ئه‌ی ئاده‌ميزاد فه‌يلی مقه‌يه‌ت دڵسووزيێد به‌ ئه‌را رووژ سه‌خت

شفق نيوز

بڕ فريه‌يگ له‌ دڵته‌نگی وئشق ديرێد ئه‌را خزمه‌ت ئی پيكهاته‌ ك هيمان كه‌ڵكه‌س له‌لاد و وه‌ختيش ده‌رفه‌ت وه‌پێد نايه‌ێد تا كه‌ميگ به‌تاڵ بوێد له‌و خه‌زينده‌ ك قورستره‌ له‌وه‌گ هه‌ڵيگرێد وه‌ل خوه‌د و بارێده‌ كار له‌ سيمينار و كۆنگره‌يل و له‌ دادگايه‌يل و فيستيڤاڵه‌يل و بوونه‌يل و ته‌نانه‌ت له‌ ميوانييش و له‌ هه‌ر شوونيگ ك مه‌ردم باس له‌ كيشه‌گه‌د بكا.

ئمجا دوينێد له‌ هه‌ر باس و دانيشتن و تاوتويكردنيگ مه‌يلد كيشێد و فيشتر ئه‌چێده‌ ناوه‌ڕووك ئه‌و خه‌زين دڵته‌نگيه‌و ئه‌گه‌ريش پيشوازی له‌لێد كردن له‌ جه‌شنه‌يل و بوونه‌يل و باس كيشه‌گه‌د وه‌ ده‌نگ به‌رز دوباره‌وه‌ كردن و قسه‌ی مه‌ردم له‌ هه‌ر شوونيگ گونجيا وه‌ل قسه‌د يا ناڕه‌حه‌تد كرد و ته‌نانه‌ت هه‌رچه‌نی ك ره‌فيقه‌يل هاوكووچ وه‌پيكرياگديش خه‌نستن و خه‌ناننه‌د يا هه‌نای داوه‌تد ئه‌كه‌ن ئه‌را ديده‌ن چشت جوانيگ، له‌گشت ئه‌و هه‌ڵويسته‌يله‌ هه‌ر بايه‌سه‌ چشتيگ له‌ وه‌فاد بارێده‌ كار ئه‌را ئه‌وانه‌گ خوه‌شد له‌ليان ئه‌يادو ئه‌وانه‌گ وه‌ ئه‌زره‌تێد ئه‌را ديداريان.

دی چه‌نيگ جوانه‌ ك چشتيگ له‌ شرينی شيوه‌زار و زووان و داب ونه‌ريته‌ نه‌ته‌وه‌ييه‌گه‌د بارێده‌ كار و گوزاره‌و تاريفه‌يليگ له‌بان سه‌نگ نه‌قش بكه‌ێد ئه‌را ده‌رخستن جوانی ره‌سه‌نايه‌تی ئه‌و ديداره‌ وه‌ هووكار مه‌ندنه‌وه‌و داواكار بوێد هاوسايه‌يل ترد كووچ نه‌كه‌ن.

وه‌لی هه‌نای ك پيری فيشتر له‌لێد نزيكه‌و ئه‌دێ كه‌سه‌يل تر له‌لێد دويره‌و ئه‌خا و تومه‌تبارد ئه‌كه‌ن وه‌ به‌شكردن باوه‌ڕه‌يل و چه‌واشه‌كردن راسيه‌يل و جياوازيكردن ناونی خوه‌شه‌ويسه‌يل و ئستغلالكردن متمانه‌ی كه‌سان تر، ك ئايا ئه‌وه‌گ بڕه‌سێده‌ ئی قوناغه‌ شايسته‌ی گشت ئی تومه‌ته‌يله‌سه‌؟

وه‌ختيگيش ك ئه‌ڕه‌سنه‌ ته‌مه‌ند و خه‌زينيان پڕ ئه‌دێ، دی ئه‌و وه‌خته‌ له‌ مه‌ينه‌تيه‌يل پيريێد ئه‌ڕه‌سنه‌و ك تاميگ فه‌يليانه‌ ديرێد و ئه‌وسايش باس ئه‌كه‌ن وه‌بی يادكردند. دی نوڕێد ئی خوه‌شه‌ويسييه‌ چه‌نيگ ئه‌ڵلاجه‌ويه‌ ك گوزه‌رد ئه‌كا ئه‌ی ئاده‌مياد فه‌يلی و ئه‌ڵلاجه‌ويتر له‌وه‌يش خوه‌شه‌ويسی كه‌سه‌يل تره‌ وه‌رانوه‌رد.

هه‌ر وه‌و خاتريشه‌ دوينێد گشت مه‌ردمه‌گه‌ دڵنيان له‌وه‌گ له‌گشت دڵيگه‌و خوه‌شيان تواێد و هه‌رچه‌نی دڵسووزی و به‌زه‌ييديش فيشتره‌و بوود ئه‌وان فيشتر كينه‌تداره‌و بوون، دی ئه‌وه‌يش نه‌ تاوان ئه‌وانه‌و نه‌يش تاوان تنه‌، ئمجا گشت باسه‌يل خوه‌شه‌ويسی وه‌ی جووره‌ ژنه‌فتيمنه‌سه‌ی و هه‌ر له‌وه‌ر ئه‌وه‌يش مقه‌يه‌تی له‌ دڵسووزيێد بكه‌ ئه‌را رووژيگ نه‌ دويننه‌د و نه‌ ناسنه‌د و نه‌يش ژنه‌فنه‌د، رووژيگ ك وه‌رده‌وام ئه‌دێد له‌ بنياتناين خوه‌شه‌ويسی وه‌ دڵد و ئه‌وانيش وه‌رده‌وامن له‌ ويرانكردن، دی ئه‌و رووژيشه‌ رووژ سه‌ختيگه‌.

شه‌يما كه‌ريم