عه‌لى غه‌ربى... شاریگ تر فه‌یلى نشین ته‌عریبكریاى

شفق نيوز

خوه‌رهه‌ڵات عراق، نزیك مه‌رز ئیرانه‌و كه‌فێده‌ دویرى 110 كیلۆمه‌ترى شار عماره‌، له‌ ساڵ(270ك)دامه‌زریاگه‌و تا كووتایى سه‌ده‌ى هه‌یشت زایینى هه‌ر وه‌(مه‌نسووره‌)ناو ده‌ركردوید. تاریخ ئى قه‌زا چووده‌و ئه‌را ئه‌و مه‌زارگه‌ ك له‌تى دروس كریاگه‌ ئه‌را(ئه‌بولحه‌سه‌ن عه‌لى كوڕ ئه‌حمه‌د كوڕ محه‌مه‌د كوڕ حسێن كوڕ عیسا كوڕ زه‌ید كوڕ عه‌لى كوڕ محه‌مه‌د كوڕ عه‌بدوڵڵا جه‌عفه‌ر كوڕ محه‌مه‌د كوڕ زه‌ید كوڕ عه‌لى كوڕ حسێن كوڕ عه‌لى كوڕ ئه‌بو تالب) سڵام خودا له‌لیان، ك له‌ى شوونه‌ شه‌هید كریا له‌ دیم خوه‌رئاواى ئاو دجله‌ وه‌ دویرى یه‌ك كیلۆمه‌تر له‌ مه‌ركه‌ز قه‌زاگه‌، له‌و مه‌زاره‌ وه‌خاك سپاریا.

زوورم مه‌ردم شار عه‌لى غه‌ربى ئه‌وسا پێكهاتوید له‌ كورده‌یل فه‌یلى و شماره‌ى كه‌میگ له‌عه‌ره‌ب، وه‌لى ئه‌وه‌ بوى رژیم به‌عس له‌وه‌ختیگ ده‌سڵات گرته‌ ده‌س جویر هه‌ر شاریگ تر فه‌یلى نشین ده‌سكرده‌ ده‌ركردن فه‌یلیه‌یل له‌ى شاره‌، ك ئه‌ویش له‌وه‌ر سیاسه‌ت وه‌ عه‌ره‌بكردن له‌لایه‌ن ئه‌و رژیم دكتاتۆره‌ ك وه‌ ئاشكرا زوڵم فره‌یگ له‌ كورده‌یل وه‌گشتى و كورده‌یل فه‌یلى وه‌تایبه‌ت كردیاد، ئمجا وه‌ مه‌هانه‌ى ته‌به‌عیه‌ى ئیرانى ئه‌و كورده‌یله‌ ك نیشته‌جى ره‌سه‌ن ئه‌و شاره‌ بوین ده‌سكردنه‌ كووچ وه‌پیكردنیان و له‌مال َو موڵك خوه‌یان ناهمیان كردن و ئاواره‌ى ئیرانیان كردن.

كورده‌یل عه‌لى غه‌ربى په‌یوه‌ندى بته‌ویگ وه‌ل پێكهاته‌یل تر نیشته‌جى شاره‌گه‌ دیرن جویر هووزه‌یل(به‌نى لام، كنانه‌، به‌نى كه‌عه‌ب، عه‌تابه‌و هووزه‌یل دلفى...هتد)، تویه‌نیم بویشیم ئه‌و شاره‌ له‌سه‌رده‌م كویه‌ن شاریگ كوردى بویه‌و تام كورده‌وارى وه‌پیه‌و بویه‌، وه‌لى ئه‌ویش جویر شاره‌یل تر كوردنشین، بیبه‌ش نه‌ویه‌ له‌ داگیركارى و سیاسه‌ت ته‌عریب و كه‌مه‌وكردن شماره‌ى كورده‌یل له‌تى. سه‌ره‌تاى ده‌ركردن شماره‌ى فره‌یگ له‌ كورده‌یل فه‌یلى له‌و شاره‌ له‌لایه‌ن رژیم به‌عس، چووده‌و ئه‌را ساڵ 1972. له‌شوون ئه‌وه‌ دى هووزه‌یل عه‌ره‌ب له‌و ناوچه‌ زیاتره‌و بوین.

قه‌زاى عه‌لى غه‌ربى له‌سه‌رده‌م كویه‌نیش وه‌پى وتیان خاك سیه‌، ك له‌بان ئه‌و خاكه‌ جه‌نگه‌یل فره‌یگ ڕویدا جوور: شوڕش زه‌نج له‌ سه‌رده‌م(موفق بالله)عه‌باسى و جه‌نگه‌یل تر وه‌رجه‌ ئه‌وه‌و دویاى ئه‌وه‌یش، ك ئى خاكه‌ هه‌میشه‌ پڕ له‌پیت و به‌ره‌كه‌ت بویه‌و سه‌رچه‌وه‌ى نه‌فتى فره‌یگ له‌تى وجوود دیرێ .

ژیان كویه‌ن هووز و پێكهاته‌یل ئى شاره‌ پڕ ئاشتى و هاوبه‌شى بویه‌، هویچ وه‌ختیگ كیشه‌یگ له‌ناونى مه‌ردمه‌گه‌ى ڕوى نه‌یاگه‌ وه‌ جووریگ ئه‌یاكه‌ دڵ ئه‌واكه‌ بڕه‌نجنێد، كورده‌یل فه‌یلى له‌ مه‌ردمان نیشته‌جى ره‌سه‌ن ئى شار كوردنشینه‌ بوین، وه‌لى وه‌ گووره‌ى رووژگار ده‌س قه‌ده‌ر ره‌سیه‌ پیان و ده‌روه‌ده‌ر و ئاواره‌یان كرد و له‌ماڵ و موڵك و زێد و ماواى خوه‌یان دویریانه‌و خست وه‌ره‌و ڕى نه‌هامه‌تى و به‌دبه‌ختى.