بیده‌نگ بوون.. سارا ئه‌خوازێ بخه‌فێد

شفق نيوز

ترس له‌ سروشت جوور رویداین زه‌ویه‌له‌رزه‌و گه‌رده‌لویلان و لافاو، وه‌لى ملله‌ته‌یل تر هه‌ن ناخه‌فن له‌ ئاكام كیشمه‌كیشه‌یل ناوخوه‌یى سیاسى و چینایه‌تى و نه‌ته‌وه‌یى، ملله‌ت عراقیش نواینه‌ى ئه‌و ملله‌ته‌یله‌نه‌، ئمجا ئه‌زره‌ته‌یل گڕدارمان هه‌ر له‌دڵ شاریاسه‌وه‌و دى واوه‌شن قانجازى چه‌ بوود ئه‌را جموجویلداین هه‌وا له‌و گڕه‌ى گه‌رمیه‌.

 

 

ئه‌گه‌ر هه‌وڵ ئه‌وه‌ بیه‌یم باس ئه‌و رویداگه‌یله‌ بكه‌یم ك ئه‌یه‌ێده‌ بان ئى ملله‌ته‌، ناڵنید وه‌ده‌س یه‌ك ژانه‌و ك هه‌زاران ده‌رمان ئه‌ڕاى تاریف كریاگه‌و داوا له‌لى كریه‌ێد هه‌زار ڕى بگرێده‌ وه‌ر، وه‌لى ڕى قورتاربوینى ته‌نیا ڕییگه‌، ئنجا گشت مه‌ردم باس له‌ قه‌ومایه‌تى كه‌ن، وه‌لى له‌ڕاسى ئیمه‌ غه‌ریبیم ئه‌را یه‌كترى.

 

ئیمه‌ باس له‌ ئومید و ئاره‌زووه‌یل مردگ ناكه‌یم، به‌ڵكوو هایمنه‌ هووڵ ئاده‌میزاد عراقى سه‌رده‌م، ئه‌گه‌ریش بتوایم وه‌ دقه‌ته‌و ته‌ماشاى ئى چشته‌ بكه‌یم ئه‌و چشته‌یله‌ دیریم له‌ ناونى سیاسیه‌یل هه‌س و له‌ كه‌ناڵه‌یل ئاسمانى باسیان كریه‌ێدو له‌گووشه‌ى رووژنامه‌یل و ماڵپه‌ڕه‌یل ئه‌لكترۆنى باسه‌یل فره‌یگ له‌بانیان نویسیه‌ێد، دى ئاشكراس ك خود خوه‌مان بڕیار مه‌رگ لاشه‌ى ئاده‌میزاد ده‌یم نه‌ك دوشمنه‌یلمان له‌ده‌یشت مه‌رزه‌و.

 

ئمڕوو عراق جنگ داڕزیاگیگ پووشاگه‌و نیشانه‌یل جوانى له‌روخسارى نه‌مه‌ندگه‌و خاكه‌گه‌ى شه‌قشه‌قه‌و بویه‌و ئه‌ور واران له‌لى داسه‌ شه‌قه‌ى باڵ و كه‌ش وهه‌وایگ پڕ گه‌ردو لماوى گرته‌سه‌ خوه‌ى.

 

وه‌ دریژایى ساڵه‌یل سه‌ده‌ى بیس ره‌نگ سیه‌ زاڵ بویه‌ بان ئاره‌زوو عراقیه‌یل ته‌نیا مه‌ردم كه‌میگ نه‌ود له‌لیان ك باوه‌ڕ وه‌ بیده‌نگى و كزى نه‌یرن، دى كیشه‌یل عراق چوین چاره‌سه‌ر بوود له‌وه‌ختیگ ك رژیمه‌یل پاشایه‌تى و كومارى وه‌ كوده‌تایان و رژیمه‌یل په‌رله‌مانى وه‌ هه‌ڵوژاننیان تواناى خزمه‌تكردن ئى ملله‌ته‌ نه‌یرن و ناتویه‌نن له‌ بار مه‌ینته‌تیان كه‌مه‌و بكه‌ن! ئه‌گه‌ر چاره‌سه‌ر ها لاى دارایى، خو ئه‌وه‌ ملیاره‌ها پویل دیریم، وه‌لى كیشه‌گه‌ ها له‌ورا كى وه‌شیوه‌ى گونجیاگ و له‌بان به‌رنامه‌یگ ك ئامانجى به‌رژه‌وه‌ندى هاووڵاتى بوود خه‌مخوه‌ر بوودو هه‌وه‌جه‌ وه‌ چه‌ن ساڵ دیریم ئه‌را جیوه‌جیكردن ئى جووره‌ به‌رنامه‌یگ ؟.

 

باوه‌ڕم یه‌سه‌ ك ئیمه‌ هه‌وه‌جه‌ وه‌ جورئه‌ت قسه‌كردنم دیریم، مه‌كه‌فنه‌ شوون بكوش نادیار، خود خوه‌مان ئى وڵاته‌ كوشتیم، چوینكه‌ ئیمه‌ تواناى لاوردن دیارده‌ى گه‌ناته‌كارى و بیكارى و خراوى خزمه‌تگوزارى و ئاسایش و كیشمه‌كیشه‌یل سیاسى و كوومه‌ڵایه‌تى و مه‌زه‌وى نه‌یریم. لایه‌نیگ نیه‌ چاره‌سه‌ر 10% كیشه‌ى ئى ملله‌ته‌ بكا، ئه‌ى دى ئه‌و 90%ه‌گه‌ى چوین؟ یه‌ ئاره‌زوویگه‌و جیوه‌جیكردنى مه‌حاڵه‌، په‌ره‌سه‌ندن و گه‌شه‌كردن چوین نه‌خش خوه‌ى بوینید وه‌بى ئامار و پلان ته‌واویگ وه‌بى هه‌وه‌جه‌كردن ته‌كنۆلۆجیاو دامه‌زراننى وه‌شیوه‌یگ خواست، وه‌بى داین ئه‌و قه‌رزه‌یل كه‌ڵه‌كه‌كریاگ سه‌رده‌مه‌یل وه‌رینه‌ له‌بانمان، وه‌بى ركابه‌رى له‌چوارچیوه‌ى پیشه‌یى و گفت و ڕه‌فتاره‌یل خاس، وه‌بى له‌یه‌ك وه‌خشین و زاڵكردن به‌رژه‌وه‌ندى نیشتمان، ئى گرفته‌ چوین چاره‌سه‌ر بوود؟.

 

دوینید ئمڕوو لێدوانه‌یل سیاسیه‌یل له‌جاده‌ قورب ده‌ركرد، وه‌لى خواست و داواكاریىیل مه‌ردم له‌لاى ده‌سڵات ئه‌رزانه‌و بوى! هه‌ر له‌وه‌ر ئه‌وه‌یش ئویشیم: وه‌خت په‌یوه‌ندیه‌یل كلاسیكى و گونجیان نائاشكرا چیه‌ ڕییه‌و، شیواز خه‌فانن مه‌ردم جوور ئه‌وه‌ك وه‌ل مناڵه‌یلا ئه‌نجامى ده‌یم نه‌مه‌ند، ئیسه‌ كه‌س له‌ى وڵاته‌ ناخه‌فێد له‌ساى نه‌وین به‌خته‌وه‌رى، به‌ڵكوو چشته‌یلیگ هه‌ن هه‌میشه‌ خه‌و له‌لیمان زڕاننه‌و له‌وانه‌یش: گه‌رماى تیندار و نه‌وین كاره‌باو له‌كاركه‌فتن پیشه‌سازى و بازرگانى و كشتوكاڵ و گرانى ژیان، وه‌ل ئه‌وه‌یشا خوه‌ندكاره‌یل خوه‌ندنگاو زانكۆیه‌یل گیر هاتنه‌ وه‌ده‌س هویره‌وكردن له‌ تاقیكردنه‌یل و ئه‌نجامه‌یلى، بیكاره‌یلیش مه‌ویسن وه‌ده‌س وه‌دیكردن ده‌رفه‌ت كار، وه‌لى سیاسیه‌یل مه‌ترسى له‌ ئاینده‌ى پله‌و پۆسته‌یلیان دیرن، ئنجا ئیسه‌ بویشنه‌ پیمان ئه‌گه‌ر سیاسى و رووشنهویر و پیاگ دینى و كاسبكار گشتیان ناخه‌فن، ئه‌ى دى چوین ساراى دویه‌تم و باقى مناڵه‌یل تر خه‌و خوه‌شى بكه‌ن؟

سوندس مێرزا

ج. ا