جاریگ تر مه‌ته‌ڵ كیشه‌ى كورده‌یل فه‌یلى

شفق نيوز

هه‌ر له‌وه‌ر ئه‌وه‌یش گشت قه‌واره‌ و كه‌سایه‌تیه‌یل سیاسى له‌وه‌خت ئۆپۆزسیۆن یا له‌سه‌رده‌م عراق تازه‌ گرده‌وبوین وه‌ خاتر ئه‌وه‌ك چین كورده‌یل فه‌یلى وه‌رجه‌ گشت پیكهاته‌یگ له‌ى عراقه‌ شایسته‌ى ئه‌وه‌نه‌ گرنگى یا ئه‌همیه‌ت وه‌پیان بدریه‌یگ  له‌ هاوردنه‌وه‌ى گشت ئه‌و هه‌قه‌یلیانه‌ ك ده‌سڵات سته‌مكار دكتاتۆرى وه‌دڕه‌نده‌ترین شیواز و دویر له‌ یاسا و چه‌واشه‌ى ده‌ستوور زه‌فتى كرد له‌لیان.

جى باسه‌ ك كه‌سایه‌تیه‌یل فه‌یلى ئه‌وسا له‌ چالاكترین كه‌سایه‌تیه‌یل سیاسى بوین له‌وه‌خت ئۆپۆزسیۆن و ده‌نگ فه‌یلى هه‌میشه‌ وجوود داشت و كارا یا فه‌عال بوى، ئه‌وه‌ بوى ك زوورم روڵه‌یل كورد فه‌یلى له‌وه‌خت رمیان بته‌گه‌ى به‌غدا و كووتاییهاتن سه‌رده‌م دكتاتۆریه‌ت خوه‌شحاڵى فره‌یگ نیشاندان و هه‌میشه‌ چه‌وه‌ڕى سه‌ركردایه‌تیه‌یل تازه‌ بوین له‌وانه‌ك خه‌ریك بوین وه‌ ریكخستن وه‌زعه‌یل عراق تازه‌و له‌و باوه‌ڕه‌ بوین ك وه‌خته‌گه‌ له‌ به‌رژه‌وه‌ندى كورده‌یل فه‌یلیه‌و ئه‌و كه‌سایه‌تیه‌یل سیاسیه‌ ك له‌وه‌خت ئۆپۆزسیۆن په‌یوه‌ندى خاسیگ وه‌پیانه‌و داشتن و زوڵم و جه‌ور فره‌یگ كیشان وه‌ده‌س ده‌سڵات دكتاتۆر، هه‌ر نه‌وگ برایه‌یل كورد فه‌یلیان له‌هویره‌و نیه‌وه‌ن، جویر ئه‌وه‌ك ئى به‌یته‌ شعره‌ له‌بانیان گونجیه‌یگ ك ئویشیگ:

شكات زه‌خمد وه‌ مه‌ردم مه‌كه‌ ك خوه‌دید خاوه‌نى

ته‌نیا ژاندار نه‌وگ هویچ كه‌سیگ وه‌ ژاند نیه‌زانى

ئه‌وه‌ بوى دى دوسیه‌ یا مه‌له‌فه‌یلیان نویقیاو له‌هویره‌و بریان تا ڕاده‌یگ باس له‌لیان كریا له‌ره‌سانن یا ئعلام و ناویان بریا له‌قسه‌و باسكردن، وه‌لى له‌ڕاسى فه‌رامووش كریان، دى له‌شوون ئه‌وه‌یش ده‌نگه‌یل فره‌یگ  به‌رزه‌و بوى ئه‌را داواكردن وه‌كاربردن وژدان و هاوردنه‌وه‌ى هه‌قه‌یل ڕه‌وایان له‌و ماڵ و موڵك و داراییه‌ ك له‌لیان زه‌فت كریا، بیجگه‌ ئه‌وه‌یش ده‌نگه‌یل زیاتره‌و بوى له‌وانه‌ك داواكردیان بخریه‌نه‌ هویر، بیگومان یه‌یش له‌وه‌ختیگ ك هیمان فره‌یگ له‌كورده‌یل فه‌یلى ته‌نیا هه‌ر ئه‌وان له‌ژیر ده‌وار په‌نابه‌رى له‌ئیران ژیان ناخوه‌شیگ به‌نه‌ سه‌ر و حكوومه‌ته‌یل یه‌ك له‌شوون یه‌كیش هه‌ر هانه‌ هویر ئه‌و براو خوه‌یشكه‌یلمانه‌ ك نیشته‌جى بوینه‌ له‌ قاهیره‌و سه‌نعاو بنغازى و ترابلس ك وه‌زویترین وه‌خت بانه‌و ئه‌را وڵات خوه‌یان.

تویه‌نیم بویشیم وه‌زع كورده‌یل فه‌یلى هیمان هه‌ر له‌یوا مه‌ندگه‌و كیشه‌یلیان له‌لایه‌ن گشت حزبه‌یل سیاسیه‌وه‌ خریاسه‌ خانه‌ى گومبوین و بوینه‌سه‌ وه‌ره‌قه‌یگ و كه‌فتنه‌سه‌ ژیر قسه‌و باس و مه‌زاد و له‌ هه‌مان وه‌خت ڕه‌نجخوه‌رى یا ئستغلال كریه‌ن له‌ڕوى ده‌ركه‌فتن و نه‌فوه‌رگرتن له‌ ده‌نگه‌یلیان و دى چشتیگ تر نه‌مه‌ندگه‌ له‌ مه‌سه‌له‌گه‌ ته‌نیا ئه‌و هه‌قه‌ نه‌وگ ك هویچ هیزیگ له‌ دونیا نیه‌تویه‌نیگ بڕفنیگه‌ى یا بتاڕنیگه‌ى ك داواى كریه‌یگ .

له‌وه‌ختیگ ك دادگاى باڵاى تاونه‌یل عراقى بڕیار خوه‌ى ده‌ركرد، وه‌ ئه‌وه‌ك كیشه‌ى كورده‌یل فه‌یلى و ئه‌وه‌ك هاته‌ تویشیان له‌ماوه‌ى ده‌سڵات رژیم رمیاگ، یه‌كیگه‌ له‌ تاوانه‌یل له‌ناوبردن وه‌جه‌م، ك نیه‌توان ناوه‌ڕوك و ماناى ئه‌و بڕیاره‌ وه‌ ته‌واوى له‌یه‌كه‌و بیه‌ن ك جویر قانوونیگه‌و پابه‌ندى نیه‌كریه‌یگ وه‌و بڕیار و قانوونه‌یله‌ ك هه‌ق ئه‌را خاوه‌نى تیه‌ریگه‌و.

كورده‌یل فه‌یلى مزگانى خوه‌شیگ وه‌پیان دریا، وه‌ ئه‌وه‌ك سه‌رۆك وه‌زیره‌یل له‌ بڕیار شماره‌( 426) له‌ساڵ 2010 له‌ 8/12/2010 جه‌خت له‌بان بڕیار دادگاى باڵاى تاوانه‌یل عراقى ئه‌كا و قه‌وڵ ئه‌وه‌دا هه‌ق ره‌واى كورده‌یل فه‌یلى ئه‌گه‌ر به‌شیگش له‌لى بویه‌ هه‌ر باریه‌یگه‌و ئه‌ڕایان و گشت ئه‌و وه‌ربه‌سه‌یله‌ لاوه‌یگ له‌وه‌رده‌میان ك رژیم رمیاگ دروسى كرد جویر بڕیار ده‌رهه‌ق وه‌ روڵه‌یل ملله‌ت عراق له‌ كورده‌یل فه‌یلى جوور(سه‌ندنه‌وه‌ى شوناسنامه‌ى عراقى و زه‌فتكردن دارایى و ماڵ وموڵك) و هه‌قه‌یل تر، وه‌لى وه‌خت فره‌یگ وه‌بانیا ڕه‌ى بوى وه‌بى ئه‌وه‌ك كورده‌یل فه‌یلى چشتیگ له‌و بڕیار  و قانوونه‌یله‌ بایگه‌ ده‌سیان و قورتاریان بكا له‌و ناڕه‌حه‌تى و ناخوه‌شیه‌یله‌ ك له‌تى ژیه‌ن، وه‌جووریگ ك وه‌خته‌گه‌ تاو ده‌یگ و تا ئیسه‌یش كیشه‌گه‌یان خریاسه‌ خانه‌ى له‌هویره‌وبردن. بیگومان بڕیار دادگاى تاوانه‌یل له‌وه‌ر خاتر كیشه‌ى كورده‌یل فه‌یلى نه‌وى وه‌گووره‌ى ئه‌وه‌ك ئه‌وه‌نه‌ ئاشكراو شیه‌وكه‌ر بوى له‌ ده‌سنیشانكردن ئه‌وه‌ك هاته‌ تویشیان له‌زوڵم و سته‌م، هه‌ر له‌وه‌ر ئه‌وه‌یش ئه‌نجوومه‌ن نوێنه‌ره‌یل وه‌رپرس بوى له‌بان وه‌كارخستن قانوونه‌یل و لاوردن ئه‌و زوڵمه‌ ك وه‌پیان ره‌سى، ئمجا كورده‌یل فه‌یلى جاریگ تر خوه‌شحاڵ بوین له‌وه‌ختیگ یه‌كیگ له‌ ئه‌ندامه‌یل په‌رله‌مان كیشه‌گه‌یان خسته‌ڕوى له‌وه‌ر خاتر تاوتویكردن و خوه‌ندنه‌وه‌ى، وه‌لى ئه‌وه‌ بوى له‌وه‌ختیگ باس له‌و مه‌سه‌له‌ كریا شماره‌ى فره‌یگ له‌ نوێنه‌ره‌یل ملله‌ت خوه‌یان له‌و دانیشتنه‌ كیشانه‌وه‌و ئیمه‌یش نیه‌زانیم هووكار ئه‌و ڕه‌فتار و خودكیشانه‌وه‌ چه‌ بوى ك كار ئه‌نجوومه‌ن په‌ك خست و قانوونه‌گه‌ ئفلیج كرد.

بیگومان ئه‌وه‌ ده‌رفه‌ت و هه‌ڵویستیگ نیشتمانى عراقى بوى و ئه‌نجوومه‌ن نوێنه‌ره‌یل و ئه‌ندامه‌یل تویه‌نستن له‌تاریخ عراق و ئنسانیه‌ت توومارى بكه‌ن و بنویسیه‌یگ ، وه‌تایبه‌ت ئه‌وانه‌ك ده‌نگ وه‌پیان دایم و هه‌ڵیانوژانیم و بوینه‌ كه‌سه‌یل بڕیارده‌ر ك ئومید وه‌پیان داشتیم و ئه‌و قانوونه‌یله‌ وه‌پیان جى وه‌جى كریه‌یگ ك زوڵم له‌بان ئى چین خه‌باتكه‌ر و زوڵملیكریاگه‌ لاوه‌یگ .

ئیمه‌ نیه‌توایم دوباره‌ى ئه‌و باسه‌یله‌ بكه‌یم ك چه‌ هاته‌ تویش كورده‌یل فه‌یلى و قانوون گورج و جى وه‌جیكاریش ئه‌و زه‌خمه‌یلیانه‌ ساڕیژ ناكا ك هیمان داڵگه‌یل جگه‌رسزیاگ ئه‌سر چه‌و ڕشنن ئه‌را ئه‌و ڕوڵه‌یلیانه‌ ك سه‌دام دكتاتۆر وه‌پیسترین شیواز له‌ناویان برد و خیزانه‌یل فره‌یگیش وه‌ به‌دبه‌ختى و بیچاره‌یى كووچ زووره‌ملى وه‌پیان كریاو ڕوڵه‌یلیان له‌لیان دویره‌وخستن و شه‌هید كریان.

ئمجا ئه‌وه‌ك رویدا وه‌رجه‌ ماوه‌یگ له‌ دانیشتن ئه‌نجوومه‌ن نوێنه‌ره‌یل وه‌تایبه‌ت له‌وه‌خت خستنه‌ڕوى كیشه‌ى كورده‌یل فه‌یلى، بى ئه‌نجام بوى له‌و پرووژه‌ قانوونه‌و كورده‌یل فه‌یلى سه‌ریان سڕ مه‌ند له‌ زانستن ئه‌و مه‌ته‌ڵه‌ له‌باوه‌ت كیشه‌گه‌یان و له‌یوا كرد ك نه‌زانن كامنیان دووسیانه‌و كى دوشمنیانه‌!!، یه‌یش له‌وه‌ختیگ كورده‌یل فه‌یلى چینیگ ره‌سه‌نن له‌ى كومه‌ڵگاى عراقیه‌ نه‌ك هه‌ر ته‌نیا قوربانى و شه‌هید دانه‌، به‌ڵكوو به‌شدارى كارایگیش داشتنه‌ له‌ بنیاتناین ده‌وڵه‌ت عراق و تواناى ئه‌وه‌ دیرن وه‌زع ئابوورى عراقى وه‌ره‌و خاسى بووه‌ن.

ئه‌یه‌ ده‌رفه‌تیگ تاریخیه‌و چوود و دى نیه‌تیه‌یده‌و، ك ئه‌نجوومه‌ن نوێنه‌ره‌یل ئى ده‌وره‌ یا ماوه‌ نیه‌نووڕنه‌ پیه‌وه‌و خه‌ریك پروسه‌یل جوراوور خوه‌یانن و یه‌یش له‌وه‌خت دانیشتنه‌یلیان به‌یگ ، وه‌ل ئه‌وه‌یشا تویه‌نیم بویشیم ده‌رفه‌ت تاریخییگیشه‌ ئه‌را سه‌رۆك كومار عراق له‌شوون ئه‌وه‌ك نویسینگه‌ یا مه‌كته‌بیگ دامه‌زران ئه‌را كاروبار كورده‌یل فه‌یلى و چه‌وه‌ڕى كار به‌ڵگه‌داریگ له‌لى كریه‌یگ ، بیجگه‌ ئه‌وه‌یش ده‌رفه‌تیگیشه‌ ئه‌را سه‌رۆك وه‌زیره‌یل ك ماوه‌ى چه‌ن مانگیگه‌ ڕه‌ى بویه‌ له‌بان ئه‌و قه‌وڵه‌ ك داره‌ى كورده‌یل فه‌یلى له‌ چه‌ودیریكردن وزاره‌ته‌یل له‌ماوه‌ى 100 رووژ.

ئمجا له‌وه‌ر ئه‌وه‌ك كیشه‌ى كورده‌یل فه‌یلى وه‌و جووره‌ نه‌مینیگ ، دى مینیگه‌ بان ئه‌و ده‌نگه‌یله‌ ك وه‌ وژدانه‌و داواى هه‌قه‌یلیان بكه‌ن و پشتگیرى بكه‌ن له‌وه‌ر خاتر كیشه‌ى هه‌ق له‌ عراق، هه‌ر له‌وه‌ر ئه‌وه‌یش تا كیشه‌ى كورده‌یل فه‌یلى جویر مه‌ته‌ڵیگ نه‌مینیگ ، بایه‌سه‌ ئاشكراى ئه‌وه‌ بكه‌یم هووكار چارسه‌رنه‌كردنى چه‌س، بیجگه‌ ئه‌وه‌یش بایه‌سه‌ بزانیم كى ده‌س دیریگ له‌ى كاره‌و نیه‌یلیگ چاره‌سه‌ر بكریه‌یگ ، تا كورده‌یل فه‌یلى بزانن كى له‌پشت هانده‌ر ده‌سڵات دكتاتۆر رمیاگ بوى تا ڕوڵه‌یلیان ده‌سگیر وبى سه‌روشوون بكا و له‌ بیاوانه‌یل بكوشیگه‌یان و شوناسنامه‌ى عراقى له‌لیان بسینیگه‌وه‌و دارایى و ماڵ و موڵكه‌یلیان له‌لیان زه‌فت بكا.