سه‌ختترين بڕيار.. دويا بڕيار

شفق نيوز

دووس له‌يرا ها ناو ماڵه‌گه‌دو ماڵه‌گه‌ديش ئه‌و دڵ پاكه‌سه‌ ئه‌را ره‌فيقه‌يل كارواند له‌ پياوه‌يل "شه‌فه‌ق" و ئاشقه‌يلى، له‌يرايش وته‌يل مانديلا ئه‌كه‌فێده‌ هويرم ك وت: هه‌ناى ك گومان ئه‌وه‌ داشتيام ده‌ربچم و ئازاد بووم له‌ زيندان زانستيام ك ئه‌گه‌ر واز له‌ كينه‌ت نارم جوور زيندانييگ ئه‌راى مينم، ئيمه‌يش وه‌ دريژايى ساڵه‌يل وه‌رين ڕى خوه‌شه‌ويسى گرتيمنه‌ وه‌ر دوير له‌و باوه‌ڕه‌ ك ئويشێد: گشتلايگ له‌ى وڵاته‌ يا ئه‌وه‌سه‌ كوچگ ئه‌فرووشن و فڕه‌د ئه‌يه‌ن وه‌پيه‌و يا ئه‌وه‌سه‌ دڵيان له‌ كوچگه‌، ئيمه‌يش وه‌دڵ بلوريمانه‌و وه‌ل ئى راسيه‌ مامڵه‌ كرديم.

هه‌ناى ك ره‌سيمنه‌ دويا ويستگه‌ له‌ى كاروانه‌، وه‌خوه‌مان وتيايم دونيا ده‌ورانه‌و سه‌رله‌نوو خوه‌مان له‌ خاڵ ده‌سوه‌پيكردن دوينيمنه‌و، ك له‌ ديد ئه‌وه‌وه‌ ك هه‌ركه‌سيگ ماناى هه‌ڵفڕين نه‌زانێد، هه‌رچه‌نى به‌رزه‌و بوێمن وه‌ره‌و ئاسمان وه‌ بويچگتر دوينێده‌مان.

ئيمه‌ ئحساس وه‌ خوه‌شبه‌ختى ئه‌كه‌يم وه‌ ئه‌وه‌گ له‌ڕى كاره‌گه‌مان هه‌رچه‌نى بوود به‌شدارى كرديم له‌ خوه‌شاڵكردن كه‌سه‌يل تر و له‌ تيه‌ڵى ژيانيان كه‌مه‌و كرديم و شانازى وه‌ كاره‌يلمان كرديم. ئيمه‌ هووكاره‌ى به‌رزفڕين بويمن له‌ ئاسمان به‌غدا و مه‌له‌وانيكردنيش له‌ ئاو دجله‌، وه‌لێ هووكاره‌ى ئه‌وه‌ نه‌وێم چوين بژيه‌يم له‌بان خاك پڕ عه‌قيده‌مان و چوين ده‌زگاو ريڕه‌وه‌ ئنسانيه‌گه‌مان زينگه‌و بكه‌يم.

موحيبه‌تيش هه‌وه‌جه‌ وه‌ وه‌خت وچه‌وه‌ڕى ديرێد، وه‌لێ كينه‌ت زوى دروس ئه‌دێ، ئمجا وه‌ بوونه‌ى ئه‌و بار گرژه‌ ك هاته‌ تويش خيزان شه‌فه‌ق، شايه‌ت ئى ئه‌زموونه‌ هان كه‌سه‌يل تر نه‌يه‌ێد بچنه‌ ناو ئى بواره‌ وه‌ى ئاست و شيوازه‌.

ئه‌گه‌ر كلكيل ده‌روازى دڵ نه‌ياشتێد قوفڵى مه‌كه‌، هه‌رچه‌نى دونيا جوان بوود، وه‌لێ ناڕه‌سێده‌ جوانى هه‌قيقه‌ت و هه‌رچه‌نيگيش هه‌قيقه‌ت تيه‌ڵه‌، وه‌لێ تيه‌ڵتر و سه‌ختر له‌ دويره‌وكه‌فتن ئيوه‌ نيه‌، دويره‌وكه‌فتنيش سه‌خته‌، وه‌لێ له‌ يه‌كه‌وگرتن سه‌ختتر نيه‌.

ئيمه‌ باوه‌ڕمان ئه‌وه‌سه‌ هه‌ر چشت جوانێگ مه‌رج نيه‌ وه‌ جوانيه‌گه‌ وه‌رده‌وام بدێ، وه‌لێ چشت خاس جوانێگه‌ى وه‌رده‌ه‌وامه‌ جوور "شه‌فه‌ق".

عه‌لى حسێن فه‌يلى