له‌وه‌ر ئه‌وه‌گ جه‌نگه‌يل دوباره‌وه‌ نه‌ون

شفق نيوز

من وه‌ل ئه‌وه‌يشا هويچ وه‌سيله‌يگ له‌ جه‌نگ نادوينم ئه‌را مقه‌يه‌تيكردن يه‌كێتى خاكه‌يل نيشتمان، به‌ڵكوو وه‌چه‌واشه‌وه‌ كاريگه‌ره‌ له‌بان شيوانن يه‌كێتى خاكه‌يلى و هه‌ر له‌وه‌ر ئه‌وه‌يش دژ جه‌نگ ديكتاتۆر وسيام له‌بان ملله‌ت كوردستانيش و رخه‌وبردن مناڵه‌يل له‌ هويرم ناچێد له‌وه‌ختيگ په‌لامار ئاوايه‌يليان دريا و هيمان تائيسه‌يش ديمه‌ن رخه‌وبه‌ر ويرانكردن ئه‌و ئاوايه‌يله‌ ها وه‌رچه‌وم.

هه‌رچه‌نى هه‌ڵويستم دژ ديكتاتۆر بوى و چه‌كيش گرتمه‌ ده‌س وه‌ل ئه‌وانه‌گ خوازيار رمانن ئه‌و رژيمه‌و ئوميده‌وار بويم رميانى بوينمه‌ چه‌و له‌وه‌خت واينى، له‌ هه‌مان وه‌خت وه‌ل ئه‌وانه‌يش وسيام ك له‌ جه‌نگ ئه‌مريكى ئه‌را بان عراق وه‌ جه‌نگ دوشمنكارانه‌ زانستيان و ته‌نيا جوور داگيركارى باسى كرديان.

ئمجا وه‌ختيگيش مه‌ردمانيگ خوه‌شى ئه‌را كه‌فتنه‌وه‌ى مووشه‌كه‌يل كردن له‌بان به‌غدا و ئوميده‌وار بوين له‌ڕى جه‌نگه‌و ديموكراسيه‌ت باێد، وه‌ل ره‌فيقه‌يلم باس له‌وه‌ كردم ك جه‌نگ ڕى سه‌ركه‌فتن نيه‌ ئه‌را په‌يابوين ديموكراسيه‌ت، وه‌لێ ئه‌وانه‌گ خوازيارى بوين گه‌مه‌ وه‌ئيمه‌ كرديان و دوياى ماوه‌يگيش دگان وه‌ هه‌ڵه‌يل گه‌وراى خوه‌يان نان و دوياخريش هاتنه‌ بان قسه‌كه‌ى ئيمه‌. من هويچ هووكاريگ نه‌يم ك بيلێد دڵم خوه‌شى ئه‌را ده‌نگ مه‌دفه‌ع و شريقه‌ى گوله‌ بكا، ته‌نيا جه‌نگيگ خوه‌شى فريه‌يگ ئه‌راى كردم جه‌نگ عراق بوى دژ ريكخرياگ ترۆريستى داعش، گشت چركه‌يگ دڵم خوه‌شى كوتێد وه‌ل سه‌ركه‌فتن سوپا و پيشڕه‌ويكردنى وه‌ره‌و ئازادكردن موسڵ – ئومولڕه‌بيعه‌ين، شار برايه‌تى و ژيان و ئاشتى. به‌ڵى ئه‌و خوه‌شيه‌ مه‌زه‌نه‌ ناكريه‌ێد له‌ئاست ئه‌و سه‌ركه‌فتنه‌يل هيزه‌يل چه‌كدارمانه‌ وه‌گشت دامه‌زرياگه‌يل و سنفه‌يل جياجياى له‌ راوناين ترۆريسته‌يل.

سه‌ركه‌فتنه‌يل سوپامان شانازيه‌ و پيشڕه‌ويه‌يل گورجيان خوه‌شه‌ له‌ به‌ره‌يل جه‌نگ، پيشبينيه‌يلمان راس بوى ك عراق گه‌وراتره‌ له‌وه‌گ شكه‌ست بارێد له‌وه‌رانوه‌ر ترۆر و رووژه‌يل عراق و رووشنايه‌يلى ناكه‌فيده‌ وه‌ر تارمايى فكر و بووگه‌نى ئه‌قڵه‌يل و گره‌وه‌يمان له‌جى خوه‌ى بوى و ئه‌وانه‌ رووڵه‌يل عراق بوين ك پشت وه‌پيان به‌سايم و تيوڵ گشت جه‌نگاوه‌ريگ عراقى ماچ ئه‌كه‌يم ك كرامه‌ت عراق خسته‌سه‌ وه‌رچه‌وه‌يلى و جه‌نگ ئه‌كا.

ئمجا له‌وه‌ر ئه‌وه‌گ جه‌نگه‌يل دوباره‌وه‌ نه‌ون و ئه‌و لاپه‌ڕه‌يل پڕ ژانه‌ داخه‌يم چوينكه‌ جه‌نگ شه‌رعيه‌تى هه‌رچى بوود هه‌ر جه‌نگه‌و زه‌ره‌ده‌يلى ژانداره‌..ئويشم: له‌وه‌ر ئه‌وه‌گ جه‌نگه‌يل دوباره‌وه‌ نه‌ون، بايه‌سه‌ ئحتيات وه‌ربگيريه‌ێدش. له‌وه‌ر ئه‌وه‌گ جه‌نگه‌يل دوباره‌وه‌ نه‌ون، بايه‌سه‌ له‌ بانمان ئاماده‌ بويم ئه‌را ئاشتى، ئاماده‌ ئه‌راى بويمن له‌ڕى دابينكردن ئاسايش و جيوه‌جيكردن ئه‌مان و ده‌سكردن راسه‌وخۆ وه‌ بنياتناين و ئاوه‌دانى.

ئاده‌ميزاديش يه‌كه‌مين ئامانجه‌يل بنياتناينه‌، دى بيلا زانست و گوزران خاس و ته‌ندروسى و كار و كه‌رامه‌ت ئه‌راى ئاماده‌ بكه‌يم و مقه‌يه‌تى له‌ مافه‌يلى بكه‌يم و كه‌ش گونجياگ ئه‌را مه‌شقكردن ئازاديه‌يل گشتى و تايبه‌ته‌گه‌ى زه‌مانه‌ت بكه‌يم و هاووڵاتيبوين نه‌ك به‌شبه‌شايه‌تى بدێده‌ بنماى بنيات.

جاسم ئه‌لحلفى