دیموكراسى له‌عراق شكه‌ست هاورد

شفق نيوز

  ئه‌را ماوه‌ى 10 ساڵه‌ كووتایى وه‌ رژیم خوینمژ و دیكتاتۆریه‌ت به‌عس هاتگه‌و په‌رچه‌م ئازادى و دیموكراسى باڵ كیشاسه‌ بان وڵاته‌گه‌، ك یه‌یش وه‌خت كه‌میگ نیه‌ ئه‌را وه‌رپرسه‌یل عراق ئه‌گه‌ر وه‌ڕاسى و له‌نیه‌ت پاكه‌و مه‌یل خزمه‌تگوزراى و به‌رژه‌وه‌ندى گشتى و ئاشتى و سه‌قامگیرى داشتوون و تواناى ئه‌وه‌یش دیرن كووتایى وه‌جه‌نگ و مرافه‌و ده‌مه‌قاڵ ناونى خوه‌یان و حزبه‌یلیان بارنو كیشمه‌كیش دروس نه‌كه‌ن له‌بان له‌بان جڵه‌و ده‌سڵات و پله‌و پایه‌ى و به‌رژه‌وه‌ندى تایبه‌ت.

یا دوینیم ئه‌را ماوه‌ى ده‌ ساڵه‌ هه‌ر ئمڕوو سوو وه‌ى ملله‌ت عراقه‌ كه‌ن ئه‌را بنیاتناین و دابینكردن هه‌قه‌یل و داین قه‌وڵه‌یل بى بنه‌ماو هیمان ده‌رئه‌نجام نیمچه‌ خاسیگیش نه‌كه‌فته‌سه‌و، مه‌ردمیش وه‌ل ئه‌و هه‌مگه‌ مه‌ترسى و ته‌قینه‌وه‌و كاره‌ساته‌ ك ڕووژانه‌ ڕوى ئه‌یاد، هیمان ئه‌زره‌تمه‌ن و چه‌وه‌ڕى ئه‌وه‌ كه‌ن حكوومه‌ت خزمه‌تكاریگ جواو خواسته‌یلیان بیه‌یدو كووتایى وه‌ كیشه‌و گرفته‌یلیان باید ، وه‌لى له‌یوا دیاره‌ ئى جووره‌ حكوومه‌تیگ بایه‌سه‌ وه‌ مه‌یل و مه‌رام و ده‌خاڵه‌ت ده‌ره‌كى ره‌فتار ئه‌كاو هویرى نیه‌لاى به‌رژه‌وه‌ندى ملله‌ته‌گه‌ى.

بیگومان ئیمه‌ حاشا له‌وه‌ ناكه‌یم ك ده‌س ده‌ره‌كى نه‌خش كاریگه‌ر له‌دروسكردن كیشه‌و گرفت ناونى عراقیه‌یل دیرید و بویه‌سه‌ هووكار ناسه‌قامگیرى بار وڵات، چوینكه‌ له‌ هه‌ر له‌ بنه‌ڕه‌ته‌و سه‌رهه‌ڵداین ترۆر و ترۆریسته‌یل له‌ وڵاته‌یل ده‌وروه‌ر عراقه‌و شار و شاروچگه‌یل عراقى گرتنه‌ ئامانج و هاتنه‌ ناو ئى خاك پیرووزه‌، وه‌لى له‌هه‌مان وه‌خت خود وه‌رپرسه‌یل و سه‌ركرده‌یل عراقیش نه‌خش فیشتریگ دیرن له‌و كیشمه‌كیش و ناكوكیه‌یله‌ ك ڕووژانه‌ كه‌فیده‌ وه‌رچه‌و .

هه‌ر له‌وه‌ر ئه‌وه‌یش دوینیم ك پرووسه‌ى دیموكراسى له‌ عراق شكه‌ست هاورد و پیشكه‌فتن خاسیگ وه‌ده‌س ناوریا له‌ساى ئى دیموكراسیه‌ت عراق تازه‌، چوینكه‌ ئه‌وان تویه‌نستن وه‌گشتیانه‌و به‌رژه‌وه‌ندى ملله‌ت له‌وه‌رچه‌و بگردیان وه‌رجه‌ به‌رژه‌وه‌ندیه‌یل وه‌رته‌نگ خوه‌یان، وه‌لى بیگومان ئى كاره‌ سته‌مه‌ ئه‌ڕایان و ناخوازن سه‌ر ئه‌را ئیراده‌ى ملله‌ت بچه‌منن.

عه‌لى گه‌رمیانى

ج . أ