هه‌ڵوژاردن.. سویر و كه‌رنه‌ڤاڵ دیموكراسى وڵات

شفق نيوز

پرووسه‌ى هه‌ڵوژاردن له‌گشت وڵاتیگ رووژیگ تاریخى و كه‌رنه‌ڤاڵ و بوونه‌یگ نیشتمانى گشت پیكهاته‌یل سیاسى و كوومه‌ڵایه‌تیه‌، ك جوور رووژیگ تاریخى ته‌ماشاى ئه‌كه‌ن، چوینكه‌ له‌و رووژه‌ ئیراده‌ى خواست ملله‌ت له‌ڕى پیاده‌كردن هه‌قیگ دیموكرسیانه‌ى خوه‌ى ك ئه‌ویش هه‌ڵوژاردنه‌ وه‌رجه‌سه‌ بوود، ك وه‌به‌شداریكردن و ده‌نگ خوه‌ى ئه‌تویه‌نید ئاڵشتكارى له‌ ده‌سڵات بكاو دویاخریش ئاڵشتكارى و خاسسازى له‌ دام و ده‌زگایه‌یل وڵات باریده‌ وجوود.

دیارده‌و ده‌ركه‌فتنه‌یل سیاسى له‌وه‌ختیگ ك وه‌ ریڕه‌ویگ دیموكراسیانه‌ بوونه‌ پرووسه‌یگ باوه‌تى و جیوه‌جیكارى، پرسیار جدیاجیا له‌لیان ئه‌كه‌فیده‌و، هه‌ڵبه‌ته‌ هه‌ڵوژاردنیش جوور یه‌كیگ له‌ بنه‌مایه‌یل دیموكراسى له‌ى وه‌خته‌یله‌ بویه‌سه‌ ئه‌و دیارده‌ ك مه‌ردم وه‌ گشت چین و لایه‌نه‌یل جیاجیا چاره‌نویسیان په‌یوه‌سه‌ وه‌پیه‌و، چوینكه‌ به‌رنامه‌ى تازه‌ ئه‌را ژیان سیاسى و ئابوورى و كوومه‌ڵایه‌تى خوه‌یان له‌ى هه‌ڵوژاردنه‌ به‌رنامه‌ڕیژ ئه‌كه‌ن.

سه‌ركه‌فتن پرووسه‌ى هه‌ڵوژاردن ئیجاره‌ له‌ یه‌كه‌مین رووژ ده‌سوه‌پیكردن پاییز ك له‌ ریككه‌فت 21-9-2013 ئه‌نجام دریه‌ید، تاڕاده‌ فریه‌یگ پشت وه‌ ئاست هوشیارى و هاوكارى و به‌شداریكردن هاووڵاتیه‌یل كوردستان به‌سید، هه‌ڵوژاردن ئیجاره‌ى ئه‌نجوومه‌ن نیشتمانى كوردستان"په‌رله‌مان" هسیار و چاره‌نویسسازه‌، چوینكه‌ ریڕه‌و سستم حوكمڕانى له‌ چوارچیوه‌ى ره‌شنویس ده‌ستوور هه‌رێم دیارى ئه‌كا ك سپاریاگه‌ وه‌ په‌رله‌مان ئاینده‌، له‌لایگ تریشه‌و گامیگ گه‌وراى شارستانیه‌ له‌ پیشخستن ره‌وڕه‌وه‌ى دیموكراسى و ره‌سین وه‌ كاروان شارستانیه‌ت ملله‌ته‌یل جه‌هان، هه‌ر له‌وه‌ر ئه‌وه‌یش ئه‌رك مه‌ردم كوردستان ئه‌وه‌سه‌ وه‌ هوشیاریه‌و بنوڕنه‌ ئه‌و ئه‌رك پیرووزه‌ ك ئه‌كه‌فیده‌ بان شانیان و بایه‌سه‌ له‌ بانیان به‌رژه‌وه‌ندیه‌یل خودى بخه‌نه‌ كنار و ده‌نگدانیان له‌وه‌ر خاتر به‌رژه‌وه‌ندى گشتى بوود، ئنجا له‌و دیده‌و ئه‌رك گشتمانه‌ كاریگ له‌یوا بكه‌یم دووس و دوشمن دگان بنه‌ید وه‌ دیموكراسیه‌ت و شارستانیه‌ت و هوشیارى سیاسى مه‌ردم كوردستان، هه‌ر له‌وه‌ر ئه‌وه‌یش فریه‌ گرینگه‌ جاریگ تر له‌ كه‌ش و هه‌وایگ مه‌ردمى كه‌رنه‌ڤاڵ دیموكراسى هه‌ڵوژاردنه‌یل ئه‌نجام بدریه‌یدو ده‌نگ راسكانى خوه‌مان بووده‌ ئیراده‌یگ بته‌و ئه‌را ئاڵشتكردن سستم گه‌شه‌كردن و پیشخستن ئه‌زموون حوكمڕانى له‌ كوردستان، تا روخسار گه‌ش و شارستانى و هوشیارى ملله‌ته‌گه‌مان نیشان ملله‌ته‌یل جه‌هان بیه‌یم ك ئیمه‌ ملله‌تیگ مۆدێرن و دیموكراسخواز و پیشكه‌فتگخوازیم.

بایه‌سه‌ گشت تواناو هیز خوه‌مان ئه‌را سه‌رختن ئى ئه‌زموونه‌ بخه‌یمنه‌ كار، تا ئسپاتى بكه‌یم ك ملله‌ته‌گه‌مان نه‌ك هه‌ر شایسته‌ى وه‌رچه‌رخانه‌، به‌ڵكوو شایسته‌ى ئه‌وه‌یشه‌سه‌ له‌ وه‌ڕیه‌وبردن هه‌رێمیگ گامناین وه‌ره‌و ئداره‌داین و ئداره‌كردن گشت كوردستان بگریده‌ مل، چوینكه‌ هه‌ر ملله‌تیگ بتویه‌نید له‌ناو پرووسه‌ى وه‌رچه‌رخان مه‌ده‌نى سه‌ركه‌فتگ بوود، ئه‌وه‌ بیگومان ئه‌و ملله‌ته‌ ملله‌تیگ زینگ و پیشكه‌فتگخوازه‌.

هه‌ر له‌وه‌ر ئه‌وه‌یش ئیمه‌ى ده‌نگده‌ر كورد له‌گشت ملله‌تیگ فیشتر وه‌ گیان نه‌ته‌وه‌یى و تیه‌نگیگه‌و بایه‌سه‌ ئاماده‌ بویم له‌ بنگه‌یل ده‌نگداین و بایه‌سه‌ گشتمان له‌ هه‌وڵ ئه‌وه‌ بویم له‌و پرووسه‌ى دیموكراسیه‌ سه‌ركه‌فتگ بویم نه‌ك له‌وه‌ر خاتر حزب و لایه‌نه‌یل سیاسى، به‌ڵكوو له‌ڕوى خوه‌شه‌ویسیمان ئه‌را نه‌ته‌وه‌و خاكه‌گه‌مان.

ئنجا وه‌و خاتریشه‌ بایه‌سه‌ هه‌ڵوژاردن بكه‌یمنه‌ سویر و كه‌رنه‌ڤاڵ دیموكراسى كوردستان، تا به‌رز و له‌ریاگ بوود ئاڵاى دیموكراسى و ئارامى و برایه‌تى و ته‌بایى و ژیان هاوبه‌شمان.

عه‌ونى خۆشناو

ج . أ