گه‌ورایگ به‌م...بویچگیگ ده‌م!!

شفق نيوز

له‌كوردستان بیجگه‌ ئه‌وه‌ك چشته‌یل جوان و شایسته‌یگ داشتگه‌ له‌ڕوى حورمه‌تناین و ڕیزگرتن له‌گه‌وراو پیره‌یل و دڵسووزى و به‌شداریكردن مه‌ردم له‌خوه‌شى و ته‌نگى یه‌كترى و هه‌واڵپرسى و هامشووكردن ناونى قه‌وم و خیش و سفه‌ته‌یل تر كوومه‌ڵایه‌تى، وه‌ل ئه‌وه‌یشا فره‌جاریش كاره‌یل سه‌قه‌ت و ناپه‌سه‌نیگ  له‌كوومه‌ڵگا ڕویداگه‌و ئاده‌میزاد له‌تى بویه‌سه‌ قوربانى.

له‌ڕوى سروشتیه‌و گشت كه‌سیگ هه‌ق خوه‌یه‌ وه‌و جووره‌ ك خوازیاره‌ ژیان خوه‌ى بوینیگه‌ چه‌و، وه‌ مانایگ تر تویه‌نیم بویشیم دویر له‌زووره‌ملى ژیان هاوسه‌رى پیك باریگ و ئه‌و كه‌سه‌ هه‌ڵوژنیگ ك ژیان وه‌لیا وه‌ به‌خته‌وه‌رى و ئاسووده‌یى به‌یگه‌ سه‌ر. ئه‌گه‌ر بایمنه‌ پاى شه‌رع و ده‌ستووریش هویچ وه‌ختیگ شه‌رع ڕى وه‌ چه‌وساننه‌وه‌ى ئاده‌میزاد نه‌یاگه‌و هه‌ق كه‌س نه‌خواردگه‌، وه‌لى جویر ئه‌وه‌ك زانیم مه‌سه‌له‌ى داب ونه‌ریت كاریگه‌رى فره‌یگ داشتگه‌ له‌بان كوومه‌ڵگاو به‌عزه‌ هه‌قه‌یلیگ له‌تى گوم بویه‌و چشته‌یل فره‌یگیش له‌تى قه‌یه‌غه‌ كریاگه‌و بڕیار باوگسارى و دایگسالارى فره‌جار زاڵ بویه‌سه‌ بان ئیراده‌ى روڵه‌یلیان.

مه‌به‌س باسه‌گه‌م له‌یرا ئه‌وه‌سه‌ ك له‌كوومه‌ڵگاى كورده‌وارى خوه‌مان وه‌تایبه‌ت له‌ناو ئێڵ و هووزه‌یل كورد مه‌سه‌لى ژنخوازین و دویه‌ت وه‌شویداین جووریگ له‌ ئه‌ڵڵاجه‌وى له‌تى كریاگه‌ دى، ئیمه‌ گشتمان مه‌سه‌لى" ژن وه‌ ژن" ژنه‌فتیمنه‌و له‌لیمانیش هه‌س شایه‌ت ئه‌و پرووسه‌ى ژن وه‌ ژنه‌ ئه‌نجام داویگ ، وه‌لى ئایا مسه‌له‌ى" گه‌ورایگ به‌م بویچگیگ ده‌م" مایه‌ى سه‌رسوڕمه‌ندن نیه‌؟ ئایا ئى جووره‌ كرده‌وه‌یگ ئه‌قڵ په‌سه‌نى ئه‌كا؟ ئایا بوود دویه‌تیگ هیمان چوار په‌نج ساڵان بوودو بوو شیر له‌ده‌مى بایگ ، وه‌بى ئه‌وه‌ك بزانیگ دونیا چه‌سه‌و هه‌ر له‌هویر وه‌یلكانه‌بازى و گه‌مه‌كردن خوه‌ى بوود وه‌ل مناڵه‌یل هاوعومریا، قه‌وڵى به‌یده‌ كه‌سیگ و هه‌ر وه‌و عومر و قوناغ مناڵیه‌ وه‌ ده‌م ماره‌ى بوڕید تا گه‌ورایگ له‌جیاى باریدو هه‌ر وه‌ختى هاته‌ وه‌خت شویكردن له‌جیاى ئه‌و گه‌ورا بدریه‌یگ؟ ئه‌ى خاس ئى ئاده‌میزاده‌ له‌وه‌ختیگ قه‌وڵى دریاگه‌ له‌ ئه‌قڵ خوه‌ى نه‌ویه‌و له‌ى مه‌سه‌له‌ نه‌ڕه‌سیه‌سه‌و، وه‌لى وه‌ختى گه‌ورا بوود شایه‌ت ئه‌و كه‌سه‌ ك توایگ بكریه‌یگه‌ هاوسه‌رى دڵى نه‌گریگه‌ى و نه‌توایگه‌ى، ئایا ئه‌یه‌ زوڵم و سته‌م نیه‌؟

ئه‌یه‌سه‌ ك فره‌جار ئاده‌میزاد وه‌تایبه‌ت ژن و دویه‌ته‌یل كریانه‌سه‌ قوربان كلتوور و داب ونه‌ریت سه‌قه‌ت كوومه‌ڵگاو دویاخریش له‌یوا له‌لیان هاتگه‌ له‌گشت كلتووریگ بیزار بوون و تام ژیان له‌لایان تفت و تیه‌ڵ بوود.

فره‌جار له‌یوا هه‌ڵكه‌فتگه‌ دویاى ساڵه‌یل فره‌یگ له‌ژیان هاوسه‌رى و خسته‌وه‌ى چه‌ن مناڵیگ،مه‌سه‌له‌ى ته‌ڵاق په‌یا بوود، ك ئه‌ویش وه‌بوونه‌ى ژنخوازین گه‌ورا وه‌بویچگ، چوینكه‌ وه‌خت خوه‌ى گه‌ورایگ هاوریاگه‌و بڕیار بویه‌ بویچگیگ له‌جیاى بدریه‌یگ، وه‌لى وه‌ختى بویچگه‌گه‌ ره‌سیه‌سه‌ قوناغ شویكردن دڵى ئه‌و كه‌وسه‌ نه‌گرتگه‌ ك بڕیاره‌ بدریه‌یگه‌پى، هه‌ر له‌وه‌ر ئه‌وه‌یش نوڕید هه‌ڕه‌شه‌ى هه‌تك و خودسزانن داگه‌ له‌حاڵه‌تیگ ئه‌گه‌ر وه‌ زوور ئه‌و ژیان هاوسه‌ریه‌ وه‌پى ئه‌نجام بدریه‌یگ، هه‌ر له‌وه‌ر ئه‌وه‌یش دوینید لایه‌ن وه‌رانوه‌ریش ك چه‌ن ساڵه‌ دویه‌تیگ له‌جیاى ئه‌و بویچگه‌ دانه‌، له‌ژیر په‌رده‌ى عه‌یب و عار و ناونیتگ ئه‌یانیش چن دویه‌ت خوه‌یان تیه‌رنه‌وه‌و له‌شویه‌گه‌ى ته‌ڵاقى ده‌ن وه‌بى ئه‌وه‌ك هساو ئه‌را مناڵه‌یلیشى بكه‌ن.

له‌ڕاسى ئه‌یه‌ دیارده‌ى ناپوخت وناشرینیگ بوى یه‌قه‌ى كوومه‌ڵگاى كورده‌وارى گردویگ، وه‌لى ئایا له‌ى سه‌رده‌م ئیسه‌ تاچه‌نیگ ئه‌و ره‌فتار و هه‌ڵسووكه‌فته‌ له‌لایه‌ن خیزانه‌یله‌و جویر باو دوباره‌وه‌ كریه‌یگ؟

 

ج. عه‌لى میرى