نه‌خش خواست حكومه‌ت له‌ زينگه‌وكردن كه‌رت تايبه‌ت

شفق نيوز

له‌ گرينگترين هووكاره‌يل سه‌ركه‌فتن هه‌ر ئابوورييگ ئالشتكرياگ ئه‌را سيستم"ئابوورى بازاڕ ئازاد"ماناى پشتگيرييگه‌ له‌ كه‌رت تايبه‌ت و ئالشتكردنيه‌ ئه‌را هاوبه‌شيگ راسكانى ئه‌و كه‌رته‌ و جوور ركابه‌رييگ تاريف ناكريه‌ێد، هه‌ر وه‌و خاتريشه‌ ئه‌زموونه‌يل سه‌ركه‌فتگ ئابوورى له‌ جه‌هان ئه‌وه‌ راسيه‌ چه‌سپان و له‌وانه‌يش ئابوورى گه‌وراى چين ك خاسترين نموونه‌ى ئى كه‌رته‌سه‌.

له‌ى قوناغه‌ ك ئابوورى وڵات وه‌پيه‌و گوزه‌ر ئه‌كا له‌ حكومه‌ت داوا ئه‌كريه‌ێد ڕى وشوونه‌يليگ جددى بگرێده‌ وه‌ر ئه‌را زينگه‌وكردن و په‌يوه‌سبوين ناونى كه‌رت تايبه‌ت و گشتى، ك ئه‌ويش له‌ڕى وه‌كارخستن تواناى ئه‌را جيوه‌جيكردن گه‌شه‌ى وه‌رده‌وام، ئمجا ئى كاريشه‌ بايه‌سه‌ گشت جووره‌ هاوكارى و پشتگيرييگ ئه‌راى پيشكه‌ش بكريه‌ێد وه‌ل ده‌ركردن رينمايى ئه‌را وزاره‌ته‌يل و ده‌زگايه‌يل ده‌وڵه‌ت وه‌خاتر ئه‌وه‌گ كومپانيايه‌يل كه‌رت تايبه‌ت بگرنه‌ خوه‌يان و گشت ئاسانكارييگ جياجيا ئه‌رايان دابين بكه‌ن و نه‌ف له‌ شاره‌زايى جوراوجوور وه‌ربگرن له‌ زينگه‌وكردن هه‌ڵكه‌فت ئابوورى له‌ڕى به‌خشين ريككه‌فتنه‌يل بويچگ و نيمچه‌ گه‌ورا و له‌ هه‌مان وه‌خت شه‌راكه‌ت راسكانييش وه‌ل ده‌زگايه‌يل حكومى و دامه‌زرياگه‌يل پيشه‌سازى ئه‌نجام بدريه‌ێد و ته‌كان وه‌پى بيه‌ن له‌وه‌ر هاوردنه‌وه‌ى جموجويل ئه‌را گشت ئه‌و كومپانياو كارخانه‌يل حكوميه‌ ك له‌كار وسيانه‌، ئه‌ويش له‌وه‌ر ئه‌وه‌گ ده‌سميه‌ت بودجه‌ى ده‌وڵه‌ت بدريه‌ێد و مووچه‌ى كارمه‌نده‌يلى دابين بكريه‌ێد.

پشتگيرى كه‌رت تايبه‌ت و هاوكاريكردنى ئه‌را ئه‌وه‌گ بدێده‌ هاوبه‌ش راسكانى، هه‌وڵه‌يليگ ئه‌را ده‌وڵه‌ت و كه‌رت گشتى ئه‌يه‌رێده‌ وجوود له‌ بواره‌يل جياجياى ئابوورى و له‌ هه‌مان وه‌خت به‌شدارييش ئه‌كا له‌ كه‌مه‌وكردن ريژه‌ى بيكارى له‌ كومه‌ڵگا، چوينكه‌ ئى كه‌رته‌ هه‌زاران ده‌رفه‌ت كار خاس دابين ئه‌كا ئه‌را جايه‌ڵ جوانه‌يل بيكارمان و زه‌مانه‌ت مقه‌يتيكردنيانيش ئه‌كا تا نه‌كه‌فنه‌ دام ترۆر، ئمجا ئى كاريشه‌ هه‌وه‌جه‌ وه‌ ريڕه‌و يه‌كسانى ديرێد له‌ناونى كومپانيايه‌يل كه‌رت گشتى و كومپانيايه‌يل كه‌رت تايبه‌ت، وه‌تايبه‌ت له‌ مه‌سه‌له‌ى به‌خشين ريككه‌فتن حكومى، چوينكه‌ ئه‌وه‌ك ئمڕوو روى ئه‌ياد له‌راسى ئه‌و رينمايه‌يل ده‌ركرياگه‌سه‌ ئه‌را گشت وزاره‌ته‌يل ده‌وڵه‌ت وه‌ داين ئه‌وله‌ويه‌ت له‌ مه‌سه‌له‌ى ريككه‌فتن و پرووژه‌و ريككه‌فتنه‌يل حكومى ئه‌را كومپانيايه‌يل كه‌رت گشتى وه‌تايبه‌ت ئه‌وانه‌گ كار له‌بان ريڕه‌و ته‌مويل خودى ئه‌كه‌ن.

بيگومان ئى ڕى وشوونه‌يليشه‌ دروسه‌ ئه‌گه‌ر ئه‌و كومپانيايه‌يله‌ وه‌شيوه‌يگ راسكانى كار بكه‌ن و گشت توانايه‌يليان ته‌كنيكى و پيشه‌سازييان بخه‌نه‌ كار، وه‌لێ ئه‌و راسيه‌يله‌ ك له‌لاى گشت كه‌سيگ ئاشكراس ئه‌وه‌سه‌ ك گشت كومپانيايه‌يل ته‌مويل خودى وه‌شيوه‌ى ته‌ماميگ وسيانه‌و هه‌وه‌جه‌ وه‌ ريككه‌فتنه‌يليگ ئه‌كه‌ن له‌ به‌رژه‌وه‌ندييان تا بتويه‌نن ده‌سه‌وكاره‌و بوون.

له‌يرا مه‌سه‌له‌گه‌ هه‌وه‌جه‌ وه‌ له‌وه‌رگرتن ڕى وشوون راسكانى ديرێد له‌لايه‌ن حكومه‌ته‌و وه‌خاتر كووتاييهاوردن وه‌ى حاڵه‌ته‌يل خراوه‌و له‌وه‌ر خاتر كاركردن وه‌شيوه‌يگ ته‌ندروس ئه‌را زينگه‌وكردن هه‌ڵكه‌فت كه‌رت تايبه‌ت و دابينكردن گشت ئاسانكارى خواستيگ له‌وه‌ر داين نه‌خشيگ راسكانى ئه‌را زينگه‌وكردن ئابوورى داوه‌زياگ عراقى و به‌شداريكردن له‌ دوباره‌ بنياتنانه‌وه‌ى وڵات و گوزه‌ركردن مه‌ينه‌تى ئى ئابووريه‌ ك هاته‌سه‌ تويش عراق.

رائد سالم ئه‌لهاشمى