ئه‌راچه‌ كورد دڵنيا نيه‌ له‌عراق تازه‌ ؟

شفق نيوز

هاته‌سه‌ بانی تويه‌نيم جووريگ تاريف ئه‌رای بكه‌يم له‌ڕوی گوزه‌يشته‌ی و سه‌ختيشه‌ له‌وه‌ختيگ بتوايم له‌مه‌عناو شووناسنامه‌ی عراق تازه‌ بڕه‌سيمنه‌وه‌ . يه‌يش له‌يوا كردگه‌ له‌ هوير تاك كورد ره‌سمه‌يل عراق جووراو جوور بوون و نه‌تويه‌نريه‌يگ فۆرم جيگيريگ وه‌ربگريگ ، وه‌ل ئه‌وه‌يشا كارسات گه‌ورايگيشه‌ ئاده‌ميزاد نه‌تويه‌نيگ وه‌ ته‌واوی له‌ مه‌عنايه‌يل وڵاته‌گه‌ی بڕه‌سيگه‌وه‌ .

ئاسته‌يل هويره‌وكردن تاك عراقی ئه‌گه‌ر تا راده‌يگ مايه‌ی قسه‌ له‌بانكردنيگ جددی نه‌وين ، ئه‌وه‌ بيگومان دو هووكار ديريگ له‌ دو وه‌خت جياواز .

يه‌كميان : تاريخ حزب به‌عس له‌ ساڵه‌يل شه‌س سه‌ده‌ی گوزه‌يشته‌وه‌ تا ساڵ (٢٠٠٣) وه‌ ئه‌وه‌ك تاريخيگه‌ بايه‌سه‌ بووگه‌ مادده‌ی خام سه‌ده‌ها نويسانن و به‌حس و ده‌سكه‌فتنيگ ده‌رئه‌نجامه‌يليگ نه‌فبه‌خش وه‌ك زه‌مه‌ن . ئمجا ئه‌گه‌ر بايگ و وه‌ك هويره‌وكردن و تۆتاليتاری يا شمووليه‌ت له‌سستم سياسی مه‌يل بخه‌يده‌ لای ، ئه‌وه‌ حوكم دكتاتۆريانه‌ ك عراق شايه‌ت ساڵه‌يل فره‌يگيه‌ بايه‌سه‌ فره‌ وه‌جوانی و هويرده‌ييه‌وه‌ قسه‌ له‌باره‌يه‌وه‌ بكريه‌يگ . هه‌ر وه‌ك ده‌رئه‌نجامه‌يل ئی سياسه‌ت و سستم و حوكمڕانيه‌ له‌ماوه‌ی نزيكه‌ی چل ساڵيگ شايسته‌ی ئه‌وه‌سه‌ هوير بخريه‌يگه‌ لای وه‌ ئه‌وه‌ك بويه‌سه‌ هووكار ئه‌وه‌ك هاووڵاتی عراقی بيبه‌ش بووگ له‌وه‌ك وه‌پی ئويشريه‌يگ ئنتماو شووناسنامه‌و هه‌ق هاووڵاتيبوين .

دويميانيش : له‌ ٩ / ٤ / ٢٠٠٣ ك رووژ رزگاری عراقه‌ له‌ حوكم حزب به‌عس و دكتاتۆره‌يل شارياگ تر ده‌سكه‌يگه‌پی ، ئمجا يه‌يش سه‌ره‌تاگه‌ی دياره‌ ، وه‌لی كووتاييگ بيجگه‌ له‌ سرنج و ئشاره‌و پيشبينی نه‌وگ نيه‌تويه‌نريه‌يگ چشت تر له‌باره‌يه‌وه‌ ئاشكرا بكريه‌يگ ، چوينكه‌ له‌ماوی شه‌ش ساڵ گوزه‌يشت ره‌سميگ ته‌واو جياواز نه‌كه‌فته‌سه‌ وه‌رچه‌ومان ك مايه‌يی گه‌شبينی يا ته‌فائول خاسيگ بووگ .

له‌يراوه‌ هاووڵاتی عراقی هس كه‌يگ دی هوير له‌ جووره‌ چشته‌يليگ نه‌كه‌يگه‌وه‌ ، وه‌لی هاووڵاتييگ خاوه‌ن هه‌ق ته‌واوه‌تييش نيه‌ . سياسه‌تكردن قاچاغ نيه‌ ، سياسه‌ت واقعيش تا راده‌ی فره‌يگ وجوود نه‌يريگ . ئه‌يانه‌ ئاده‌ميزاد په‌لكيش كه‌يگ ئه‌را گه‌ردين له‌شوون مه‌عنايه‌يل عراق له‌ فره‌ رويه‌وه‌ ، هه‌ڵبه‌ت يه‌يش ئه‌وه‌نه‌ كار ئاسانيگ نيه‌و بايه‌سه‌ وه‌ هووشياريه‌وه‌ مامڵه‌ وه‌ليا بكريه‌يگ . ره‌سم عراق له‌ هويره‌وه‌ری به‌ش فره‌يگ تاكه‌يل كورد ، ره‌سميگ ترسناكه‌ وه‌ك ئه‌و ره‌سمه‌يله‌ ك توانای خستن له‌بان قاقه‌ز نه‌يريگ و ته‌نيا له‌ هوير ئاده‌ميزاد ئه‌رشيف كريه‌يگ . ئمجا تاريخ دروسبوين ئه‌و ره‌سمه‌ له‌ سه‌ره‌تايه‌يل دروسكردن ده‌وڵه‌ت عراقيه‌وه‌ ده‌سكه‌يگه‌پی و كه‌مه‌ كه‌مه‌ ره‌نگ كريه‌يگ تا خه‌ته‌يل ره‌سمه‌گه‌ له‌تاريخ گرتنه‌ده‌س ده‌سڵات له‌لايه‌ن به‌عسيه‌يله‌وه‌ وه‌ شيوه‌يگ ترسناكتر تووخه‌و كريه‌يگ .

كورد وه‌ل ساڵه‌يل فه‌رمانڕه‌وايی به‌عسيه‌يلا كه‌مه‌ كه‌مه‌ ره‌سم كاره‌ساته‌يل له‌ زاكره‌ی خوه‌ی ئه‌رشيف كه‌يگ ، وه‌ ئه‌وه‌ك نويسانن هويره‌وه‌ری و تاريخ كاره‌ساته‌يل وه‌ك پيشمه‌رگايه‌تی و كوردايه‌تی قاچاخ بويه‌ ، هه‌ر له‌وه‌ر ئه‌وه‌يش ره‌سم له‌ زاكره‌ی ئاده‌ميزاد عراقی شوون فره‌يگ داگير كردگه‌ .