هه‌فت ئه‌ڵڵاجه‌ویه‌گه‌ى په‌رله‌مان عراقى
راسییگ گرینگ هه‌س ك بایه‌سه ئاشكرا بكریه‌ێد له‌ى ڕویه‌و، ك ئه‌ویش ئه‌وه‌سه ئى ئه‌ڵڵاجه‌ویه‌یله دویر نیه له‌كار حكوومه‌ت عراقى وه‌رپرس له‌بان لایه‌ن جیوه‌جیكردن له‌بنیاتناین ده‌وڵه‌ت، به‌ڵكوو وجوودیش دیرێد له‌ده‌زگایه‌یل وه‌رپرس له‌بان داناین یاساو جیوه‌جیكردنى و چه‌ودیرى حكوومه‌ت و ده‌زگا جیوه‌جیكاره‌گه‌ى ك ئه‌ویش په‌رله‌مان عراقیه ك زوورم هاووڵاتیه‌یل هس وه بار گشتى ئى په‌رله‌مانه كردنه‌و ئه‌ندامه‌یلى چه وه‌رگرتنه له‌ئاكام كاره‌یلیان، هه‌ر له‌وه‌ر ئه‌وه‌یش له‌یرا باس له‌ئه‌ڵڵاجه‌ویه‌یل په‌رله‌مان عراقى كه‌یم و له‌وانه‌یش:
1- نه‌وین ته‌واو ئه‌ندامه‌یلى له‌دانیشتن!
یه‌كه‌م سفه‌ت له‌باوه‌ت په‌رله‌مان عراق ئه‌وه‌سه ك فره‌یگ له‌ئه‌ندامه‌یلى له‌وه‌خت دانیشتن ئاماده نین، له‌ى دویاخریشه فراكسیۆن ئحرار داوا له‌ئه‌نجوومه‌ن نوێنه‌ره‌یل كرد شماره‌ى ئه‌و ئه‌ندامه‌یله ئاشكرا بكا ك ئاماده‌ى دانیشتن نیه‌ون، ك له‌جه‌م 325 ئه‌ندام نزیكه‌ى 170 له‌لیان ئاماده‌ن.
2- مانگانه‌ى ئه‌ندامه‌یلى ته‌رازوى ده‌وڵه‌ت قورسه‌و كردگه!
ئه‌ندام ئه‌نجوومه‌ن نوێنه‌ره‌یل ئه‌حمه‌د چه‌له‌بى له‌دیداریگ وه‌ل رووژنامه‌ى مه‌دا ئاشكراى ئه‌وه كرد هه‌ر نوێنه‌ریگ له په‌رله‌مان 25هه‌زار دۆلار مانگانه وه‌رگرێد ك بووده 30ملیۆن دینار عراقى.
3- بڕیگ له ئه‌ندامه‌یلى تومه‌تبارن وه ترۆر!
په‌رله‌مان عراق ئیسه‌و له‌وه‌رجه ئیسه‌یش یه‌كیگه له‌و په‌رله‌مانه‌یله ده‌گمه‌نه له‌جه‌هان له‌لایه‌ن تومه‌تباركردن بڕیگ له‌ئه‌ندامه‌یلى وه ترۆر و سه‌ركردایه‌تیكردن گرووپه‌یل چه‌كدار، ك یه‌یش له‌تومبه‌تباركردن عه‌بدولناسر جه‌نابى و محه‌مه‌د داینى و مشعان جبورى و عه‌دنان دلێمى له‌په‌رله‌مان وه‌رین كه‌فته ده‌یشت، په‌رله‌مان ئیسه‌یش جوور تومه‌تباركردن سه‌لیم جبورى ك چه‌وه‌ڕى دادگا كریه‌ێد كه‌ى حسانه له‌بانى ئه‌ڵگریدو ئه‌و راسیه‌یله ئاشكرا بكا.
4- بیده‌نگى ئه‌ندامه‌یلى!
په‌رله‌مان عراقى ته‌نیا په‌رله‌مانیگه ك كه‌سایه‌تى تاك له‌تى تاویاسه‌و، وه‌ل ئه‌وه‌یشا هه‌ر ئه‌ندامیگ په‌رله‌مان له‌به‌رژه‌وه‌ندى حزب و فراكسیۆنه‌گه‌ى قسه ئه‌كاو تاڕاده‌یگ قسه‌یلى هویچ ده‌وریگ نه‌یرێدو فكره‌یگیش نه‌یرێد له‌ده‌یشت چوارچیوه‌ى حزبه‌گه‌ى و گشت چشتیگیان ها ده‌س سه‌رۆك حزبه‌یلیان.
5- زوورم ئه‌ندامه‌یلى له‌لایه‌ن ملله‌ته‌و هه‌ڵنه‌وژریانه!
په‌رله‌مان عراقى سفه‌تیگ دیرێد جیا له‌گشت په‌رله‌مانه‌یل تازه‌ى جه‌هان، ك ئه‌ویش ئه‌وه‌سه بڕیگ له‌نوێنه‌ره‌یلى بگر زوورمیانیش له‌لایه‌ن هاووڵاتیه‌یل عراقیه‌و راسه‌وخۆ هه‌ڵنه‌وژریانه‌و ده‌نگ كه‌سه‌یلیگ تر بویه چیه‌سه‌ڕا ئه‌وان.
6- جیایى و به‌شبه‌شه‌وبوین له‌ڕز ئه‌ندامه‌یلى!
ئى كاریشه له‌ناو په‌رله‌مان عراقى وه ئاشكرا دیاره له‌ره‌فتار فراكسیۆن و ئئتلافه‌یل سیاسى ك به‌شبه‌شه‌و بوینه‌و بوینه‌سه فراكسیۆنه‌یل بویچگ و جیایى خوه‌یان نیشان دانه‌و لیست رووژ وه‌رووژ لیست تازه دامه‌زرنن.
7- دویرگرتن زوورم ئه‌ندامه‌یلى له‌ملله‌ت!
هاووڵاتى عراقى هس وه ئه‌وه ناكه‌ن ئه‌ندامه‌یل په‌رله‌مان له‌لیانه‌و نزیكن، زوورمیانیش له‌ناوچه‌و شوونه‌یل دویر له‌فه‌قیره‌یل ژیه‌ن و فره‌یگیش له‌لیان له‌ناوچه‌ى سه‌وز ته‌لبه‌نكریاگ ژیه‌ن ك گشت كه‌سیگ ناتویه‌نى بچووده ئه‌و شوونه ئه‌گه‌ر باج تایبه‌ت نه‌یاشتوود.
موهه‌نه‌د حه‌بیب سه‌ماوى
ج
