ئایا كورده‌یل فه‌یلى ئامووژگارى وه‌رگرن؟

شفق نيوز

 

كورده‌یل فه‌یلى گه‌وراترین پیكهاته‌یگ بوین تویش ئى هه‌مگه‌ كاره‌سات و مه‌ینه‌تیه‌یله‌ هاتن و هیمان تائیسه‌یش ئه‌و سته‌مه‌ ده‌رهه‌قیان وه‌رده‌وامه‌و هه‌قه‌یلیان وه‌رنه‌گرتنه‌و قوربانیداینیان له‌وه‌رچه‌و نه‌گیریاگه‌و قه‌در نه‌نریاس له‌و هه‌وڵ و هه‌ڵویسته‌یل نیشتمانى و پشتگیریه‌ له‌ گشت هیزه‌یل سیاسى و ئه‌و هه‌ڵویسته‌یل پڕ له‌ ئازایه‌تى و دیاره‌ دژ كوده‌تاى سیه‌ى به‌عس له‌ 8 شوبات ساڵ 1963.

بیجگه‌ ئه‌وه‌یش كورده‌یل فه‌یلى هیمان پیكهاته‌یگ كاراو شماره‌یگن گرینگ له‌ مه‌یدان عراقى و مه‌ردمانیگ كاران له‌ هه‌رێم كوردستان و كاریگه‌رن له‌ ناوچه‌یل كوردستانى ده‌یشت هه‌رێم، وه‌لى تویش نائومیدى هاتنه‌ له‌وه‌ختیگ پرووسه‌ى سیاسى فه‌رامووشیان كرد و سه‌ركرده‌ى حزبه‌یل دویاى وه‌رگرتن ده‌سڵات واز له‌لیان هاوردن، ك گشت چشتیگ ئاشكرا بوى و گشت نیازه‌یل ده‌رهه‌ق فه‌یلیه‌یل ئاڵشت بوى و پاك نه‌وى له‌ هه‌نایان و گشت قه‌وڵه‌یل ك له‌لایه‌ن زوورم هیز و حزبه‌یل سیاسیه‌و وه‌پیان دریا راس ده‌رنه‌چى و قه‌وڵه‌یلیان ناوردنه‌ جى، یه‌یش له‌وه‌ختیگ ئه‌نجوومه‌ن نوێنه‌ره‌یل عراقى له‌ى دویاخره‌ بڕیار یاساى هه‌ڵوژاردنه‌یل په‌رله‌مانى ئاینده‌ دا وه‌بى ئه‌وه‌ك هه‌قه‌یل كورد فه‌یلى له‌وه‌رچه‌و بگرید له‌ڕوى نوێنه‌رایه‌تیكردنیان له‌ په‌رله‌مان ئاینده‌.

له‌راسى ئه‌زموون تیه‌ڵیگه‌ ئه‌ڕایان له‌وه‌ختیگ هویره‌و له‌لى ئه‌كه‌ن، وه‌لى بایه‌سه‌ بووده‌ په‌ندیگ ئه‌رایان له‌وه‌رانوه‌ر ئه‌وانه‌گ هه‌ڵویسته‌یلیان فه‌رامووش كردن له‌ گشت مه‌سه‌له‌یل نیشتمانى، ئه‌یه‌ له‌لایگ .

له‌لایگ تریشه‌و چویچیان و له‌یه‌كترازیان كورده‌یل فه‌یلى له‌ كزه‌وبوینیان فیشتره‌و كرد و روى كردنه‌ دامه‌زرانن گرووپه‌یل سیاسى و یه‌یش خزمه‌ت وه‌ كیشه‌گه‌یان ناكاو له‌ هه‌مان وه‌خت هه‌وه‌جه‌ وه‌ یه‌كه‌وگرتن و یه‌كڕزى دیرن و بایه‌سه‌ یه‌كهه‌ڵویست بیاشتوون تا گرده‌و بوون و گشت ئه‌و جیاوازیه‌یلیه‌ له‌ هویرو راى ده‌رخه‌ن و به‌رژه‌وه‌ندى عراق وه‌گشتى و به‌رژه‌وه‌ندیه‌یل خوه‌یان وه‌تایبه‌ت بخنه‌ وه‌رچه‌ویان و ئه‌وسا هه‌ڵویستیگ تر نیشتمانى ئه‌رایان نویسریه‌ید و ئه‌خریه‌یده‌ بان هه‌ڵویسته‌یل تر رووشناى نیشتمانیان ك ئاشكراس له‌لاى گشت روڵه‌یل ملله‌ت، ك ئه‌ویش وه‌ به‌شداریكردنیان له‌ بنیاتناین عراق تازه‌ له‌ په‌یڕه‌وكردن دیموكراسى و دامه‌زرانن ده‌وڵه‌تیگ ك گشت مه‌ردم له‌تى یه‌كسان بوون وه‌بى جیاوازى ره‌گه‌ز و نه‌ته‌وه‌و باوه‌ڕ و ئایین و ره‌نگ و مه‌زه‌و یا هووكار بار ئابوورى و پله‌ى كومه‌ڵایه‌تى.

ئمجا تا ئیسه‌یش ده‌رفه‌تیگه‌ ئه‌رایان، ك ئه‌ویش له‌شوون یه‌كه‌وگرتن و یه‌كده‌نگى بایه‌سه‌ دى متمانه‌ وه‌ قه‌وڵ ئه‌وانه‌ نه‌كه‌ن ك دروو وه‌لیانا كردن و لایگ نه‌كردنه‌ لاى هه‌قه‌یلیان له‌ نوێنه‌رایه‌تیكردنیان له‌ په‌رله‌مان ئاینده‌، وه‌نا كه‌فنه‌ گووشه‌ى دڵته‌نگى، هه‌ر وه‌و خاتریشه‌ هیمان كه‌سه‌یلیگ دووس و ره‌فیقیش هه‌ن چه‌وه‌ڕى وشه‌یگ یا ئاماژه‌یگ له‌لیان ئه‌كه‌ن وه‌ى خاتره‌، هه‌ر له‌وه‌ر ئه‌وه‌یش بایه‌سه‌ فه‌یلیه‌یل تواناى خوه‌یان ریكبخه‌ن و كار ده‌سه‌جه‌مى بكه‌ن تا بتویه‌نن بڕه‌سنه‌ ئاكام خاسیگ و گشتیان وه‌ ئامانجیگ هاوبه‌ش بره‌سن.

محه‌مه‌د عه‌لى سه‌ماوى

ج . أ