هه‌م به‌‌زم ژینۆسایده‌ ئه‌‌را كورد!؟

شفق نيوز

د‌ڕ‌نده‌‌یل ڕزگارمان بویه‌‌ و هه‌‌ناسێگ وه‌‌ ڕه‌حه‌‌تى كیشیمن!. وه‌‌لى فره‌‌ پێ نه‌‌چێ، باسێگ وه‌‌ ناو ناوچه‌‌یل داوڕیاگ له‌‌ كوردستان هاته‌‌ مه‌‌یان و ماده‌‌ى ١٤٠ و... یه‌‌ هه‌‌م كه‌‌مێگ خاسوى و ئیمه‌‌ى كورد وه‌‌تیمن وه‌‌ دیالۆگ ئه‌‌ى گرفت خاك و جۆگرافى‌ و سیاسییه‌‌ چاره‌‌ى كه‌‌یم!. وه‌‌ یه‌‌یشه‌‌و نه‌‌یشتنه‌‌مان و ده‌‌س كریا كوشتن و بڕین و قڕانێگ له‌‌ى‌ ناوچه‌‌یل كوردیه‌‌ و چمانێ قڕانه‌‌ساڵێگ هات و ده‌‌رانه‌‌ى ئیمه‌ى‌ كورد گرت!. هه‌رچێگ هه‌وڵ دریا تا وه‌‌ جێوه‌‌جى كردن ماده‌‌ى ١٤٠ ئاوێگ بكریه‌‌یده‌‌ مل ئاگرا، وه‌‌چه‌‌واشه‌‌و لایه‌‌ن وه‌رایوه‌‌ر و ده‌‌سه‌‌یل ئاوشاریاى، نه‌‌فت و بنزین وه‌‌ ده‌‌سیانه‌‌و بوى و ئاگره‌‌گه‌‌ گوڕ تره‌‌كه‌‌و كردن. له‌‌ كه‌‌ركوك تا ڕه‌‌سێده‌‌ مه‌‌نه‌‌لى هه‌زاران بۆمب ته‌‌قانن و مه‌‌ردم و رووڵه‌‌یل كورد كردنه‌ نیشانه‌ى‌ هویرێگ بێ مایه‌‌ و شۆڤێنى خوه‌‌یان. له‌‌ شار شاره‌‌بان كار وه‌‌و جیه‌‌ ڕه‌‌سانن ك دى ئێرنگه‌ كورد له‌‌ تێ نه‌‌منیه‌‌‌ و ئه‌‌گه‌‌ر هه‌ن فره‌‌ كه‌‌من و نیه‌‌وێرن بویشن ئیمه‌‌ كوردیم. ئمجا له‌‌ ماوه‌ى ئى دو سێ ساڵ دوماییه‌‌، له‌‌ ناوچه‌‌ى دیاله‌‌ ك بویه‌‌ لانه‌‌ماى تیرۆریسته‌‌یل، یانه‌ داخ تره‌‌ك نانه‌‌و بان داخه‌‌یل كورد و وه‌‌ل رێكخستنێگ ك له‌‌ ناو ئستخبارت و جه‌یش عێراق له‌‌ ئه‌‌ى پارێزگا داشتن، ده‌‌س له‌‌ ناو ده‌‌س یه‌‌ك قڕانێگ تره‌‌ك وه‌‌ سه‌‌ر كورد هاوردن. ماوه‌‌ى دو ساڵه‌، وه‌‌رپرسه‌‌یل كورد له‌‌ شاره‌‌یل جه‌‌له‌ولا و سه‌‌عدیه‌‌ هاوار كه‌‌ن و ئویشن: له‌‌ روى ئه‌‌نقه‌‌زه‌‌و  توان ئه‌‌را جێوه‌‌جى نه‌‌وین ماده‌ى‌ له‌‌ قوڕگ نیشتگ ١٤٠ له‌‌ى ناوچه‌‌یل كوردیه‌ ئه‌‌ى برایه‌‌ل نابرامانه‌‌‌، كوردقڕانێگ نوو ده‌‌س وه‌‌پێ كردنه‌‌و تائێرنگه‌‌ زیاتر له‌‌ هه‌زاران كورد له‌‌ ژن و مناڵ و گه‌‌ورا و بویچگ وه‌‌ ده‌‌س ئه‌‌ى نابرایل شۆڤێنیه‌‌ شه‌هید بوینه‌‌ و فره‌‌ ماڵ و بنه‌‌ماڵه‌‌ى كوردیش له‌‌ى ناوچه‌‌یل كوردنشینه‌‌ سه‌‌رئه‌‌ڵگرتنه‌‌ و هاتنه‌‌ ئه‌‌را ناوچه‌‌یل ئه‌‌من هه‌رێم كوردستان. ماوه‌‌یگه‌‌ مه‌‌ردم له‌‌ حكوومه‌‌ت هه‌رێم توان تا برایل پێشمه‌‌رگه‌‌یان ئه‌‌را وه‌رگرى كردن له‌‌ لیان كل بكه‌‌ن ئه‌‌را ئه‌‌و ناوچه‌‌یله‌‌، وه‌‌لى تووزێگ نه‌رمى له‌ى‌ باوه‌‌ته‌‌ دوینیا و‌ ئه‌‌ویشه‌‌ گوناى حكوومه‌‌ت هه‌رێم نیه‌‌، به‌‌ڵكوو سیستم بیرۆكراسى ناوه‌‌ین هه‌رێم كوردستان و ده‌‌وڵه‌‌ت به‌‌غدا بایس بوى كه‌‌مێگ رووڵه‌‌یل پێشمه‌‌رگه‌‌ى كوردستان دێر بچنه‌‌ هاناى برا و خوه‌‌شكه‌‌یل خوه‌‌یان. وه‌‌زاره‌‌ت پێشمه‌‌رگه‌‌ چه‌‌ن جارێگ داوا له‌‌ كۆمیسیۆن ئه‌‌منى به‌‌غدا كرد تا هه‌ر چێ زویتر له‌‌ سه‌‌ر ئه‌‌ى باوه‌‌ته‌‌ بنیشن و فكرێگ بكه‌‌ن، وه‌‌لى هه‌ر ئه‌‌و جووره‌‌گ دیاره‌‌ ده‌‌وڵه‌‌ت عێراق خوه‌‌ى تویش مله‌ملیێگ له‌‌ ناو خوه‌‌ى هاتیه‌‌و له‌ ناوزگه‌‌و ژان پێچیاسه‌‌ پێا و وه‌‌رپرسه‌‌یلیشى هه‌ گووش له‌‌ى قسه‌‌یله‌‌ نیه‌‌ته‌‌كنن و گیان ئایه‌‌م له‌‌ لایان هه‌ چوى په‌‌تگه‌‌. ئه‌‌ڵبه‌‌ت فره‌‌ له‌‌لیانیش هێمان هه‌ چوى ئه‌‌وسا هویره‌‌و كه‌‌ن و شایه‌‌د نه‌‌تویه‌نن بارنه‌‌ى زووان و وه‌‌ قه‌‌وڵ عه‌‌ره‌‌وه‌‌یل (تقیه‌)‌ بكه‌‌ن، وه‌‌لى له‌‌ پراكتیك ئه‌‌وه‌‌گ چوى تابلۆیگ دیاره‌‌ یه‌‌سه‌‌: ئیمه‌‌ى كورد كه‌‌فتیمه‌‌سه‌‌‌ قڕان و ئاواره‌‌ بوین. ئێرنگه‌ وه‌‌ى‌ ڕه‌‌وشه‌‌گه‌‌ شۆڤێنیه‌‌یل گرتنه‌سه‌‌ى وه‌‌ر ئه‌‌گه‌‌ر ڕیگه‌چاره‌‌یگ له‌‌وه‌‌ر نه‌گیریه‌‌ێد، ئه‌‌ى ناوچه‌‌یل كوردنیشنه‌‌، كوردێگ له‌‌ ناویان نیه‌‌مێنێد و ئه‌‌ى جۆگرافیاى كوردیه‌‌ وه‌‌ل مه‌‌ردمانیا له‌‌ ده‌‌س چوود وه‌‌ هه‌ر ئه‌‌و جووره‌‌گ له‌‌ بڕێگ كتاوه‌‌یل میژوویى هاوردیمه‌‌و تیریمن فڵانه‌‌ جى هن كورد بویه‌‌ و توایم یه‌‌ بسه‌‌لمنینم ك هن ئیمه‌‌ى كورد بویه‌‌، مه‌‌گه‌‌ر هه‌ له‌‌یوا ناویان باریمن و ئه‌‌را خوه‌‌مان لاپه‌‌ڕه‌‌ى كاغه‌‌ز سیه‌‌و بكه‌‌یمن. ئێرنگه‌ یه‌‌یش باریمه‌‌و باس، سه‌‌ران كورد و په‌رله‌‌مانتاره‌‌یل كورد و وه‌‌زیره‌‌یل و جێگیره‌‌یلیان له‌‌ ده‌‌وڵه‌‌ت به‌‌غدا ك كوردن ئه‌‌را بێ ده‌‌نگن!؟. ئه‌‌گه‌‌ر پابه‌‌ندییگ وه‌‌ ده‌‌ستور هه‌س، ته‌‌نیا ئه‌‌را كورده‌‌!؟. مزنه‌‌م ته‌‌نیا ده‌‌ستور ئه‌‌را كورد دانانه‌‌سه‌‌ێ و لایه‌‌نه‌‌یل تره‌‌ك نه‌‌بایه‌‌د وه‌ پێ پابه‌‌ند بوون!؟. بایه‌‌د له‌‌ى برایلمانیشه‌‌ گله‌‌ى بكه‌‌یمن، بێَ ده‌‌نگى تا ئه‌‌ى ئاستیشه‌‌ نیه‌‌ود، پسا خوین رووڵه‌یل‌ كورد ڕشیه‌‌ید و ناوچه‌‌ێگ كوردى دێرێد تاڵان كریه‌‌ید و له‌‌ ده‌‌س چوود. ئه‌‌ڵبه‌‌ت ئه‌‌ى بێ ده‌‌نگى برایل كوردمانه‌‌ له‌‌ به‌‌غدا، بویه‌‌ مه‌‌مه‌‌ر یه‌‌گ سه‌‌رۆك  هه‌رێم خوه‌‌ى ده‌‌س وه‌‌كار بوود و بكه‌‌فێده‌ ته‌‌قلا ئه‌‌را ئه‌وه‌‌گ گیان ئه‌‌ى رووڵه‌‌یل كورده‌ له‌‌ى ناوچه‌‌یله‌ بپارێزیه‌ێ و له‌‌ى به‌‌زمه‌‌گ ئه‌‌رامان ته‌‌نینه‌‌ ده‌‌رمان بكا.

 

شۆڕش شاواز