دراوردن نه‌فت كوردستان له‌ به‌رژه‌وه‌ندى كى بوى؟

شفق نيوز

 

وه‌ گووره‌ى ریككه‌فتننامه‌ى 11ى ئادار 1970 ك له‌ناونى رژیم به‌عس و سه‌ركردایه‌تى كورد ئه‌و سه‌رده‌مه‌ موور كریا، بایه‌سه‌ بوى گشت به‌نده‌یل ئه‌و ریككه‌فتننامه‌ له‌ ماوه‌ى چوار ساڵ جیوه‌جى بكریاتاد، وه‌و مانا ك وه‌هار 1974 كووتایى مووڵه‌ت كورد بوى ئه‌را دویا به‌ند ریككه‌فتننامه‌گه‌ ك كیشه‌ى كه‌ركووك بوى.

گومان له‌وه‌ نیه‌ ك هه‌ر له‌ سه‌ره‌تاوه‌ به‌عس نه‌ دگان وه‌ ماف كورد نیاد نه‌یش باوه‌ڕ وه‌ كیشه‌یگ داشت وه‌ناو كیشه‌ى كورد، ئه‌و ریككه‌فتننامه‌یشه‌ ته‌نیا مناوره‌یگ سیاسى و وه‌خت وه‌سه‌ربردن بوى ئه‌را بته‌وكردن ته‌خت ده‌سڵات، ك ئه‌وه‌ بوى به‌عس تویه‌نست له‌ ماوه‌ى ئه‌و چوار ساڵه‌ چه‌ن ده‌سكه‌فتیگ مسۆگه‌ر بكا ئه‌را بته‌وكردن بنه‌ماى ئابوورى ده‌سڵات و پڕچه‌ككرددن سه‌ربازى رژیمه‌گه‌ى.

هه‌ر له‌ سه‌ره‌تاى ریككه‌فتننامه‌گه‌، به‌عس له‌ هه‌وڵ ئه‌وه‌ بوى كورد وه‌ جووریگ له‌ خودموختارى رازى بكا ك مه‌رزه‌گه‌ى له‌و سێ پاریزگاى ئیسه‌ فیشتر نه‌ود، هه‌ر له‌وه‌ر ئه‌وه‌یش له‌وه‌خت نزیكه‌وبوین له‌ كووتایى ماوه‌ى ریككه‌فتنه‌گه‌ ئه‌وه‌ بوى به‌عس چه‌ن بژارده‌یگ خسته‌ وه‌رده‌س سه‌ركردایه‌تى كورد جوور: دریژه‌وكردن چاره‌سه‌ر مه‌سه‌له‌ى كه‌ركووك ئه‌را چه‌ن ساڵیگ تر- ئداره‌یگ هاوبه‌ش ئه‌را كه‌ركووك- یا كه‌لار و چه‌مچه‌ماڵ بكریه‌نه‌ پاریزگاو جارجاریش باس له‌ خانه‌قین كریا ك بخریه‌یده‌ بان ئۆتۆنۆمى.

ئمجا سه‌ركردایه‌تى كورد له‌وه‌ر ئه‌وه‌گ مه‌سه‌له‌ى كه‌ركووك جوور كڕكڕه‌ى پشت كیشه‌ نه‌ته‌وه‌یه‌گه‌ى كورد زانست، هه‌میشه‌ وه‌ كیشه‌ى سه‌ره‌كى كورد ناوى بردیاد، وه‌لى كورد دڵنیا بوى له‌وه‌گ به‌عس ئاماده‌ نیه‌ ده‌س له‌ كه‌ركووك هه‌ڵگرید، ك ئه‌وه‌ بوى مه‌سه‌له‌گه‌ وه‌ جه‌نگ كووتایى هات و له‌ ئادار 1974 مه‌ترسى و دڵه‌ڕاوه‌كى به‌رپابوین جه‌نگ له‌ناو مه‌ردم كوردستان بڵاوه‌و بوى.

له‌و سه‌رده‌مه‌ سه‌ركردایه‌تى كورد هه‌وڵ فریه‌یگ داو هویچ وه‌ختى واز له‌ كه‌ركووك ناورد، ئمجا سه‌ركردایه‌تى ئیسه‌ى كوردیش وه‌ل جیاوازى كه‌میگ هه‌ر دریژه‌ده‌ر هه‌مان سه‌ركردایه‌تى ئه‌و سه‌رده‌مه‌سه‌ له‌وه‌ر خاتر به‌رژه‌وه‌ندى كورد و كه‌ركووك، ئمجا بوود بویشیم ك سه‌ركردایه‌تى ئه‌و سه‌رده‌مه‌ غه‌ڵه‌ت كرد ك وه‌شیوه‌یگ ته‌كتیكى خوه‌ى وه‌ل رژیم به‌غدا ریك نه‌خست؟.

له‌یرا ئه‌تویه‌نیم بویشیم جوور هاوكیشه‌یگ هویركارى ئسپاتى بكه‌یم و بویشیم گشت گشت ماڵویرانییگ له‌وه‌ر خاتر نه‌فت بویه‌، ئیسه‌یش نه‌فت هه‌رێم به‌دیل كه‌ركووكه‌، هه‌ر وه‌و خاتریشه‌ بایه‌سه‌ نه‌فت كورد له‌ به‌رژه‌وه‌ندى ملله‌ت كورد بوود.

ئه‌مین جاف

ج . أ