ئاهه‌نگسازی بكه‌ن ئيوه‌ ماف خوه‌دانه‌

شفق نيوز

 

جوور ئه‌وه‌ك پيشبينی ئه‌كريه‌يد، دويای ده‌نگداين و جياكردنه‌وه‌ی ده‌نگه‌يل، هاوپه‌يمانی ساز ئه‌كريه‌يد ئه‌را دامه‌زرانن حكوومه‌ت له‌بان هه‌مان بنه‌مای پيشبينيكرياگ، ك يه‌يش خه‌رج فريه‌يگ ديريد له‌ڕوی وه‌خت و هه‌وڵ و دارايی و دوياخريش وه‌ی بار ئيسه‌ كووتايی وه‌پی ئه‌ياد، چوينكه‌ چوو جادووگه‌رييگ نيه‌ ئه‌را چاره‌سه‌ر بنه‌ڕه‌تی و هه‌ڵه‌په‌ڵه‌يگ ئه‌را كيشه‌يل عراق.

ئه‌گه‌ر هات و له‌ی هه‌ڵوژاردنه‌يله‌ وه‌ په‌نجه‌ی راس يا چه‌پ به‌شداری بكه‌يم و ئاماژه‌ وه‌ شماره‌ی لايه‌نيگ يا كانديدكرياگيگ كرديم، بايه‌سه‌ بزانيم ك گرفته‌يليگ هه‌ن له‌وه‌رده‌م كانديد ژار و كز له‌وه‌رانوه‌ر كانديد بته‌و و پشتگيركرياگ، وه‌لی ده‌سكه‌فت گه‌ورا له‌ هه‌ر پرووسه‌يگ هه‌ڵوژاردن ئاڵشتكردن روخسار دريغيكه‌ره‌يل و گه‌ناته‌كاره‌يله‌ وه‌ل ئاڵشتكردن ريڕه‌و نادروس ئداره‌ی وڵات.

ديد من ئه‌وه‌سه‌ ك ئيمه‌ی كورده‌يل فه‌يلی مه‌ترسی سه‌رنه‌كه‌فتن كانديده‌يلمان ديريم وه‌ بوونه‌ی ئه‌زموونه‌يل وه‌رين، ك ئه‌ويش مه‌ترسی راس و دروسيگه‌، وه‌لی بايه‌سه‌ له‌بانمان ئه‌وه‌ له‌ هوير نه‌وه‌يم ك مه‌ترسی كه‌سه‌يل تر وه‌ بوونه‌ی پله‌و پۆستيان له‌ ده‌سڵات و كوومه‌ڵگاو بار كه‌سايه‌تييان جوور خاوه‌ن بڕيار، فريه‌ فيشتره‌.

ئمجا ئيمه‌ به‌ش خوه‌مان زه‌ره‌د دايمنه‌و هه‌ر ده‌سكه‌فت و پيشكه‌فتن تازه‌يگيش وه‌ هه‌ر شيوه‌و ئاستيگ، هه‌ر سه‌ركه‌فتنه‌ ئه‌رامان، وه‌لی لايه‌نه‌يليگ هه‌ن هووكاره‌ی ئه‌وه‌ بوينه‌ هه‌ميشه‌ سه‌ركه‌فتگ بوون، هه‌ر وه‌و خاتريشه‌ دوينيد هه‌ر داوه‌زينيگ له‌ ريژه‌ی وه‌ده‌سهاوردن ده‌نگ جوور زه‌ره‌د گه‌ورايگه‌و ئه‌و لايه‌نه‌يله‌ له‌ ئه‌زه‌رت و ئمتيازاتی له‌ ده‌سڵات و دارايی دويره‌و ئه‌خا.

هه‌ر له‌وه‌ر ئه‌وه‌يش كورده‌يل فه‌يلی هه‌ر له‌ ئيسه‌و ئاهه‌نگ وه‌ به‌شداريكردنيان ساز بكه‌ن له‌ی پرووسه‌ی ديموكراسيه‌، چوينكه‌ ئه‌يه‌ جوور مه‌شق مافيگ سروشتيه‌ ئه‌رامان و ئه‌زموونيگ تره‌ ئه‌را هه‌ڵوژاردنه‌يل ئاينده‌و شايه‌ت له‌ هاوكيشه‌ی هيزه‌يل ئاڵشت بكا وه‌ گووره‌ی ده‌سكه‌فته‌يل تر، نه‌ك جوور ئه‌وه‌گ له‌بانی راهاتيم و ره‌واجه‌ له‌ جاده‌ی عراقی.

عه‌لی حسێن فه‌يلی

ج . أ