فه‌یلى، له‌ رووژیگ جوور ئمڕوو

شفق نيوز

و نقلانه‌ى كووچ وه‌جه‌م وه‌بى بوى، بنه‌و باره‌گاى كورده‌ ماڵه‌یل هووز فه‌یلى گرده‌ ئامانج و زایه‌ڵه‌ى ده‌نگ هاوار وناڵه‌ى مناڵه‌یل كورپه‌و داڵگه‌یل په‌شیو ره‌سانه‌ ئه‌وج فه‌له‌ك، به‌ڵى ئه‌و شه‌وه‌یل پڕ له‌ یادگارى تیه‌ڵه‌، دڵه‌ پڕ به‌زه‌یه‌گان هاورده‌ خه‌م و چه‌و  خاوه‌ن وژادانه‌یل پڕ كرد له‌ ئه‌سر  حه‌یف، ناوچه‌یل فه‌یلى نشین بویه‌ پرسه‌خانه‌و داد و بیدادو خیزانه‌یل ره‌سه‌ن وڵات وه‌ ناڕه‌زاى دڵ بریان وه‌ره‌و چوڵه‌وانى مه‌رگه‌سات و له‌ڕى هات ونه‌هات كووچ زووره‌ملى وه‌پیان كریا.

 

فه‌یلى ئه‌و مه‌ردم ره‌سه‌ن و جه‌وركیشه‌سه‌، ك هیمان ئیسه‌و ئیسه‌یش جوور پیكهاته‌یگ زوڵم لیكریاگ ك ساڵه‌یل فره‌یگ له‌ژیر سته‌م رژیم وه‌رین ده‌رده‌سه‌رى فره‌یگ كیشاو دویاخریش وه‌ نك ناهمى و هه‌ناسه‌ى سه‌رد له‌زێد باوگ وباپیره‌یلى بیگانه‌ كریا، هه‌ناسه‌ى ئوخه‌ى هه‌ڵنه‌كیشاو له‌ عراق سه‌رده‌م ئازادى وه‌ هه‌قه‌یلى شاده‌و نه‌ویه‌و هیمان چه‌وه‌ڕى ده‌ركه‌فتن ئاسوو خوه‌شبه‌ختیه‌ ئه‌را چاره‌سه‌ر كیشه‌یلى.

 

له‌رووژیگ جوور ئمڕوو  كورده‌یل فه‌یلى جیا له‌ پیكهاته‌یل تر كوومه‌ڵگاى عراقى وه‌ره‌و گووشه‌ى غوربه‌ت و كه‌مپه‌یل پڕ مه‌ینه‌تى دویره‌و خریان و هویچ وڵات و ریكخریاگیگ ناوده‌وڵه‌تى ناته‌ هاناى ئى مه‌ردم كووچ وه‌پیكریاگه‌و رژیم دیكتاتۆرى و بى به‌زه‌یى گشت ماڵ و موڵكه‌یلیان زه‌فت كردو كرده‌ى دیارى داروده‌سه‌گه‌ى خوه‌ى. كورد فه‌یلى هیمان ته‌ز شه‌كه‌تى و ده‌روه‌ده‌رى ئامیته‌ى ژیان رووژانه‌یه‌و له‌ حه‌سره‌ت كاڵ و نائومیدى ژیه‌ید.

 

له‌ 1 نیسان 1980 ، داڵگ و باوگ له‌ روڵه‌و، برا له‌برا جیاوه‌ كریا، به‌شیگ له‌ غوربه‌ت موور به‌ختى چڕین و به‌شیگ له‌ زیندان بى سه‌رووشوون كریان و له‌ قه‌وه‌ره‌یل وه‌جه‌م نریان، به‌شیگیش له‌ڕى سه‌خت كووچكردن گیان له‌ده‌سدان.

 

ئه‌یه‌ جورم گه‌وراى كورده‌یل بیتاوان فه‌یلیه‌ له‌ ئاكام ئه‌و خه‌بات و خوه‌شه‌ویسى و ئنتما ئه‌را ئى نیشتمانه‌ ك ده‌س ناپاك زوڵم و سته‌مكارى جڵه‌و ده‌سڵاتى گرته‌ ده‌س و جوور دوشمن ته‌ماشاى ئى مه‌ردم ئاشتیخواز و ئارامه‌ كرد.

 

وه‌لى ئمڕوو یا سوو، هه‌ر وه‌ختیگ تر، كورد فه‌یلى هه‌ر خاوه‌ن هه‌قه‌و نه‌بایه‌د له‌و هه‌قه‌یلیه‌ ك وه‌ زوور زه‌فت كریا بیه‌به‌ش بوود، كورده‌یل فه‌یلى سه‌بردارن و ساڵه‌یل دویر ودریژیگ چه‌وه‌ڕى ئه‌وه‌ كردیان خودا هه‌قیان له‌ سه‌به‌بكار بسینید، ئه‌وه‌ بوى مل ئه‌و دیكتاتۆر سه‌به‌بكاره‌ له‌ئاه و نزاى داڵگه‌یل جگه‌ر سزیاى بویه‌ به‌ته‌و، دى نه‌مه‌ند ئه‌و رژیم سته‌مكاره‌، ئیسه‌ روڵه‌و نه‌وه‌یل تازه‌و رووشنهویره‌یل كورد فه‌یلى وه‌ یه‌كده‌نگى و یه‌كڕزى په‌نجه‌ كه‌نه‌ چه‌و ئه‌وانه‌ك نواگیرن له‌هاوردنه‌وه‌ى هه‌قه‌یلیان و نه‌خشه‌ى تازه‌یگ كیشن ئه‌را ژیان ئاینده‌و ساڕیژكردن زه‌خم قویل چه‌ن ساڵه‌ى خوه‌یان له‌ساى یه‌كماڵى و جه‌مده‌نگى.

 

جه‌ماڵ ئه‌ركه‌وازى