ئازاد.. هونه‌رمه‌ند گه‌ورای فه‌رامووشكریاگ

شفق نيوز

شاركورد په‌روه‌ر خانه‌قین كه‌سایه‌تیه‌یل و پیاوه‌یل ناودار و كه‌ڵێن فه‌ره‌یگ له‌تێ هه‌ڵكه‌فتنه‌ ك ناویان چیه‌سه‌ ناو لاپه‌ڕه‌یل میژووى ئی شاره‌ و هه‌میشه‌ ناویان وه‌ خاسى بریه‌ێ. ئازاد وه‌هاب یا ئازاد خانه‌قینی هونه‌رمه‌ند و خه‌باتكار و پیشمه‌رگه‌ى سه‌نگه‌ر، یه‌كێگ له‌و رووڵه‌یل وه‌توانا بوى ك وه‌ هونه‌ر ره‌سه‌ن خوه‌ی و وه‌ده‌نگ و چریكه‌ى پڕ له‌ سووز و نازك و ره‌ینه‌گه‌ی ناویگ پڕ له‌ شانازی خوه‌ی و خانه‌قین هه‌میشه‌ كوردستانى له‌ مێژوو ملله‌ته‌گه‌ى تومار كرد و زایه‌ڵه‌ی ده‌نگه‌ وه‌سووزه‌گه‌ی جوور قاسپه‌ قاسپ كه‌و هه‌رده‌م زینگه‌ و قه‌د فه‌رامووش نیه‌كریه‌ێ.

ئازاد هونه‌رمه‌ند له‌ شارێگ گه‌ورا و دڵنشین كوردستان خوه‌رهه‌ڵات، شاره‌گه‌ی شیرین وفه‌رهاد و تاقوه‌سان ناسیم. روژه‌یل سه‌ختیگ بوى، ملله‌ته‌گه‌مان تویش كاره‌ساته‌یل گه‌ورایگ جوور كیمیاواران و ئه‌نفال هاتوید و ئازادیش وه‌ل هه‌زاران خه‌باتكار و رووڵه‌ی دڵسوز وه‌ل هاورێیه‌یل خانه‌قینی ئه‌را سه‌رله‌نوو ئاماده‌كردن خوه‌یان و وسیان له‌وه‌راوه‌ر دوژمن ئه‌را چه‌ن رووژیگ روى كردوینه‌ كرماشان. ئه‌و چه‌ن رووژه‌ ئازاد ئوقره‌ی نه‌گردیاد و په‌شیو بوى، ئاخر مناڵه‌یل ئاوایه‌یل خاپووركریاگ نیشتمانه‌گه‌ى و داڵگه‌یل سیه‌پووش شه‌هیده‌یل كه‌فتیاده‌ هویری؛ ئارام له‌لی بڕیاويد و هه‌ر رووژشوماری كردیاد ك دواره‌ تاقمه‌گه‌ی بوه‌سێد و شمشاڵه‌گه‌ی بخه‌ێده‌ ناو پشتوینه‌گه‌ی و سه‌رله‌نوو روی بكه‌ێده‌‌ سه‌نگه‌ر كوردایه‌تی وشه‌ره‌ف. به‌ڵێ ئازاد عاشق بوى؛ وه‌لی نه‌ عاشق گیسه‌یل زه‌رد و و چه‌وه‌یل كه‌و و سه‌روینه‌یل لار كه‌ڵهوڕی و گوڵوه‌نی وه‌سه‌ره‌یل؛ ئازاد جوانه‌مه‌رگم عاشق وژه‌ وژه‌ی خاك نیشتمانه‌ خاپووركریایه‌گه‌ی و دار به‌ڕويه‌یل سه‌ربڕیاگ بوی و له‌هه‌ر كووره‌ ده‌نگ سازیگ كوردی و میلۆدی كورده‌واری باتاگ ئازادیش عاشقانه‌ و ئارام ئارام خوه‌ی له‌ سازه‌گه‌ نزیكه‌و كردیاد و وه‌چریكه‌ی خوه‌ی دڵ هه‌ر دڵداریگ هاوردیاده‌ جووش و بردیاده‌وه‌ی ئه‌را پاشا كوپری و جه‌له‌وه‌ و كنار ئه‌ڵوه‌ن و میه‌خاس و سه‌وزبڵاخ و ئه‌مین باپیر و چیاسورخ. به‌ڵێ ئازاد یه‌كیگ له‌و پێشمه‌رگه‌یل هونه‌رمه‌نده‌ بوى ك تفه‌نگه‌گه‌ی قوڕگی بوى و هاژه‌ى گوله‌گانى ئه‌و چریكه‌یل نازكه‌ بوى ك هه‌ردڵێگ وه‌ئاسانی وه‌ره‌و لای خوه‌ی كیشیاد؛ به‌ڵێ ئازاد ئه‌و هونه‌رمه‌نده‌ بوى ك وه‌زگ ورسی و لێو تیه‌نی و شه‌ق شه‌ق بردیه‌گه‌ى، له‌مه‌یدان خه‌بات و به‌رخۆدان گورانی ئه‌را ملله‌ته‌گه‌ی چڕیاد و سروود ئه‌را نیشتمانه‌ سزیاگه‌گه‌ی خوه‌نستیاد. ئازاد ئه‌و هونه‌رمه‌نده‌ بوی ك وه‌پای په‌تی كویه‌ وه‌كویه‌ و هه‌رده‌ و هه‌رده‌ سه‌ر خوه‌ی ئه‌ڵگردیاد تا ملله‌ته‌گه‌ی وه‌ زه‌بوونی نه‌وينێ. ئازاد وه‌چووخه‌و ڕانه‌كه‌ پینه‌ كریایه‌گه‌ی جوور ده‌وریش، ئی ئاوای و ئه‌و ئاوای كردیاد تا دوژمن نه‌تویه‌نێ بزه‌خه‌نگ له‌لێو مناڵه‌یل وڵاته‌گه‌ی بدزێ؛ ئازاد وه‌ل شمشاڵه‌گه‌ى ئی كه‌ورگ و ئه‌و كه‌ورگ كردیاد تا هونه‌ر ره‌سه‌ن كورده‌واری وه‌ره‌و نوا بوه‌ێد و كلتور نه‌ته‌وه‌گه‌ی زینگ بمینێ؛ چه‌ ئه‌ڕادان بویشم؟! ئازاد هونه‌رمه‌ندم هه‌رگز سه‌ر ئه‌ڕا دوژمنه‌گه‌ی نه‌چه‌مان و وه‌ماڵ ڕمیاگ و خاك سزیاگ و سازه‌یل ته‌ل بڕیاگ خوه‌ی، سه‌نگه‌ر هونه‌ر كوردی چووڵ و ناوی تا ئه‌به‌د له‌ كاروان هونه‌رمه‌نده‌یل سه‌نگه‌ر نیه‌كوشیه‌یگه‌و و له‌ هه‌ر كۆڕ و كۆمه‌ڵیگ باس كوردایه‌تی و موقاوه‌مه‌ت و ئازایه‌تی و دلێری و شه‌ره‌ف و شانازی بكریه‌ێ، ناو ئازاد هونه‌رمه‌ندیش ها تك زووانه‌یل و شار كوردپه‌وه‌ر خانه‌قین و هونه‌رمه‌نده‌یل شاخ قه‌د ناو ئازاد نه‌مر له‌هويریانه‌و نیه‌چوود.

هونه‌رمه‌ند جوانه‌مه‌رگ زایه‌ڵه‌ی قسه‌ خوه‌شه‌گاند جارێ هاله‌ گووشم؛ زووانه‌ شرینه‌گه‌د هه‌رگز فه‌راموش نیه‌كه‌م و دڵسووزی و داوان پاكید قه‌د له‌هويرمه‌و نیه‌چوود.

ئه‌گه‌ر ئمڕوو له‌هه‌ر مناڵێگ خانه‌قینی ناو ئازاد هونه‌رمه‌ند بپرسی، وه‌شانازیه‌و‌ ئویشێ یادی وه‌خه‌ێر پێشمه‌رگه‌ی دڵسووز، یادی وه‌خه‌ێر هونه‌رمه‌ند سه‌نگه‌ر، یادێ وه‌خه‌ێر رووڵه‌ی ئه‌ڵوه‌ن، یادی وه‌خه‌ێر شیره‌ كوڕه‌گه‌ی خانه‌قین مه‌ڵوه‌ن كوردایه‌تی و كورد په‌روه‌رى. یادت وه‌خه‌ێر و به‌هه‌یشت جید بوود هونه‌رمه‌ند جوانه‌مه‌رگم.

 

جه‌واد كازم مه‌ڵكشای