ره‌سانن ئيسه‌ چه‌س؟

شفق نيوز

ماناى ئه‌وه‌سه‌ ك ئيسه‌ ره‌سانن ها له‌وه‌رده‌م گوزاره‌كردن فريه‌ تازه‌يگ و دياريكردن تاريفيگ تايبه‌ت ئه‌را كه‌ناڵيگ ره‌سانن ئه‌دێده‌ يه‌كيگ له‌ ئه‌ركه‌يل خواست بار وجوود داشتگ كوردستان.وه‌رگر جوور ئه‌كته‌ر خوه‌نيار و شنه‌ويار و ديده‌وان له‌ ريه‌يل فريه‌و كه‌ناڵه‌يل جياوازه‌و هه‌واڵ وه‌پی ئه‌ڕه‌سيد، ته‌نانه‌ت ئه‌گه‌ر په‌نا ئه‌را رووژنامه‌و راديۆ و ته‌له‌فزيۆنيش نه‌وه‌يد، وه‌لی ئه‌وه‌يشا وه‌رگر ك ته‌ماشای كه‌ناڵه‌يل فه‌رمی ره‌سانن بكا بريگ چه‌وه‌ڕيكردن تايبه‌ت له‌ كه‌ناڵه‌يل وجوود ديريد، جوور:

- پشتڕاسكردنه‌وه‌ی ئه‌و هه‌واڵه‌ ك زويتر بڵاو كرياگه‌و نه‌ڕه‌سيه‌سه‌ ده‌س وه‌رگر، نه‌ك دوباره‌ كردنه‌وه‌ی هه‌مان هه‌واڵ وه‌بی هويچ به‌ڵگه‌يل ئاشكرا.

- شيه‌وكردن رويداگ و هه‌واڵه‌يل، چوينكه‌ وه‌ شيه‌وكردن هه‌واڵه‌يل، وه‌رگر ئه‌تويه‌نيد ئه‌و خه‌ته‌يل پشت ئه‌و رويداگه‌ په‌يا بكاو شيه‌وكردن مه‌نتقيانه‌يگ ئه‌رايان بكا وه‌گووره‌ی ديد و هويره‌وكردن خوه‌ی.

- تارمايى چه‌واشه‌كاريه‌يل رووشن و ئاشكرا ئه‌دێ ك كام هه‌واڵ راسه‌ يا چه‌واشه‌كاريه‌، وه‌ل ئه‌وه‌يشا مه‌هانه‌يش ئه‌را ئه‌و هه‌واڵه‌يليشه‌ په‌يا ئه‌دێ ك وه‌ شيوه‌يگ نادروس بڵاو كريانه‌.

له‌ماوه‌ی گوزه‌يشت له‌ هه‌رێم كوردستان هه‌واڵ و رويداگه‌يل فريه‌يگ وه‌ نادروس بڵاو كريان و چه‌واشه‌ كريان، هووكار فريه‌يگيش هه‌ن ئه‌را ئی مه‌سه‌له‌، وه‌لی ديارترينيان ئه‌وه‌سه‌ ك كه‌ناڵه‌يل ره‌سانن به‌شيگ بوين له‌ ئه‌جيندای سياسی لايه‌نه‌يل.       

ئمجا ئه‌ركه‌يل ره‌سانن فريه‌ن، ده‌سنيشانكردنيانيش كار فيشتريگ ئه‌خوازيد، دی گرينگتر له‌ ئه‌رك ده‌سپاكی و راسگوويی مه‌سه‌له‌ی نيازپاكيه‌، چوينكه‌ ره‌سانن هه‌واڵ وه‌شيوه‌يگ راسگوويانه‌ ئه‌رك ئه‌وه‌نه‌ قورسيگ نيه‌، وه‌لی له‌يه‌كه‌وداين و شيه‌وكردنی هه‌وه‌جه‌ وه‌ نيازيگ پاك و بيلايه‌نی ديريد، ك يه‌يش ئيسه‌ تا راده‌يگ له‌ بار ئيسه‌ی كوردستان دوينريه‌يد.

هاوار نه‌سره‌دين

ج . أ