ئایا سەردەم هەڕەشە و ته‌کڕەوی مه‌ندگه‌؟

شفق نيوز

جی داخه‌ ئمڕوو ك كورد ها له‌ هه‌وڵ ريكخستن ناوماڵ خوه‌ی و له‌وه‌خته‌يليگ ك روی وه‌ڕوی دوشمنيگ دڕنده‌ بويه‌سه‌و، نوڕيد له‌ چه‌ن بوونه‌يگ وه‌بی هويچ خواستيگ ئه‌وانه‌ك وه‌ قسه‌ پشتگيری له‌ ديموكراسيه‌ت و شارستانيه‌ت ئه‌كه‌ن له‌ڕاسی ره‌فتاره‌يليان چه‌واشه‌ی ئه‌ڕای چوينه‌يليانه‌و هه‌و گله‌وخواردن ئه‌يه‌ن ئه‌را سه‌رده‌م تيه‌ريكی و نه‌فامی و خوازن كوردستان بووه‌نه‌ دوياوه‌ ئه‌را باريگ ك هويچ كورديگ خوازيار ئه‌و وه‌خته‌يل تيه‌ريك و دژ وه‌ ئنسانيه‌ته‌ نيه‌.

ئى شيوه‌ ره‌فتار و قسه‌يله‌ له‌ مه‌سه‌له‌ی ناكووكی و نه‌گونجيان بيجگه‌ ئه‌وه‌ك ها له‌ به‌رژه‌وه‌ندی نه‌ياره‌يل كورد و هويچ تر له‌لی ده‌س ناكه‌فيد، ك يه‌يش خواست دڵسووزه‌يل ملله‌ته‌گه‌مان نيه‌ وهه‌ڵبه‌ته‌ ئی ئه‌ڕای چوينه‌يليشه‌ مه‌رام له‌لی شيوانن ئارامی و سه‌قامگيری كوردستانه‌ و مه‌ردمانيگ له‌لی خوازيارن ئی ناكووكيه‌يله‌ ك يه‌قه‌مان ئه‌گريد بدێده‌ ناكووكييگ سه‌رانسه‌ر كوردستان بگريده‌وه‌و هان له‌و باوه‌ڕه‌ وه‌ی قسه‌يله‌ ناكووكی ناونی خوه‌يان چاره‌سه‌ر ئه‌كه‌ن يا ساڕيژ زه‌خمه‌يليان ئه‌كا.    

ئمڕوو هه‌ر ناكووكيگييگ له‌ناو خود هه‌ر لايه‌نيگ زه‌ره‌د ئه‌ڕه‌سنيده‌ گشت ملله‌ت كورد، ك هه‌ر وه‌و خاتريشه‌ بايه‌سه‌ له‌ هه‌وڵ چاره‌سه‌ر گرفته‌يل بويم وه‌ شيوازيگ زانستيانه‌و باوه‌تيامه‌ ك يه‌يش له‌ به‌رژه‌وه‌ندی گشتلايگه‌.

ئمڕوو كوردستانيش مه‌رجه‌عيگ ديريد ك ملله‌ت ده‌نگ وه‌پی داگه‌ بيجگه‌ ئه‌و كه‌م و كوڕيه‌يله‌ ك وه‌دی ئه‌كريه‌يدو بيجگه‌ ئه‌وه‌يش سه‌رۆكيگ هه‌ڵوژرياگ ديريد ك زوورم ملله‌ت متمانه‌ وه‌پی داگه‌، ك بايه‌س گووش له‌ بڕياره‌يليان بگريم و نادی ته‌ماشای ئه‌و برياره‌يله‌ له‌ ديد حزبی وه‌رته‌نگه‌و پياده‌ بكريه‌يد ك چاره‌نويس ملله‌تيگ دياری ئه‌كاو به‌رژه‌وه‌ندی ملله‌ت بخاده‌ مه‌ترسی. ئمڕوو لايه‌نگر هه‌ر حزب و لايه‌نيگ وه‌ كار خزمه‌تگوزاری و خزمه‌تكردن گه‌شه‌ ئه‌كا و مه‌ردم له‌ ده‌ورگردی جه‌مه‌و ئه‌دێ، نه‌ك وه‌ هه‌ڕه‌شه‌و قسه‌ی بی بنه‌ماو دوير له‌ ڕاسيه‌يل، ك بايه‌سه‌ ئه‌وانه‌ك وه‌و شيوازه‌ ره‌فتار ئه‌كه‌ن خاس بزانن ك ئی جووره‌ قسه‌يل و زووان هه‌ڕه‌شه‌ ملله‌ت ره‌تيه‌و ئه‌كاو له‌ هويچ لايه‌نيگ قه‌بوولی ناكا.

شێركۆ حه‌بيب

ج . أ