نوێنه‌ره‌یل: جیوه‌جیكردن مادده‌ى 140 چاره‌سه‌ركردن كێشه‌یل مسۆگه‌ر ئه‌كا

شفق نيوز

حكوومه‌ت ناوه‌ندى و حكوومه‌ت هه‌رێم كوردستان وجوود داشتوود ئه‌را مقه‌یه‌تیكردن ئارامى و ئاسایش و سه‌قامگیرى ناوچه‌یل جیناكووكى له‌ شوون خودكیشان هێزه‌یل ئه‌مریكا له‌ عیراق له‌ كووتایى ئى ساڵ حازریه‌.

نوێنه‌ر ئئتلاف فراكسیۆنه‌یل كوردستانى فه‌رهاد ڕه‌سوول له‌ قسه‌یلى ئه‌را شه‌فه‌ق له‌ى باوه‌ته‌ وت ك:" بایه‌ته‌ هاوكارییگ له‌ ناوبه‌ین حكوومه‌ت ناوه‌ندى و حكوومه‌ت هه‌رێم كوردستان وجوود داشتوود وه‌خاتر چاره‌سه‌ركردن ئه‌و كێشه‌یل گیرخواردیه‌ له‌ ناوچه‌یل جیناكووكى وه‌رجله‌ خودكیشان هێزه‌یل ئه‌مریكا"، و ئه‌وه‌یشه‌ ڕووشنه‌وكرد ك:"هه‌ڵه‌په‌ڵه‌كردن له‌ جیوه‌جیكردن مادده‌ى 140 ده‌ستوور ئه‌و كێشه‌یل گیرخواردیه‌ چاره‌سه‌ر ئه‌كا".

له‌بان ئه‌وه‌یشه‌ جه‌ختكرد ك:"جیوه‌جیكردن مادده‌ى 140 ده‌ستوور یه‌كیگه‌ له‌ بڕگه‌یل ڕیككه‌فتننامه‌یل ئمزاكریاى له‌ناوبه‌ین فراكسیۆنه‌یل سیاسى له‌ چوارچیوه‌ى ده‌سپیشخه‌ریه‌گه‌ى هه‌ولێر و له‌ مه‌رجه‌یل وه‌ره‌قه‌ى گفتوگووكردن ئئتلاف فراكسیۆنه‌یل كوردستانى، و هویچ فراكسیۆنیگ ئه‌راى نیه‌ ك بازگه‌شته‌و بوود له‌ پراكتیزه‌كردنى و جیوه‌جیكردن بڕگه‌یلى". ره‌سوول ئاماژه‌ وه‌وه‌یشدا ك :"ئه‌و ناوچه‌یله‌ ك ناویان نریاس جیناكووكى ناوچه‌یلیگن ڕژیم وه‌رین له‌ هه‌رێم كوردستان داوڕیه‌سه‌یان و هه‌ر لایه‌نیگ مكوڕ بوود له‌بان ناوناینیان وه‌ ناوچه‌یل جیناكووكى بووده‌ ته‌واوكه‌ر ئه‌و كرده‌وه‌یله‌ ك ڕژیم وه‌رین ئه‌نجامیاندا".

له‌ لاى خوه‌یه‌و نوێنه‌ر ناهیده‌ داینى له‌ لیست عیراقیه‌ له‌ قسه‌یلى ئه‌را شه‌فه‌ق وت ك:"لایه‌نه‌یل سیاسى ئه‌گه‌ر ریككه‌فتن له‌بان چاره‌سه‌ركردن كێشه‌یل ناوچه‌یل جیناكووكى دى هه‌وه‌جه‌ وه‌وه‌ نیه‌مینى ك هێزه‌یل ناوده‌وڵه‌تى له‌یرا بمینن، چوینكه‌ هێزه‌یل عیراقى له‌گشتلایگ زیاتر هووڵیانه‌ ئه‌را مقه‌یه‌تى كردن ئارامى و سه‌قامگیرى وڵات".

ئه‌وه‌یشه‌ ئاشكراكرد ك:"كێشه‌گه‌ ها ئه‌ورا ك ته‌وافقیگ نیه‌ له‌ ناوبه‌ین كورد و عه‌ره‌ب له‌و ناوچه‌یله‌ له‌ باوه‌ت ئه‌وه‌ ك ده‌سڵات و وه‌ده‌س كیه‌و بوود، چوینكه‌ عه‌ره‌ب قه‌بوول نیه‌كه‌ن وه‌ده‌س پێشمه‌رگه‌وه‌ بوود و كوردیش وه‌ ئه‌وه‌زى ئه‌وه‌ رازى نیه‌ون"، و ئاماژه‌یش وه‌ چاره‌سه‌ركردن ئى كێشه‌ دا ك:"بایه‌ته‌ هێزه‌یلیگ هاوبه‌ش له‌ هه‌ردوگلا وجوود داشتوود تا ئه‌و وه‌خته‌گ كێشه‌یل گیرخواردى له‌و ناوچه‌یله‌ چاره‌سه‌ر كریه‌ن".

و ئه‌وه‌یشه‌ ڕووشنه‌وكرد ك:"ئه‌گه‌ر ڕیككه‌فتنیگ پیشنه‌هات له‌ناوبه‌ین حكوومه‌ت ناوه‌ندى و حكوومه‌ت هه‌رێم كوردستان ئه‌را مقه‌یه‌تى كردن ئارامى و ئاسایش ناوچه‌یل جیناكووكى، بى گومان ڕایگ تر پیش تیه‌ید له‌باوه‌ت مه‌نین هێزه‌یل ناوده‌وڵه‌تى یا نه‌مه‌ننیان". و له‌بان ئه‌وه‌یشه‌ جه‌ختكرد ك:"لیست عیراقیه‌ هاوه‌ل جیوه‌جیكردن ماده‌یل 140 و 142 له‌ ده‌ستوور عیراق".

شایان وتنه‌ ك ماده‌ى 140 ده‌ستوور ده‌ق ئه‌وه‌ هاتى ك ئاسایى كردن و ئامارگشتى و ڕاپرسى گشتى له‌ كه‌ركووك و ناوچه‌یل جیناكووكى تر ئه‌نجام بدریه‌ید و ئه‌وه‌گ هاووڵاتیه‌یل توانه‌ى دیارى بكریه‌ید له‌ ئازادى دیاریكردن چاره‌نویسى وه‌ مه‌نینى له‌ چوارچیوه‌ى یه‌كه‌یگ ئیدارى سه‌روه‌خوه‌ى یا گه‌ر ئه‌وه‌سه‌ بخریه‌یده‌ بان هه‌رێم كوردستان عیراق.

ئه‌وه‌یشه‌ بایه‌ته‌ وه‌هویرباریه‌ید ك نوێنه‌ر ئه‌میندار گشتى نه‌ته‌وه‌یل یه‌كگرتى له‌ عیراق ئه‌د میلكه‌رت له‌ كۆنفرانسیگ ڕووژنامه‌نویسى له‌ ڕووژ چوارشه‌ممه‌ى وه‌رین له‌ باره‌گاى پارێزگاى كه‌ركووك له‌بان گرنگى وه‌رده‌وامبوین وجوود ئه‌و هێزه‌یل هاوبه‌شه‌ جه‌ختكرد ك له‌ ناوچه‌یل جیناكووكى كاركه‌ن ئه‌را مقه‌یه‌تیكردن ئارامى و ئاسایشیان وه‌ ڕیككه‌فتنیگ هاوبه‌ش له‌ناوبه‌ین حكوومه‌ت ناوه‌ندى و حكوومه‌ت هه‌رێم كوردستان.