(هەولێر) وەتام (بەغدا)..!

شفق نيوز

يه‌كه‌م: مه‌هانه‌ى لۆجيكيانه‌ى ئى گفته‌ ريگريكردنه‌ له‌ په‌يابوين ته‌كڕه‌وى و فه‌رمانڕه‌واى ديكتاتۆر له‌ كوردستان، وه‌لى ئايا ئى مودێله‌ ته‌نيا له‌ گرده‌وكردن گشت يا زوورمينه‌ى ده‌سڵاته‌يله‌له‌ پۆست سه‌رۆكايه‌تى؟ ئه‌گه‌ر ئه‌زموون په‌رله‌مانيانه‌ى سيستمه‌ سياسيه‌گه‌ى به‌غدا بكريه‌يده‌ نموونه‌ ئه‌را هه‌ولێر، ئه‌ى مه‌گه‌ر هه‌ر ئه‌و سيستمه‌ نه‌وى ك ته‌كڕه‌ويگ جوور مالكى هاورده‌ به‌رهه‌م؟ ئه‌گه‌ريش ئه‌و سيستمه‌ وه‌ مه‌هانه‌ى ده‌سڵاتسالارى په‌رله‌مان پينه‌ بكريه‌يد، وه‌و مانا ك هه‌ركه‌سيگ له‌ هه‌ر ئاستيگ ده‌سڵات بدێ له‌لايه‌ن په‌رله‌مانه‌و ڕى هه‌س په‌يجوورى له‌لى بكريه‌يد. ئمجا ئى هويروڕايشه‌ گشت مه‌هانه‌يگ گفت"هاوشيوه‌ى به‌غدا"ره‌ته‌و ئه‌كا، چوينكه‌ كه‌سيگ نيه‌ ئه‌و راسيه‌ نه‌زانيد ك له‌ واقع كوردستان په‌رله‌مان له‌ وه‌سيله‌يگ وه‌ ياساكردن ريككه‌فتنه‌يل سياسى مه‌رامه‌يل سياسى لايه‌نه‌يل به‌شدار وه‌ولاوه‌ هويچ تر نيه‌.

دويه‌م: گفت "هاوشيوه‌ى به‌غدا"ته‌نيا قسه‌كردن نيه‌ له‌بان ده‌سڵاته‌يل سه‌رۆك هه‌رێم له‌بان مودێل سه‌ركومار عراق وبه‌س، به‌ڵكوو قسه‌كردنه‌ له‌وه‌ر بنه‌ماى ته‌وافق سياسى له‌ دامه‌زرانن سيستم سياسى هه‌رێم وه‌گشت هويرده‌كاريه‌يليه‌و، ك يه‌يش ئه‌را خوه‌ى له‌ بنه‌ماوه‌ ره‌ته‌وكردن په‌رله‌مانه‌ وه‌گشت شيوه‌يگ.

كوڵ وكوڵبڕ، هويچ گومانيگ له‌و قسه‌ له‌ وجوود نيه‌ ك بويشيد: سيستم په‌رله‌مانى ئه‌را هه‌رێم كوردستان سيستم گونجياگيگه‌، وه‌لى گومان فريه‌يگ له‌لى ئه‌كريه‌يد ئه‌گه‌ر بويشيه‌يد: هاوشيوه‌ى به‌غدا.

بويچگترين گومانيش ك ئه‌را خوه‌ى گومانيگ گه‌وراس، ئه‌ويش گومانه‌ له‌ خواست كۆپيكردن هه‌ولێر له‌گشت روييگه‌و له‌بان مودێل به‌غدا، يا وه‌لاى كه‌مه‌و له‌بان مودێليگ ك مايه‌ى ره‌زامه‌نى به‌غدا بدێ، وه‌بى گووشداين وه‌ جيوازيه‌يل سياسى و كومه‌ڵايه‌تى و فه‌رهه‌نگى و ديموگرافى ناونى عراق و هه‌رێم كوردستان.

ئمجا بيلا واز له‌ جياوازيه‌يل ستراتيجى و خه‌وه‌يل نيشتمانى و نه‌ته‌وه‌يى باريم، چوينكه‌ دڵنيام له‌لاى ئه‌و قسه‌ شوونيگ نيه‌ ئه‌را ئه‌و خه‌وه‌و ئه‌ڵڵاجه‌وييش ها له‌وه‌ ك ئه‌وه‌ به‌غدا نيه‌ ئويشيد: بايه‌سه‌ سيستم سياسى هه‌رێم كۆپييگ بويچگ له‌ من بدێ، به‌ڵكوو سياسه‌تمه‌داره‌يل ئى هه‌رێمه‌نه‌ ك ئه‌و فه‌رمايشه‌ كردنه‌..!

د.ئاراس عەبدولكەریم

ج . أ