سه‌رۆك ئيمه‌ ديكتاتۆر نيه‌

شفق نيوز

ئه‌ى مشتومرێشه‌ له‌ بان داوايل وه‌ هه‌قيگه‌ ك هه‌رێم و سه‌ر‌كرده‌يل كورد له بانێ جه‌خت ئه‌كه‌ن. ئمجا خاستره‌ يه‌ بويشم ك هناى قاڵ له‌ برايل عه‌ره‌ومان ته‌نگه‌و بوود، هاوار كه‌نه‌و كوردو  كورديش له‌ دوياى پرۆسه‌ى ئازادى و ته‌نانه‌ت له‌سه‌رده‌م به‌عسيش په‌ناگاى خاسێ ئه‌را ئه‌ى برايله‌ تازه‌ وه‌ ده‌وڵه‌ت ره‌سيمانه‌ بويه‌.

هه‌ر ئه‌وچنه‌ ك زانيم قه‌يرانێ گه‌ورا دوياى ئه‌ڵوژانن ئه‌ى جاره‌ په‌رڵه‌مان عيراق روى داو نزيك وه‌ هه‌شت مانگ نه‌ ده‌وڵه‌تێ بوى و نه‌ په‌رله‌مانێ. ئمجا داشت كار ره‌سيه‌ ئه‌و جيه‌ تا له‌ هه‌م له‌ نوو جه‌نگێ ناوخوه‌يى له‌ ناو برايل عه‌ره‌ومان ك له‌ دو مه‌زه‌و شيعه‌و سوننى په‌يڕه‌و كه‌ن له‌لێ بكه‌فێده‌و. هه‌م  كورد وه‌ هانانيان ره‌سى و له‌ى گێچه‌ڵ و خوين رشاننه‌ رزگاريان كرد. له‌ په‌يماننامه‌ى هه‌ولێر نوزده‌ خاڵ هاوريايه‌و له‌ بانێ ئمزاو رێكه‌فتن كرياس، وه‌لى تا ئيرنگه‌ هويچ كام له‌لێان وه‌ كردارێ نه‌ويه‌ هويچ، ته‌نانه‌ت شێوه‌ى ك ماناى يه‌ بره‌سنێد ك وه‌ره‌و مه‌رج خاس وه‌ليانا چيمن هه‌ ديار نيه‌و رووژ له‌ دوياى رووژ وه‌ره‌و گه‌ن كردن وه‌لمان چن.

ئمجا له‌ى سه‌روبه‌نه‌، دوياى يه‌گ كورد يانه‌ ناو يه‌ك و حه‌ل و فه‌سليان كردو ده‌سيان كرده‌ مل يه‌ك، كابينه‌ى جه‌د‌يد پێكهاوريا.

له‌ بان ئه‌و رێكه‌فتنه‌يل ك له‌ هه‌ولێر گشت برايل و سه‌ركرده‌يل سياسى عه‌ره‌ومان رێكه‌فتن و ئمزايش له‌ بانێ كردن، چمانێ رێكه‌فتن تر چوى ئه‌وسا بوى ك وه‌ل رژيمه‌يل وه‌رجله‌ يان به‌سيمن و يه‌ ئه‌يرێده‌و هويرمان ك يانيش هه‌ چوى وان هناى له‌ وه‌رايوه‌ر كورد زوور وهێزيان كزه‌و بوود زرانى ده‌ن و وه‌لمانا نه‌رم ئويشن و مل ئه‌رامان چه‌منن.

وه‌ل يه‌گ ده‌وڵه‌ت خوه‌يان دامه‌زرانن چمانێ وه‌ ئاو ديدان و وه‌ خه‌و ديدان. هه‌ر ئه‌وه‌گ له‌ هه‌ولێر له‌ بانێ رێكه‌فتن نه‌ له‌ باوه‌ت ئيمه‌ى كورد، به‌ڵكو له‌ باوه‌ت خوه‌يانيش ك بوينه‌ دولايه‌ن له‌ هويريانه‌و چێ. هه‌م له‌ نوو چوى خه‌يانه‌تێ ك له‌ جه‌نگ ده‌وڵه‌ته‌يل عه‌رو وه‌ل ئسراييل وه‌ يه‌ك كردن يانه‌ ئيجاره‌گه هه‌م وه‌ خوه‌يان وه‌ خوه‌يانيش چوين يه‌ ها له‌ ناو خوينيان خه‌يانه‌ت كردن!.‌

تا ره‌سينه‌ كورسى ده‌سڵات وه‌ ئه‌و هه‌مگه‌ فت وفێله‌ ك له‌ يه‌ك كردن تا بوونه‌ قه‌وراه‌ى گه‌ورا، هه‌م ئه‌و هس ديكتاتۆريه‌ ك ناخيان جه‌رخه‌ دايه‌ كه‌فته‌و ده‌يشت و ئه‌را يه‌كم جار له‌ مێژوو فه‌رمانڕه‌وايى له‌ جه‌هان دوينيمن ك سه‌رۆك وه‌زيره‌يل هاووه‌خت بێجگه‌ له‌ يه‌گ سه‌رۆك وه‌زيره‌يل، خوه‌يش چه‌ن وه‌زارت گرتيه‌سه‌و ده‌س و رێ وه‌ كه‌س تر ناده‌ێ تا ته‌ك به‌يده‌ ئه‌ى كورسه‌يله‌. هناى خاستريش بنوڕيم ئه‌ى حكومه‌ته‌ وه‌ يه‌ ناو ده‌ر كرديه‌ ك حكومه‌تى ته‌وافقيه‌و بنه‌ماى دامه‌زراننێ بايه‌د وه‌ ئه‌ساس سه‌رجه‌م پێكهاوه‌ريل نه‌ته‌وه‌يى و قه‌واره‌يل سياسى له‌تێ به‌ش داشتوون ك يه‌يشه‌ له‌ رێكه‌فتنامه‌ى هه‌ولێر وه‌ رووشنى و ئاشكرا هاتيه‌و ته‌مام لايه‌نه‌يل ئمزا له‌ بانێ كردنه‌.

ئيرنگه‌ بايه‌مه‌ سه‌ر يه ك دوياى قسيه‌يل سه‌رۆك هه‌رێم كوردستان(مه‌سعود بارزانى) له‌ بان مادده‌ى 140 و بوودجه‌ى پێشمه‌رگه‌و ياساى نه‌فت وگاز و ئه‌و گيروگرفته‌يله‌ ك برايلمان له‌ به‌غدا ئه‌را ئيمه‌ كورد دروس كه‌ن، رفلكسێ فره‌ وه‌جى و هه‌ڵوێست خوه‌ى نيشان دا.

ئمجا دوياى ئه‌ى قسيه‌يل سه‌رۆك هه‌رێم، قسيه‌ى جاين و لقوزخسن و ده‌م پاچگانى برايلمان ده‌س وه‌پێكرد. تا يه‌گ ره‌سيه‌ ئه‌و جيه‌ ك سه‌رۆك هه‌رێم وه‌ ديكتاتۆر ناو بردن و توان ئيچنه‌ ته‌قاز بسێنن و يه‌ك وه‌ يه‌ك وه‌لمانا بكه‌ن.

م نيه‌زانم له‌ بان چ ئه‌ساسێ سه‌رۆك هه‌رێم كوردستان وه‌ پێ ئێژن ديكتاتۆر يا ئه‌ى ئيچنه‌ چشتێ له‌ سه‌رێ بايه‌د بويشيه‌يد!؟.  خوو سه‌رۆك هه‌رێم فره‌ ئه‌و دوياى نيه‌چم(چوين ك به‌كگڕاوند مێژوو سياسى له‌ى وڵاته‌ كه‌مه‌و فره‌ چشت زوى له‌ هويره‌ چوود) له‌ى ئه‌ڵوژانن تازه‌ ك له‌ هه‌رێم كوردستان دوساڵ له‌ يه‌و وه‌ر ئه‌نجام بوى، سه‌رۆك هه‌رێم راسه‌ى راس وه‌ ده‌نگ مه‌ردم بويه‌ سه‌رۆك هه‌رێم و نزيك وه‌70% ده‌نگ هاوردو هويچ هه‌وه‌جه‌ى وه‌ رێكه‌فتن چوى سه‌رۆك ئويه‌‌ نياشت تا سه‌رۆك وه‌زيره‌يل كابينه‌ پێك بارێد.

خوو ئه‌گه‌ر بايم ئه‌ى دو چشته‌ بنه‌يمه‌‌ لاى يه‌ك، خوو ئمجا خاس دياره‌ ك كردار سه‌رۆك ئيمه‌ فره‌ وه‌ ئاشكرا دياره‌و ئه‌وگ ديكتاتۆره‌ هه‌ سه‌رۆك وه‌زيره‌يل خوه‌دانه‌ ك چوى مناڵێ ك هرس ئه‌دا، بێجگه‌ له‌ وه‌گ سه‌رۆك وه‌زيرى تێرێ ناكا، چوار وه‌زاره‌ت ترێش هاوه‌ده‌سێ ونايلێد كه‌س تر ئه‌راى ده‌س بواد. ئيرنگه‌ وه‌ى مه‌رجه‌و ئه‌يچنه‌ كارێ ك ك ئه‌كه‌ين، گومان بكه‌م دموكراسى چه‌واشه‌و بويه‌و سه‌رۆك هه‌رێم ك وه‌ ده‌نگ و بێ رێكه‌فتن هاتيه‌سه‌و بان بويه‌سه‌ ديكتاتۆرو ئه‌و براى عه‌ره‌ومانه‌ ك پسا ئه‌سب خوه‌ى تنگێدو گووش وه‌ هويچ رێكه‌فتن ولايه‌ن سياسى نيه‌ێدو هه‌رجوور خوازێ ره‌فتار ئه‌كاو بويه‌سه‌ كه‌سێ دموكرات و سيسته‌مه‌گه‌يش دموكراسيخوازه‌و ته‌نانه‌ت نه‌يلێد هه‌ق مويرژگيش ژێرپا بوو!. ئمجا فره‌ ئه‌ڵاجه‌وى تر ها له‌يه‌گ ك ئه‌و ئايه‌مه‌يل جه‌ناب سه‌رۆك وه‌زيره‌يل بێ ئه‌وگ خوه‌ى چشتێ بويشێد گاڵيان ئه‌دا تا وه‌ ئاسانى ئه‌ى چشته‌يله‌ بارنه‌ زووان و ئه‌خوازن نوڕسنه‌يل و هوير ته‌مام مه‌ردم عيراق ك چوى به‌هه‌شتێ نوڕنه‌ كوردستان و ئاوه‌ختى فره‌ى ك وه‌ سه‌رۆك هه‌رێم دێرن، چه‌فته‌و بكه‌ن و كورد له‌ وه‌رچه‌و مه‌ردم عيراق بخه‌ن. وه‌لى ئه‌ى قسيه‌يل وه‌ قه‌وڵ كوردى خوه‌مان هه‌زار دروو وه‌ر‌ يه‌ك راس نيه‌گرن و كردار كوردو سه‌رۆك هه‌رێم له‌ كوردستان و عيراق و ناوچه‌گه‌و ته‌نانه‌تيش جه‌هان وه‌ خاسى دياره‌و ئيچنه‌ قسيه‌ فڕه‌ دانگيش بردێ ئه‌و قه‌ره‌ نه‌يرێدو ته‌نيا ئه‌را خه‌رج كردن ده‌وه‌روه‌ره‌يل كوڵه‌ هوير خوه‌يان خاسه هه‌ بايه‌د ئه‌را وانه‌ وه‌ كارێ بارن. له‌ باڵ تريشه‌و راسى خوه‌يان و نوڕسنيان وه‌ ده‌سڵات و دموكراسيه‌ت‌ ئه‌را گشتێ ئه‌خاده‌و ده‌يشت ك چه‌نێ وه‌ پێ باوه‌ڕ دێرن و نيشانيش دانه‌ ك ديكتاتۆرتر له‌ خوه‌يان هه‌ له‌ى وڵاته‌ نيه‌!.

شورش شاواز