ئاگر تایفه‌گه‌رى

شفق نيوز

بیگومان له‌شوون ڕمیان ئه‌و رژیم دیكتاتۆره‌ بار عراق له‌ سه‌ره‌تا تا راده‌یگ جى متمانه‌ى مه‌ردم بوى ئه‌را ئاڵشتكارى و ئه‌وه‌ بوى مه‌سه‌له‌ى هه‌ڵوژاردن ئازادانه‌ ئه‌نجام دریا له‌ 2005 و یه‌یش فیشتر دڵنیایى دا ملله‌ت عراق.

وه‌لى جى داخه‌ له‌ى ئاڵشتكاریه‌ ك خود ملله‌ت ئه‌زره‌تمه‌ن بوى ئه‌راى، گشت جووره‌ زوڵم و سته‌میگ په‌یا بوى و ته‌نانه‌ت كوشتن و بڕین و رفانن ره‌سیه‌ راده‌ى دوشمنایه‌تى ناونى پیكهاته‌یل و جه‌نگ تایفى له‌لى كه‌فته‌و، ك تائیسه‌یش ئاگر ئه‌و تایفه‌گه‌ریه‌ هه‌ر مه‌ندگه‌و جى باوه‌ڕ هویچ كه‌سیگ نیه‌ وه‌بى دابه‌شكردن وڵات بكوشیه‌یده‌و.

دیار و ئاشكراس ك ئاگر تایفه‌گه‌رى رووژ وه‌ڕووژ له‌ى عراقه‌ هه‌وه‌جه‌ وه‌ ئاگردوى فیشتر ئه‌كاو مه‌ردمان فریه‌یگیش هه‌میشه‌ هه‌وڵ گه‌رمكردنى ئه‌یه‌ن و له‌ هه‌مان وه‌خت ئه‌مریكاو هیزه‌یل تر ده‌ره‌كى هیمان تا ئیسه‌ هه‌وڵ جددى نه‌یانه‌ ئه‌را كوشاننه‌وه‌ى و سه‌قامگیركردن بار ئاسایشى و قرتاركردن ئى وڵاته‌ له‌ده‌س ریكخریاگه‌یل ترۆریستى و هه‌ر خوه‌یانیش هووكار هاوردن و سه‌رهه‌ڵداین گرووپه‌یل تونڕه‌و بوینه‌ وه‌ دریژایى چه‌ن ساڵیگ گوزه‌یشته‌.

ئیسه‌یش قه‌ده‌ر له‌یوا كردگه‌ ك ملله‌ت چه‌وه‌ڕى چاره‌نویس و ئاقبه‌ت ئى بار سه‌خته‌ بكا تا بزانید چه‌نیگ تر دریژه‌ دیرید و عراق كه‌ى قورتار ئه‌دێد له‌ى جه‌نگ و كیشمه‌كیش تایفى و ده‌خاڵه‌ت ده‌ركى و به‌دبه‌ختیه‌، ك یه‌یش ئومید گشت هاووڵاتییگ عراقیه‌ له‌ساى ئاسووده‌یى و سه‌رفرازى بژیه‌ید.

رزگار فه‌ريد

ج . أ