له‌ به‌رژه‌وه‌ندی كورده‌

شفق نيوز

راسه‌ روی وه‌ڕوی بوينه‌وه‌ی ترۆر ئه‌را كورد نيشانه‌يگ تر ده‌سكه‌فت بوی، وه‌لی دی نه‌بايه‌د كورد ته‌نيا جوور جه‌نگاوه‌ر و له‌ناوبه‌ر ترۆر و خه‌ت وه‌رگری باريه‌ێده‌ كار و ته‌ماشای بكريه‌ێد مادام ملله‌ته‌يل ناوچه‌گه‌و وڵاته‌يل گه‌وراهيز جه‌هان نه‌خش پێشمه‌رگه‌و جه‌نگاوه‌ره‌يل و گيانفيدايه‌يل كورد به‌رز نرخنن و ناوی وه‌ رزگاركه‌ر جیهان ئه‌يه‌رن له‌وه‌رانوه‌ر جه‌نگ ترۆر.

مانای ئه‌وه‌سه‌ ئی گرينگيه‌ جی خوه‌يه‌و وه‌خت خوه‌ييشه‌و بگر ديريشه‌ ئه‌را ده‌رفه‌توه‌رگرتن له‌و نرخانن ملله‌ته‌يل جه‌هانه‌ ك وه‌رانوه‌ر ملله‌ت كورد ديرنه‌ی و ئه‌و قوربانيه‌يل باشوور كوردستانه‌ له‌وه‌رانوه‌ر جه‌نگ داعش ك شايه‌تيده‌ر گشت ئه‌و راسيه‌يله‌نه‌.

هه‌ر له‌وه‌ر ئه‌وه‌يش بايه‌سه‌ كورد خوه‌ی هه‌وڵ بيه‌ێد ئه‌و جووره‌ تاريفكردن و ريزگرتنه‌ له‌ نه‌ته‌وه‌گه‌ی له‌لايه‌ن ملله‌ته‌يل جه‌هانه‌و له‌ قوناغ پێشمه‌رگه‌و گيانفيدايی و مقه‌يه‌تيكه‌ر ئاشتی و ئارامی ناوچه‌گه‌و جه‌هانه‌و جيواز بكا ئه‌را قوناغ بونياتناين ئاينده‌ی سياسی و ئابووری و مافه‌يلی و نه‌مه‌ندنی وه‌ هويچ ده‌وڵه‌تيگ تره‌و.

تائيسه‌ وجوود پشتگيرييگ كه‌م ناوده‌وڵه‌تی و وجوود گشت نويسينگه‌ی نوێنه‌رايه‌تی و باڵويزخانه‌يل وڵاته‌يل جه‌هانيش له‌ باشوور كوردستان نه‌وينه‌سه‌ هووكار وه‌ده‌سهاوردن متمانه‌ی ته‌مام ئه‌را بڕين ئاينده‌يگ سه‌روه‌خوه‌يی، بيجگه‌ ئه‌وه‌يش له‌وه‌خت دروسبوين هه‌ر قه‌يرانيگيش باشوور كوردستان ئه‌كه‌فێده‌ وه‌ر هه‌ڕه‌شه‌ی وڵاته‌يل هاوساو ته‌نانه‌ت فريه‌جاريش ئه‌كه‌فێده‌ وه‌ر هه‌ڕه‌شه‌ی عراق فيدراڵيش.

ئمجا هه‌ر وه‌و خاتريشه‌ بته‌وكردن پايه‌و گرينگی نه‌خش كورد له‌ناوچه‌گه‌و خوه‌رهه‌ڵات ناوين له‌ی بار نازگ ئيسه‌ له‌لايه‌ن خود كورد وه‌ختی هاتگه‌و پاداگری كورد له‌ چاره‌سه‌ركردن يه‌كجاری دوسيه‌ی هه‌رێمی و سياسی و ئابووريه‌يلی ئه‌را ره‌سين وه‌ مافه‌يلی له‌وه‌رانوه‌ر سه‌بر ئی ملله‌ته‌ ئه‌را ريشه‌كيشكردن ترۆر و شايسته‌يی ره‌وايی خوه‌يه‌و هووكاريگ سه‌ره‌كی و شاڕييگ وه‌ديهاوردن ئامانجه‌يليه‌.

ئالان عه‌لی