جه‌نگ ناوخوه‌ێ و بەرژەوەندیی دوشمنه‌يل

شفق نيوز

ئی ڕاێ بورنته‌ فيت شه‌وييگە و كرياسە وەر ئەو دۆزە ك ئمڕوو كورد وه‌پێیا گوزه‌ر ئه‌كا، ئەگەر باێد وشیه‌وكردنێگ ئه‌ڕا ئی ڕا بكەیمن دوینیمن ك كورد وە دريژایی خەباتێ وەردەوامە لەوەگ پێگەێ خوه‌ێ قايمه‌و بكا لە مەسەلەيل نەتەوایەتی جوور ته‌قالاكردن ئه‌ڕا دروسبوين دەوڵەت كوردی و پشتیوانیكردن گشت باوەتەيل سیاسی و ئابووری وكومەڵایەتیيگ ك پەیوەستن وە كورد لە هەرپارچەێگ دونیا، وه‌لێ هەروه‌خت كورد لە ڕەسين وە لويتكە نزیكه‌و بويد‌، بايه‌سه‌ وه‌ڵاته‌يل ئقلیمی لەڕێ رويداگە یەك لە دوياێ يەكەگانەو بڕەسنێدەێ ململانی و دوياخر قەیران راسكانی ئه‌ڕاێ دروس بكا، وه‌و جووره‌گ له‌وه‌ ديمنه‌ێ ك هەروه‌خت باس لە یەك پارچەیی عێراق كريه‌ێد و لەهەمانوه‌خت سەركردایەتی كوردی وە ئاراستەێ دروسبوين دەوڵەت كوردی سیخورمەێ خوه‌ێ لە سیاسەت ئقلیمی ده‌ێد، دوینین رويداگه‌يلێگ جوور تیرۆر و تەقینەوەو دروسكردن داعش و مەترسی لەبان ئاسایش نەتەوەیی و له‌شوون ئەوەيش دروسبوين قەیران دارایی ك يە كرۆك و ئامانجیانە تێرنه‌ێ ئاراوە.

 

لەوه‌ختێگ لە باشوور كوردستان ئی هەمگه‌ رويداگ و قەیرانەيل دروسكرياگه‌ دروس بوود، لە باكوور هەڵوژانن دەس كه‌ێده‌پێ، لە هەڵمەتەيل هەڵوژاننیش بڕێگ پشتیوانی وەهێز لە ناو ماڵ كورده‌یل باشوور ئه‌ڕا هەدەپە دروس ئه‌كا ك ئامانج له‌لێی سەركەفتن هەدەپەس و دروسكردن پێگه‌ێگ وەهێز لە ناو سیاسەت توركیا و ئعتبارداناين ئه‌ڕا مەسەلەێ كوردو بەشداری لە پرۆسەێ سیاسی توركیا.

 

لێرە جارێگتر وڵاته‌یيل دەورووەر هانە ده‌ور دروسكردن قەیرانه‌یل تر، ئه‌ڕا له‌يه‌كترازيان ماڵ كوردی و پشتیوانی نەكردن هێزەيل كوردی لەی پرۆسەێ گرنگە.

سەركەفتن هەدەپە لە توركیا قاپی گەورا ئه‌ڕا پارتەيل سیاسی كوردی وڵاته‌یل دەورووەر ئەكادەو و لە ته‌قالاكردن زیاتر ئه‌ڕا بەشداری سیاسی وڵاتەگانیان هەنگاو خوه‌یان گورجه‌و كەن.

لە هویرمان نەچوود ك بايه‌سه‌ ميدیاێ كوردی و كەسایەتی و رووشنهویرەيلیش وە هسكردن وە وەرپرسیاريه‌تییگ مێژوویی و وریاییانەوە مامەڵە وه‌ل ئی دۆخ ناهەموارە بكەن، چوينكە مێژوو رەحم وە كەس ناكا.

 

دژایەتیكردن دۆز كوردی و گرده‌وكردن كۆدەنگی لە تەشەنەكردن دژایەتیەگە لەی ساتە وەختە وه‌پيمان ئويشێ ك ئاسووی كورد وەرەو رووشنايی چوود، چوينكە بێگومان گشت دژایەتی و موئامەرەگان لەبان كورد و كوردستان وەو مانا تيه‌ێد ك كوردستان لە ئایندەێگ نزیك پایەیل بوين وە دەوڵەت لە جێ خواست ودیارەگانێ وە هێزەو چقنێد.

هەر لەی ديدگاوه‌ بايه‌سە تاك كورد ئەوە له‌لاێ ئاشكرابوود ك كاڵين تويه‌م خۆسه‌ و كینە و فتنەیی تەنیا ها لە بەرژەوەندی دوشمنه‌یل كورد و وە چەواشەيشەو كورد له‌لێ زەرەرمەند بوود، وەو جووره‌گ ئاشكراس وەردەوام وه‌ختێگ كورد ڕه‌سێده‌ لويتكە دوشمن ته‌قالا ئه‌ڕا بڕین دنگە و پایەگانێ ئه‌كا لەڕێ دروسكردن ئاشوو و جه‌نگ ناوخۆيی.

 

چرۆ شه‌هاب

ا. ج