ئه‌و رووژه‌يله‌گ عراق له‌رزنن

شفق نيوز

مانگ گوزه‌يشت و رووژ سێ شه‌ممه‌ی هه‌فته‌ی گوزه‌يشت ده‌رنيه‌كه‌فن ، وه‌لی ئی ته‌قينه‌وه‌يل دوياخره‌ هه‌رچه‌نی شماره‌ی قوربانيه‌يليشی كه‌م بوون هه‌ر عراق له‌رزنن و خه‌نه‌ی وه‌رده‌م دڵه‌ڕاوه‌كی گه‌ورايگ . هووكاره‌يل ئی رويداگه‌يليشه‌ ئاشكراس ، يه‌يش مه‌عنای ئه‌وه‌ نيه‌ لايه‌نه‌يل سياسی ناوخوه‌يی تاوانبار بكريه‌ن و تاوانباره‌يل سه‌ره‌كی ده‌رهه‌ق وه‌ خه‌ڵك عراق جوير( قاعيده‌و به‌عس) له‌بازنه‌گه‌ بكريه‌نه‌ ده‌يشت ، وه‌لی پرسيار له‌ورا يه‌قه‌ی عراقيه‌يل ناو پرووسه‌ی سياسی گريگ ك هه‌ر وه‌ختيگ ره‌سينه‌ ته‌نگی و ناڕه‌حه‌تی يه‌كسه‌ر كه‌فنه‌ قسه‌كردن له‌بان ئه‌من عراق .

وه‌ختيگ جياوازی يا ناكووكييگ په‌يا بووگ له‌نانی لايه‌نه‌يل جووراوجوور ، ده‌نگه‌يل نزم له‌و وه‌خته‌ به‌رزه‌و بوون ك هه‌ڕه‌شه‌ی تێكچگن وه‌زع ئه‌منی و ئاينده‌ی عراق بكه‌ن جوير ئه‌وه‌ك ريگه‌يگ تر (ده‌نگ به‌رزی) نه‌وگ له‌وه‌ زياتر . له‌وه‌رانوه‌ر ئه‌وه‌يش كويه‌نه‌ به‌عسه‌يه‌يل ره‌گه‌زپه‌رس و قاعيده‌ و ئه‌وعراقيه‌يله‌ ك لاينه‌گری له‌ليان كه‌ن  له‌وه‌خت ئارامی و گونجيان و بته‌وی هيزه‌يل ناوخوه‌يی هه‌ڕه‌شه‌ی خوه‌يان كه‌ن و له‌هه‌مان وه‌خت وه‌شيوه‌يگ ئاشكرا قه‌وڵه‌يل خوه‌يان له‌ناو خوين قوربانيه‌يل و هه‌ناسه‌ی پڕ له‌نائوميدی و به‌دبه‌ختی عراقيه‌يل دويننه‌وه‌ . بيگومان ئه‌نجام ئی مه‌سه‌له‌يليشه‌ وه‌گشتی ئه‌وه‌سه‌ ك به‌غدا خه‌ڵتان خوين كريه‌يگ ‌و زه‌ره‌دمه‌ن يه‌كميش مه‌ردم بيتاوانه‌ ، ئمجا له‌ئمڕوو وه‌دوياوه‌ شيه‌وكردن وله‌يه‌كه‌وداينيگ تر ئه‌ڕايان كريه‌يگ و دی مه‌ردم له‌و قه‌وڵه‌يل بی بنه‌ما ره‌سينه‌سه‌وه‌و دی باوه‌ڕ وه‌ گشت چشتيگ نيه‌كه‌ن ، وه‌ل ئه‌وه‌يشا وه‌خت ئه‌وه‌ هاتگه‌ نوڕستنيگ تر داشتويم ئه‌را گشت ئه‌و رووژه‌يل سيه‌ی پڕ له‌ كاره‌ساته‌يل عراقه‌ و ئه‌گه‌ر هات و هيزه‌يل تونڕه‌و ناو پرووسه‌ی سياسی و ئه‌وانه‌ك حه‌ز له‌كوشتن و بڕين و خوينڕشانن هاووڵاتيه‌يل عراقی كه‌ن دويره‌و نه‌خريه‌ن له‌هه‌ر ئاينده‌يگ ، ئه‌وه‌ بيگومان هه‌ڕه‌شه‌و دڵره‌قی بووگه‌ توخم سه‌ره‌كی .

له‌هه‌مان وه‌خت بايه‌سه‌ ئه‌وه‌يش له‌هويرمان نه‌چووگ ك ئه‌را بنبڕكردن و كووتاييهاوردن وه‌ی هه‌مگه‌ خوينڕشيان و تون وتيژی و ماڵويرانی و كوشت وكوشتاره‌ وه‌بی لاوردن و نه‌هيشتن مه‌سه‌له‌ی تايفی كاره‌گه‌ بيگومان سه‌ختتره‌و كه‌يگ و له‌ڕاده‌ی چاره‌سه‌ر ده‌رچووگ و هه‌ميشه‌ كيشه‌و گرفت و ناكووكی ناونی لايه‌نه‌يل عراقی تا تيه‌يگ هه‌ر مينيگ و چاره‌سه‌ری زه‌حمه‌ته‌ ، ئمجا له‌وه‌ر ئه‌وه‌ بايه‌سه‌ ئی  مه‌سه‌له‌ يه‌كلاوه‌ بكريه‌يگ و حوكمڕانی تايفه‌گه‌ری ئامانجيگ خه‌ياڵيه‌و به‌شيگه‌ له‌و رۆمانسيه‌ت سياسی جارانه‌ ك خريا پاڵ چه‌په‌يل .