داستان برقی به‌گ له‌بارزان

شفق نيوز

موهميگ له‌كوومه‌ڵگای ئنسانی داگيركردنه‌و بوينه‌سه‌ به‌شيگ دانه‌وڕياگ و جيانه‌كرياگ له‌سروشت ئاده‌ميزاد وه‌جووريگ ك وه‌ل سروشت ئاده‌ميزادا تيكه‌ڵ يه‌كتری بوينه‌ . ئمجا ئه‌وه‌ك له‌گشتيانيش موهمتر مايه‌ی ئه‌هميه‌ت ئاده‌ميزاده‌يل بويه‌ ئه‌وانه‌ك تام ژيرده‌سی و داگيركاری كردنه‌و هه‌وڵ ئه‌وه‌ درياگه‌ مه‌ردمانيگ تر وه‌ك خزمه‌تكار قانجاز له‌ليان بكريه‌يگ و له‌وه‌رانوه‌ر ئه‌وه‌يش هه‌وڵ و هوير رزگاری و ئازادی و ره‌ته‌وكردن زوڵم و زوورداری شان وه‌ شان داگيركردن په‌يا بوی و بوينه‌ دو چه‌مك و هيز وه‌رانوه‌ر و دژ وه‌يه‌كتری وه‌جووريگ ك له‌ هويچ وه‌خت و سه‌عاتيگ و له‌هويچ وه‌زعيگ ئه‌گه‌ر يا ئحتمال وه‌يه‌كه‌وه‌ گونجيان و ژيانيان هاوبه‌شيان مه‌حاڵه‌ .

كورد يه‌كيگه‌ له‌و ملله‌ت و نه‌ته‌وه‌يله‌ ك فره‌ترين ناڕه‌حه‌تی و ژيرده‌سه‌يی كيشاگه‌و فره‌ترين به‌دبه‌ختی له‌وه‌ر خاتر ئازادی و رزگاری ديه‌ . له‌ماوه‌يگ دويرودريژ تاريخه‌وه‌ كيشمه‌كيشيگ سه‌خت و خويناوی له‌ناونی ئه‌و دو چه‌مكه‌ رويداگه‌ ك وه‌ هه‌زاره‌ها قوربانی و كاوڵكردن و گرتنه‌وه‌ر سياسه‌ت چه‌فت و بی سه‌روشوونكردن ده‌يه‌ها هه‌زار كه‌س و له‌ناوبردن كه‌سايه‌تی مليۆنه‌ها ئاده‌ميزاد ئه‌نجام ئه‌و كيشمه‌كيشه‌ بويه‌ ك له‌تاريخ كويه‌نيگه‌وه‌ تا ئيسه‌يش هه‌ر وه‌رده‌وامه‌و دريژه‌ ديريگ و چه‌نه‌ها راپه‌ڕين و شووڕش و كه‌سايه‌تی كورد له‌ قوناغه‌يل جياجياو هه‌ر وه‌ناو جيايايش سه‌ركردايه‌تيكردن كورد له‌وه‌ڕيه‌وبردن ئی كيشمه‌كيشه‌ گرتنه‌سه‌ ده‌س و گشتيانيش له‌شوون ماوه‌يگ يا چه‌ن ساڵيگ فه‌وتيانه‌ ك وه‌داخه‌وه‌ كورد خوه‌يشی ده‌وريگ گه‌وراو كاريگه‌ر و بته‌ويگ ديه‌ له‌ فه‌وتيان شووڕش و ده‌سكه‌فته‌يلی و ئه‌وه‌نه‌ خوه‌ی زه‌ره‌د ره‌سانه‌سه‌ كيشه‌گه‌ی خوه‌ی ئه‌وه‌نه‌ دوشنه‌يل زه‌ره‌د وه‌پی نه‌ڕه‌ساننه‌ ، وه‌لی ئه‌وه‌ك ئوميد داسه‌ ئاده‌ميزاد كورد ئه‌ويش وجوود ئيراده‌ی بته‌ويگه‌ له‌وه‌رخاتر ژيانيگ سه‌رفراز و ئازاد . هه‌ر ئه‌و ئيراده‌ی بته‌وه‌ فاكته‌ر مه‌ندنه‌وه‌ی ئاده‌ميزاد كورد بويه‌ ك هه‌ميشه‌ وه‌ك بڵيزه‌ی ئاگريگ بويه‌ ، وه‌ل ئه‌وه‌يشا يه‌كيگ له‌و راپه‌ڕين وشووڕشه‌يل رزگاريخواز كورد شووڕش يه‌كم بارزانه‌ له‌ساڵ ١٩٣١ زياتر وه‌ داستان جه‌نگ (برقی به‌گ) وه‌ناوبانگه‌ ، ك هه‌رچه‌نی (برقی به‌گ) له‌ كه‌سه‌يل هيزه‌يل نواين سه‌ركوتكردن و له‌ناوبردن جموجويل نه‌ته‌وايه‌تی و نيشتمانی بارزانيه‌يل بويه‌و داستانه‌گه‌يش زياتر وه‌ناو تاكه‌ كه‌سه‌وه‌ ناوبانگ ده‌ركردگه‌ ، وه‌لی له‌ڕاسی ئه‌يه‌ گه‌له‌كوومه‌يگ هه‌ريمی و ناوده‌وڵه‌تی بوی له‌وه‌رخاتر كووتاييهاوردن وه‌و راپه‌ڕين كورده‌ له‌و ناوچه‌ ، بيجگه‌ ئه‌وه‌يش هه‌رچه‌نی (برقی به‌گ)و هاوكار و هاوپه‌يمان و دووسه‌يلی تويه‌نستن ئه‌را ماوه‌ی كه‌ميگ شكه‌ست وه‌و جموجويل ئازاديخوازه‌ بارن ، وه‌لی هويچ وه‌ختيگ نه‌تويه‌نستن هوير ئازادی و هس نه‌ته‌وه‌يی و نيشتمانی له‌سه‌ركرده‌و شووڕشكاره‌يل به‌شداربوی بسيننه‌وه‌و له‌ناوی بووه‌ن و ناچاريان بكه‌ن واز له‌ هه‌ق و مه‌سه‌له‌ ره‌واگه‌يان بارن ، ئه‌وه‌ بوی  نه‌تويه‌نريا وه‌يه‌كجاری ئاگر پشتن به‌سانن وه‌ملله‌ت بكوشننه‌وه‌ و داستان برقی به‌گ له‌ ٩ / ١٢ / ١٩٣١ ئه‌و راسيه‌ ئسپات كرد ك ئيراده‌ی ملله‌تيگ ژيرده‌سه‌ له‌وه‌رخاتر ئازادی و ژيانيگ سه‌رفراز گه‌وراتره‌ له‌هيز سه‌ربازی و ته‌كنۆلۆجيای داگيركردن وڵات و ملله‌تيگ . ئمجا داستان برقی به‌گ له‌لايگه‌وه‌ لاپه‌ڕه‌يگ ته‌ڵايی تر خسته‌ بان لاپه‌ڕه‌يل پڕ له‌سه‌ربه‌رزی جموجويل رزگاری كوردستان و له‌لايگ تريشه‌وه‌ روح تازه‌يگ به‌خشا ملله‌ت كورد ، هه‌ر له‌وه‌ر ئه‌وه‌يش داستان برقی به‌گ كيشمه‌كيش بوی له‌ناونی هوير داگيركردن و رزگاری ك له‌شوون ٧٨ ساڵ ئه‌وه‌سه‌ ئيسه‌ ناوچه‌ی داستانه‌گه‌ ئه‌زموونيگ ئازادی و ديموكراتی په‌يڕه‌و ئه‌كا .