ئه‌وه‌ك خوه‌دان خوازینه‌ى ئیمه‌یش خوازیم بزانیمه‌ى

شفق نيوز

گرێد له‌ناونى سیاسه‌تمه‌داره‌یل عراق له‌ژیر ناونیشانه‌یل جووراوجوور، هه‌ر جوور ڕازیگ مینن و هاووڵاتیه‌یل هویچ له‌باوه‌تیه‌و نازانن ك خوه‌زیه‌و بتویه‌نن وڵات له‌ وه‌رده‌وامى كیشمه‌كیش و گرفت سیاسى مه‌ترسیدار وه‌گووره‌ى ئه‌و دیداره‌یله‌ قورتار بكه‌ن.

 

ئه‌را نموونه‌، هاووڵاتییه‌یل خه‌وه‌ر نه‌یرن چه‌ بوى له‌و ریككه‌فتن وه‌رینه‌ له‌هه‌ولێر ك بڕیگ له‌ سیاسه‌تمه‌داره‌یل پابه‌ندن وه‌ به‌نده‌یلى و ملله‌تیش گشت ئه‌و به‌نده‌یله‌و هووكار داناینیشى نازانن.

 

له‌وه‌ختیگ ك هاووڵاتى داواى ئاشكراكردن ئه‌و به‌نده‌یل ریككه‌فتننامه‌ى هه‌ولێره‌ ئه‌كا، ریككه‌فتنه‌یل تر ئه‌نجام گرت ئه‌را ته‌واوكردن ریككه‌فتن یه‌كه‌م و به‌نده‌یل تازه‌ خریا بانى و داوا كریا ته‌وه‌ره‌یلى ئاشكرا نه‌كریه‌ن و هه‌ر له‌وه‌ر ئه‌وه‌یش كۆنگره‌یگ روژنامه‌گه‌رى به‌سیا و باس له‌ شیرازه‌و یه‌كێتى نیشتمانى و گونجیان و هویروڕاى هاوبه‌ش كریا له‌بان ئاست سه‌رۆك فراكسیۆنه‌یل سیاسى.

 

سیاسه‌ت له‌هویره‌وبردن سیاسى ك بڕیگ له‌حزبه‌یل سیاسى ره‌فتار وه‌پى كه‌ن دژ هاووڵاتى عراق، ئه‌و سیاسه‌ته‌ ئمڕوو بویه‌سه‌ شانۆ یا مه‌سره‌حیه‌یگ بى ماناو دوباره‌و كریه‌ێدو گشت مه‌ردم له‌لى ره‌سینه‌سه‌و. ئنجا ملله‌ت ئیراده‌ى ده‌سڵاته‌و هه‌ق خوه‌یانه‌ بزانن ك سیاسه‌تكاره‌یل وه‌ره‌و كوورا به‌نه‌یان له‌و دیداره‌و دانیشتن و كۆنگره‌یلیانه‌ ك قه‌یران تازه‌ له‌لیه‌و كه‌فیده‌و.

 

تویه‌نیم ئاشكراتر بویشیم، ك ملله‌ت خوازیار ئه‌وه‌سه‌ ئاكام ئه‌و دیدار و دانیشتنه‌یل سیاسیه‌ بزانن تا حوكم له‌بانى بیه‌ن و بزانن چ ڕییگ خزمه‌ت وه‌ وڵات ئه‌كاو چ لایه‌نیگ مینه‌ى به‌رژه‌وه‌ندى تایبه‌ت و به‌رژه‌وه‌ندى لایه‌نه‌یل ده‌ره‌كى ئه‌كا.

 

ملله‌ت خوازیارن ئكامه‌یل گوزه‌یشت بزانن و مكوڕن له‌بان ده‌رخستن ئاكام ئه‌و دانیشتن و دیداره‌یله‌ ك له‌به‌غدا ئه‌نجام گرت ئه‌را سه‌رۆك فراكسیۆنه‌یل سیاسى، تا ئاگادار بوون له‌گشت رویداگه‌یل.

 

ناكوكیه‌یل سیاسى له‌هه‌ر ئه‌زموونیگ دیموكراسى دیارده‌ى دروسیگه‌، وه‌تایبه‌ت ئه‌وانه‌ك چینه‌سه‌ ناو ئه‌زموون تازه‌یگ ، وه‌لى وه‌و مه‌رجه‌ ئه‌و ناكوكیه‌ مه‌ترسى زیاتر نه‌خه‌یده‌ بان بار ئاسایش له‌جاده‌و زوورم پرووژه‌یل خزمه‌تگوزارى له‌كار نه‌كه‌فێد ك په‌یوه‌سه‌ وه‌ ژیان رووژانه‌ى هاووڵاتى.

 

ئنجا ئه‌گه‌ر سیاسه‌تكاره‌یل وه‌ حوكم وه‌رپرسیاریه‌تى و هه‌ڵویسته‌یلیان هس وه‌ مه‌ترسى ناكه‌ن، ئه‌وه‌ بیگومان هاووڵاتى ئاسایى و بیتاوان هه‌میشه‌ بویه‌سه‌ قوربانى ئه‌و جیاوازیه‌و زه‌ره‌دمه‌ن یه‌كه‌مه‌ له‌گشت كیشمه‌كیشه‌یل سیاسى.

 

سیاسه‌تكار له‌وه‌ختیگ وه‌ وه‌رپرسیاریه‌تى رازیه‌ دى كه‌فێده‌ چوارچیوه‌ى خزمه‌ت گشتى و بایه‌سه‌ بگه‌ردیده‌ شوون جیوه‌جیكردن ئه‌و ئه‌ركه‌یله‌ ك په‌رله‌مان ئه‌ڕاى ده‌سنیشانى كردگه‌ له‌وه‌رانه‌وه‌ر پویل مانگانه‌ ك له‌بودجه‌ى ده‌وڵه‌ت وه‌پى دریه‌ێد ك ئه‌ویش ماڵ ملله‌ته‌.

 

هه‌ر له‌وه‌ر ئه‌وه‌یش قه‌سه‌میان ده‌یم واز له‌ده‌سكه‌فت و به‌رژه‌وه‌ندى تایبه‌ت و حزبى خوه‌یان بارن و كار ئه‌را عراق و مه‌ردمه‌ ره‌سه‌نه‌گه‌ى بكه‌ن وه‌گشت نه‌ته‌وه‌و دین و مه‌زه‌وه‌یلى. قه‌سه‌میان ده‌یم ئاشكرا بوون وه‌ل ملله‌تاو له‌و ریككه‌فتنه‌یل ناجوور و تیه‌ریكه‌ بانه‌ ده‌یشت و له‌خزمه‌ت به‌رژه‌وه‌ندى عراق بوون. قه‌سه‌میان ده‌یم ئه‌را گشت ملله‌ت بوون و قه‌وڵه‌یل خوه‌یان بارنه‌ جى و مقه‌یه‌تى له‌ كه‌رامه‌ت ئى ملله‌ت بكه‌ن ك شایسته‌ى گشت خه‌یریگه‌. قه‌سه‌میان ده‌یم وه‌خوین پاك شه‌هیده‌یل عراق، وه‌شه‌سر چه‌وه‌یل، وه‌هاوار یه‌تیمه‌یل، وه‌گیان ئه‌و مناڵه‌یله‌ ك له‌جاده‌ گه‌یاى كه‌ن، قه‌سه‌میان ده‌یم وه‌ په‌یغه‌مبه‌ر و بنه‌ماڵه‌ى  سڵام خودا له‌لیان، وه‌ عیساو مه‌ریم، وه‌ فاتمه‌ى زه‌هرا له‌وه‌ر خاتر به‌رژه‌وه‌ندى ملله‌ت كار بكه‌ن، وه‌نا سزاى ملله‌ت ها ڕییه‌و ئه‌را گشت ئه‌وانه‌ك خیانه‌ت له‌ ئه‌مانه‌ت كه‌ن و قه‌وڵه‌یلیان نیارنه‌ جى. وه‌ل ئه‌وه‌یشا سه‌ندووقه‌یل ده‌نگداین ئاینده‌ قسه‌یگ تر ئه‌كاو ئاكامیشى خه‌مه‌ ئه‌را ئه‌و سیاسه‌تكاره‌یله‌ ك به‌رژه‌وه‌ندى و ناكوكیه‌یل خودى كووریان كرد له‌هه‌ناى ملله‌ت و ئاینده‌ى وڵات.

 

هه‌یفا حسه‌ینى