که‌متر خه‌رج بکه‌ له‌وه‌ك ده‌سد ئه‌كه‌فيد

شفق نيوز

بايه‌سه‌ گرده‌وكردن سه‌رمايه‌ وه‌ شيوه‌يگ پڕ به‌رهه‌م باريه‌يده‌ به‌رهه‌م، ئاراسته‌ی ئه‌و پرووژه‌يله‌ بكريه‌يد ك فريه‌ترين نرخ ئه‌را وه‌كاربه‌ره‌يل دروس ئه‌كا، هه‌مان چشت خواستيشه‌ ئه‌را تاكه‌كه‌س، ك ئه‌وانيش وه‌ هه‌مان شيوه‌ بايه‌سه‌ پشتده‌س بكه‌ن و وه‌به‌رهاوردن ئه‌نجام بيه‌ن، چوينكه‌ ئه‌گه‌ره‌يل ده‌وڵه‌مه‌نبوين وه‌بی پشتده‌س و وه‌به‌رهاوردن ئاقڵانه‌ فريه‌ كه‌مه‌.

وه‌به‌رهاوردن ئاقڵانه‌ فريه‌ گرينگه‌و بايه‌سه‌ گام يه‌كه‌م وه‌ به‌رنامه‌يگ خاس پشتده‌سكرن ده‌س وه‌پی بكا، ك ئاده‌ميزاد ئه‌تويه‌نيد وه‌ به‌رنامه‌ی خاسيگ ده‌سكه‌فت فيشتر گرده‌و بكاو فيشتر هوير له‌ی مه‌سه‌له‌ بكا.

هه‌رچه‌نی ئيمه‌ هه‌ميشه‌ هوير له‌و چشته‌يله‌ ئه‌كه‌يم ك بايه‌سه‌ بسينيمنه‌يان، وه‌لی فريه‌ له‌وه‌ فيشتر سينيم ك هه‌وه‌جه‌ وه‌پی ديريم. ئابووريناسه‌يل هه‌ميشه‌ خواست له‌بان ته‌خته‌ كيشن نه‌ك ئاماژه‌ی هه‌وه‌جه‌، چوينكه‌ زوورم بڕياره‌يل خه‌رجكردنمان خوه‌يخواستانه‌س، فيشتر له‌وه‌ك وه‌ به‌رنامه‌ی راسكانی بوون، وه‌ل ئه‌وه‌يشا نرخ كاريگه‌ری فريه‌س له‌بان ئه‌و بڕياره‌يله‌، هه‌نای نرخ به‌رزه‌و ئه‌دێ ئه‌رامان ئاشكرای ئه‌دێ ك كه‌متر هه‌وه‌جه‌ وه‌و چشته‌يله‌ ديريم، وه‌لی ئه‌گه‌ر نرخ كه‌ميگ داوه‌زيد يا كه‌سيگ تر پويله‌گه‌ی بيه‌يد ئه‌وه‌ نرخه‌گه‌ ئه‌را ئيمه‌ كه‌متر ئه‌كه‌فيد و دوينيم ك فيشتر له‌و چشته‌ هه‌وه‌جه‌ ئه‌كه‌يم.

مانای ئه‌ه‌سه‌ تا راده‌يگ گشت كه‌سيگ ته‌نانه‌ت ئه‌وانه‌يش ك داهاتيانيش كه‌مه‌ ئه‌تويه‌نن خه‌رجه‌يليان كه‌مه‌و بكه‌ن وه‌بی ئه‌وه‌ك قوربانی گه‌ورا بيه‌ن، ئاسانيشه‌ مه‌سه‌له‌گه‌ دويا بخه‌يد و هوير له‌وه‌ بكه‌يد ك هه‌ر وه‌ختيگ داهاتد زيای كرد ده‌س ئه‌كه‌يد وه‌ پشتده‌سكردن، ك ئی ئه‌گه‌ريشه‌ نزيكه‌ له‌ گومان، چوينكه‌ ئه‌گه‌ر ئيسه‌ ئيراده‌ نه‌يريد ئه‌را پشتده‌سكردن پويل، ئه‌وه‌ شايه‌ت له‌ ئاينده‌يش هه‌ر هه‌مان ئيراده‌ داشتويد.

وه‌لی ئه‌و كه‌سه‌يله‌ ك داهات به‌رز ديرن و پويل فريه‌ گرده‌و ئه‌كه‌ن، ئه‌وانه‌ وه‌گشتی له‌ وه‌ختيگ ده‌س كردنه‌سه‌ پشتده‌سكردن ك داهاتيان فريه‌ نزمتر بويه‌، وه‌ل ئه‌وه‌يشا هووكاريگ تر گرينگ به‌رزه‌وبوين داهاتيانيش ئه‌وه‌سه‌ ك له‌ قوناغيگ زوی له‌ژيانيان ده‌س كردنه‌سه‌ پشتده‌سكردن.

ريچارد سترۆپ - ئابووری وه‌ زووان ساده‌

ج . أ