیاره‌یله‌ لاوریه‌ید ك له‌لایه‌ن رژیم وه‌رینه‌و ده‌رهه‌ق كورده‌یل فه‌یلى ده‌ركریا وه‌تایبه‌ت بڕیار شماره‌ 666 له‌ 5/ 7 / 1980، وه‌ل هاوردنه‌وه‌ى گشت هه‌قه‌یلیان و له‌وه‌رچه‌وگرتن به‌رژه‌وه‌ندیه‌یلیان.

یه‌كیگ تر له‌و داواكاریه‌یله‌ ئه‌وه‌ بوى، ك بایه‌سه‌ كورد فه‌یلىنوێنه‌رایه‌تى داشتوود له‌ ئه‌نجوومه‌ن نوێنه‌ره‌یل عراقى وه‌گووره‌ى سستم"كۆتا" ك ئیسه‌ كار وه‌پى كریه‌ید جوور باقى پیكهاته‌یل تر عراقى و جوور ئه‌وه‌ك ئیسه‌ جیوه‌جى كریه‌ید له‌ ئه‌نجوومه‌ن هه‌ردوگ پاریزگاى به‌غداو كووت وه‌بى جیاوازى و پشتگووش خستن كورده‌یل فه‌یلى له‌ گشت بواره‌یل ژیان گشتى.

 

ئاماده‌بویه‌یل دویا ده‌واكارى خوه‌یان وه‌ دامه‌زرانن كه‌ناڵیگ ئاسمانى خسته‌ ڕوى وه‌ زووان فه‌یلى ئه‌را ئه‌وه‌ك كیشه‌و دید و رووشنهویرى و كلتووره‌یلیان ئاشنا بكا ك به‌شدارى فره‌یگ كرد له‌ ده‌وڵه‌مه‌نكردن كلتوور عراقى.

 

فه‌یلیه‌یل مه‌ردم نیشته‌جى عراق و له‌ناوچه‌یل جه‌له‌ولاو خانه‌قین و مه‌نه‌لى جینشین بوینه‌ تا ره‌سیده‌ عه‌لى غه‌ربى له‌ باشوور و ناوچه‌یل به‌دره‌و جه‌سان و كووت و نوعمانیه‌و عه‌زیزیه‌و بڕیگیش له‌لیان نیشته‌جى شار به‌غداى پایته‌ختن له‌ جاده‌ى كفاح و سه‌دریه‌و عه‌گدولئه‌كرادو قوشه‌ل و شار سه‌وره‌و جه‌میله‌.

 

كورده‌یل فه‌یلى تویش فه‌رامووشكردن و دویره‌وخستن هاتنه‌ هه‌ر له‌وه‌خت دامه‌زرانن ده‌وڵه‌ت عراقى و ده‌رچگن یاساى ره‌گه‌زنامه‌ى عراقى ك عراقیه‌یل كرده‌ دو به‌ش و دو ته‌به‌عیه‌ى عوسمانى و ئیرانى و هه‌ر له‌وه‌ر ئه‌وه‌یش له‌ ساڵه‌یل چل سه‌ده‌ى وه‌رین گه‌فتنه‌ وه‌ر كووچ وه‌پیكردن له‌سه‌رده‌م ره‌شید عالى گه‌یلانى سه‌رۆك وه‌زیره‌یل ئه‌وساو سه‌رده‌م ئه‌حمه‌د حه‌سه‌ن به‌كر له‌ناونى ساڵه‌یل 1970و1975، ك دویاخریش ئى كووچ وه‌پیكردن و كوشتن و له‌ناوبردنه‌ له‌سه‌رده‌م حوكم سه‌دام دریژه‌ وه‌پى دریا له‌ساڵ 1980 و گشت ره‌گه‌زنامه‌یلیان له‌لیان سه‌نده‌و.

 

ج . أ