هه‌ڵوژاردن له‌ عراق سووزايه‌تی و هووزايه‌تيه‌!

شفق نيوز

 

وه‌لی له‌يرا به‌شداريكردن له‌ هه‌ڵوژاردن وه‌ته‌نيا به‌س نيه‌ ئه‌را سه‌رخستن پرووسه‌ی ديموكراسی، چوينكه‌ هه‌ڵوژاردنيش په‌يوه‌سه‌ وه‌ كانديدكردن و داناين كه‌س گونجياگ له‌ شوون گونجياگ، ك وه‌و خاتريشه‌ بايه‌سه‌ له‌بان هاووڵاتی وه‌رجه‌ په‌سه‌نكردن و ده‌نگداين وه‌ هه‌ر كانديديگ هوير له‌ تواناو شاره‌زايی و راده‌ی وه‌ڕيه‌وبردن ئه‌و ئه‌ركه‌يليه‌ بكا ك له‌ ئاينده‌ بتويه‌نيد وه‌ شيوه‌ی دروسيگ پيشوازی له‌لی بكاو نه‌كه‌فيده‌ ناو كيشه‌و ئه‌نگه‌مه‌ی، وه‌لی جی داخه‌ له‌ی عراقه‌ دويای چه‌ن جاريگ له‌ ئه‌نجامداين ئی پرووسه‌ی پيرووز هه‌ڵوژاردنه‌ ك وه‌ باوه‌ڕم تائيسه‌ چاره‌سه‌ر گرفت و قه‌يرانه‌يل نه‌كردگه‌ نوێنه‌ره‌يل ملله‌ت نه‌ك هه‌ر خه‌مسه‌ردن له‌ ئاست وه‌رپرسيارێتی، به‌ڵكوو به‌ژه‌وه‌ندی خودی له‌لايان زاڵ بويه‌سه‌ بان وژدان و هه‌ڵسووكه‌فتيان و ئه‌و قه‌وڵه‌يليشه‌ ك له‌ سه‌ره‌تای هه‌ڵوژاردنه‌يل تر وه‌رين دانه‌سه‌ی ملله‌ت هيمان تا ئيسه‌ جيوه‌جی نه‌كريانه‌و ملله‌تيش هه‌ر چه‌وه‌ڕيه‌، مانای ئه‌وه‌سه‌ ئمڕوو په‌ياكردن نوێنه‌ر خه‌مخوه‌ر و متمانه‌دار هه‌وه‌جه‌ وه‌ خوه‌ندنه‌وه‌ی ته‌ماميگ ديريد، چوينكه‌ تا رووژ ئمڕوو ته‌نيا هه‌ر رووڵه‌يل فه‌قير و بيده‌سلاته‌ ك بوينه‌سه‌ قوربانی و ئاگردوی ئی هه‌مگه‌ كاره‌يل تون وتيژی و كوشتن وبڕين و ته‌قينه‌وه‌يله‌ ك رووژانه‌ له‌ ناوچه‌يل جياجيای عراق روی ئه‌يادو كوڕه‌ وه‌رپرسه‌يليش له‌بان تيكه‌ی رووژانه‌ی كه‌مداره‌مه‌ت و نه‌داره‌يل خوه‌شگوزه‌ری ئه‌كه‌ن و له‌ خوه‌شترين ناوچه‌يل گه‌شتياری جه‌هان داهات و درامه‌ت ئی ملله‌ت سته‌مديده‌ وه‌ تاڵان خه‌رج ئه‌كه‌ن و باقی مه‌ردميش ئه‌را به‌خت سيه‌ی خوه‌يان و ئه‌و ئه‌زه‌رته‌يله‌ گيرن ك هيمان تائيسه‌ خاكه‌ساره‌.

ئيسه‌يش ئه‌وه‌سه‌ جاريگ تر هه‌ڵوژاردنه‌و ده‌نگ كانديدكرياگه‌يل به‌رزه‌و په‌نا بردنه‌سه‌ وه‌ر وه‌ده‌سهاوردن ده‌نگ ده‌نگده‌ره‌يل و هه‌ر يه‌كيك له‌ليان گوورانی وه‌ له‌يلای خوه‌يا چڕيدو دروشم خزمه‌تكردن و قه‌وڵه‌يل هه‌رجار به‌رزه‌و كردنه‌ له‌گشت شوون و جاده‌يگ و سه‌رله‌نوو ده‌سكردنه‌سه‌ سازكردن كۆنگره‌و سيمينار و ريكخستن ئاهه‌نگه‌يل جوراو جوور ئه‌را خه‌ڵه‌تانن مه‌ردم فه‌قير و خوه‌شباوه‌ڕ.

ئمجا له‌يرا بايه‌سه‌ دی ملله‌ت وه‌ هويچ شيوه‌يگ نه‌خه‌ڵه‌تيه‌يدو ده‌نگ خوه‌ی وه‌ تاڵان نه‌يه‌يده‌ كه‌سيگ ك ئامانجی ته‌نيا گيرفان پڕكردن بوودو سوو پشت له‌ به‌رژه‌وه‌نديه‌يل باڵا بكا، چوينكه‌ شايه‌ت بويشيم مه‌ردم له‌ نياز خوه‌ی تائيسه‌ خه‌ڵه‌تيانه‌، وه‌لی له‌يه‌ودويا ئه‌گه‌ر هات و چاره‌نويس ئی ملله‌ته‌ روی له‌ خاسی نه‌كرد، ئه‌وه‌ بيگومان خود مه‌ردم ده‌نگده‌ر له‌لی وه‌رپرس و دريغيكه‌ره‌و له‌ هه‌ڵوژاردنه‌يل وه‌رين هويچ ئه‌زموونيگ وه‌رنه‌گرتنه‌.

بيگومان له‌ شوون ساڵ ٢٠٠٣ تائيسه‌ گشت هه‌ڵوژاردنيگ له‌ی عراقه‌ له‌بان بنه‌مای سووزايه‌تی و هووزايه‌تی و حزبايه‌تی ئه‌نجام گرتگه‌و هويچ خوندنه‌وه‌ی تايبه‌تيگ ئه‌را كه‌سه‌يل گونجياگ و شاره‌زا نه‌كرياگه‌و زوورم ته‌خت و پۆسته‌يليش دريانه‌سه‌ ئه‌و كه‌سه‌يله‌ ك ده‌س باڵا ديرن له‌ گه‌ناته‌كاری و فه‌وتانن دارايی ئی ملله‌ت چه‌وسياگه‌، ك يه‌يش بويه‌سه‌ هووكار ويرانكردن و دوياخستن ئی وڵاته‌ له‌ بواره‌يل ئاوه‌دانی و خزمه‌تگوزاری و سه‌قامگيری.

جه‌ماڵ ئه‌ركه‌زازی