ده‌نگه‌وداین مۆسیقا له‌ هه‌رێم كوردستان ئۆركستراى ڕانیه‌ وه‌ك نموونه‌یگ

شفق نيوز

ئاماده‌یى جوانیگ له‌ داناین یائبداع له‌ى لایه‌نه‌وه‌ نیشان ده‌ن، ئمجا گوورانى كوردى جیاوازه‌ وه‌ گووره‌ى جوانى ئه‌و سروشته‌وه‌ ك وجوود دیریگ له‌ ده‌وروه‌رى جویر هه‌ڵه‌ت و به‌رز و نزمى جه‌وه‌ڵه‌یلى و سروشت پڕ له‌ سحره‌گه‌ى ك گشت ئه‌یانه‌ كاریگه‌رى دیریگ له‌بان گوورنى كوردى و هه‌ر ئه‌وه‌یش بویه‌سه‌ هووكار ئه‌وه‌ك هونه‌رمه‌نده‌یل و گوورانیچڕه‌یل كویه‌ن و تازه‌ وه‌ تایبه‌ت جایه‌ڵ جوانه‌یل جواو ئه‌و تایبه‌تمه‌ندى جیاواز بیه‌نه‌وه‌.

گوورانى كوردى شیواز فره‌یگ  دیریگ، له‌وانه‌یش گوورانى مللى وه‌ گشت جووره‌یلى ك ناسریاگه‌ وه‌كلاسیك گوورانى كوردى، بیجگه‌ ئه‌وه‌یش گوورانى كوردى وه‌گشتى دیاره‌ ك ره‌نگه‌یل جووراوجوور و هونه‌ر ئیقاع گریگه‌ خوه‌ى، ك فره‌یگ له‌گوورانیچڕه‌یل له‌ ژنه‌یل و پیاوه‌یل ئه‌لبوم گوورانى ده‌ركه‌ن و گشت پیشكه‌فتنیگ  له‌ژیان وه‌تایبه‌ت ژیان هونه‌ریه‌وه‌ دیاره‌ وه‌پیه‌وه‌، ئه‌یه‌ بیجگه‌ جوانى زانست مۆسیقا ك شماره‌ى فره‌یگ له‌ هونه‌رمه‌ند و مۆسیقاژه‌نه‌یل كورد ناودارى په‌یا كردن له‌ ژه‌نین و سه‌رڕشته‌ى هونه‌ر مۆسیقا ك زوان تایبه‌ت خوه‌ى دیریگ و له‌هه‌مان وه‌خت ژه‌نین مۆسیقایان قسه‌ وه‌ل روح ئاده‌میزاد ئه‌كاو سووز و خوه‌شه‌ویسى ده‌یگه‌ دڵ و ده‌روین گشت كه‌سیگ. وه‌ل ئه‌وه‌یشا هونه‌رمه‌نده‌یل كورد به‌رهه‌مه‌یل مۆسیقى خاسیگ  ده‌رخستنه‌ له‌بان كار تازه‌و بى وینه‌یگ، ك یه‌یش مه‌عناى ئه‌وه‌سه‌ مۆسیقا هووكاریگه‌و نه‌خش كریگه‌ریگ  دیریگ  ئه‌را به‌سانن پیه‌ڵ په‌یوه‌ندى له‌ناونى ژیار و رووشنهویریه‌یل و نزیكه‌وبوین وه‌ بوونه‌ى هونه‌ره‌وه‌ له‌وه‌رخاتر به‌شداریكردن له‌ یه‌كێتى په‌وه‌ندیه‌یل له‌ناونى ملله‌ت و نه‌ته‌وه‌یل جه‌هان، بیجگه‌ ئه‌وه‌یش باوه‌ڕ وزاره‌ت رووشنهویرى و جایه‌ڵ جوانه‌یل له‌ حكوومه‌ت هه‌رێم كوردستان وه‌ گرینگى یا ئه‌همیه‌ت هونه‌ر گوورانى و مۆسیقاو له‌هه‌مان وه‌خت مۆسیقا جویر هه‌وه‌جه‌یگ  خزمه‌ت وه‌ ئنسانیه‌ت ره‌سنیگ  و هووكاریگه‌ ئه‌را دریژه‌وكردن پیه‌ڵ هونه‌رى له‌ناونى كورد و ده‌وڵه‌ته‌یل جه‌هان.

ئۆكستراى رانیه‌ بڕیگ له‌ جایه‌ڵ جوانه‌یل مۆسیقاژه‌ن له‌ كوڕ و دویه‌ت گریگه‌ خوه‌ى له‌شار رانیه‌و یه‌كه‌مین نمایشیان له‌ رانیه‌وه‌ ده‌س وه‌پیكردو دویاى ئه‌وه‌یش له‌ سلێمانى و هه‌ولێر وه‌ سه‌رووكایه‌تى ماسترۆ نجات ئه‌مین ك له‌ساڵ 1966 له‌ شار كه‌ركووك هاته‌سه‌ دونیاو له‌ شلێمانى ژیاو دویاخر وڵات هیشته‌جى و ڕوى كرده‌ وڵات دانیمارك و له‌ورایشه‌وه‌ سه‌ردان وڵاته‌یل تر كرد و له‌ئه‌نجامیش باوه‌ڕنامه‌ى ماسته‌ر له‌ داناین مۆسیقا له‌ پۆلۆنیا هاورده‌ ده‌س، ك كار وه‌ل شماره‌ى فره‌یگ له‌ ئۆكستراى ئۆرپییا كردگه‌و كاره‌یل مۆسیقایى فره‌یگیش دیریگ.

 

محه‌مه‌د عه‌لى سه‌ماوى