مه‌ترسى سیاسه‌تمه‌داره‌یل توندڕه‌و له‌بان ئاسایش نیشتمانى

شفق نيوز

له‌ شكه‌ست پڕ زه‌ره‌دیان هساو ئه‌را قوربانیه‌یل ئه‌و سیاسه‌ت سه‌رنه‌كه‌فتگه‌ ناكه‌ن ك خه‌یرومه‌نترین جایه‌ڵ جوانه‌یل عراقى له‌تى كردنه‌ قوربانى له‌ گه‌نترین جه‌نگ وه‌ دریژایى 30 ساڵ.

 

ئیسه‌یش هه‌ر هه‌مان كرده‌وه‌ ئه‌نجام ئه‌دریه‌ێد له‌بان هه‌مان ئاواز وه‌رین و هاتیمنه‌و ئه‌را هه‌مان قه‌وان جاران و ئاشكراس ك سه‌ركرده‌یلیگ له‌ده‌یشت ئى سه‌رده‌مه‌ ژیه‌ن ك سه‌رده‌م دانیشتن و گفتوگووكردن و ئاشتیه‌و بیئاگان له‌وه‌ك سه‌رده‌م عه‌نته‌ربازى و ته‌ره‌زان و خراوداین و لێدوانه‌یل ئاگرین ته‌واو بوى، ك ئى جووره‌ ره‌فتار و كرده‌وه‌یله‌ له‌لاى عراقیه‌یل ناپه‌سه‌ن و ناپوخته‌و بویه‌، چوینكه‌ ئى ره‌فتاره‌یله‌ ناگونجیه‌ید وه‌ل سه‌رده‌م و رووژگار ئمڕوو.

 

له‌وه‌رگرتن زووان گفتوگوو سه‌ردو هه‌ڵوژانن زووان گفتوگوو سه‌خت و هه‌وڵ ركابه‌رى وه‌ره‌و ته‌قینه‌وه‌ یه‌كیگه‌ له‌و مه‌ترسیه‌یله‌ ك هه‌ڕه‌شه‌ ئاسایش نیشتمانى ئه‌كا. ئمڕوو عراق هه‌وجه‌ وه‌ رووح نیشتمان په‌روه‌رانه‌ دیرید نه‌ك مه‌سه‌له‌ى تایفه‌گه‌رى و نه‌ته‌وایه‌تى و ترس بڕیگمان له‌ بڕیگ تر، ئیمه‌ هه‌وه‌جه‌ وه‌ ژیان هاوبه‌ش دیریم و ده‌خاڵه‌تكردن بیگانه‌ له‌ كاروبار عراقى، ئیمه‌ هه‌وه‌جه‌ وه‌ ئاسایش جیگیر و ته‌واویگ دیریم ئه‌را ئه‌وه‌ك متمانه‌ بدریه‌یده‌ مه‌ردم ئه‌را ئیسه‌و ئاینده‌یان نه‌ك رخه‌وبردن وه‌ گووره‌ى ره‌فتاره‌یل خراو ره‌سانن و سیاسه‌ت گه‌رم، هاووڵاتیه‌یل عراقى هه‌وه‌جه‌ وه‌ وه‌ردوامى جیاوازى و به‌شه‌به‌شه‌وبوین و كیشمه‌كیشه‌یل سیاسیى نه‌یرن ك دریژه‌ بیه‌یده‌ ئه‌و قه‌یرانه‌یله‌ ك له‌ عومر و رزق و رووزى و سه‌قامگیرییان كه‌مه‌و بكاو سه‌رله‌نوو ڕى كووچكردن ناوخوه‌یى و كووچكردن وه‌رفراوان وه‌ره‌و ده‌یشت بخاده‌ وه‌ریان له‌وه‌ر دابینكردن كار و ئاسایش له‌ ئاكام ته‌قینه‌وه‌و كوشتن و گرتن و مه‌ترسى رووژانه‌ ك تیه‌یده‌ ڕى ژیان عراقیه‌یل.

 

ئه‌وه‌ك جى باسه‌ ئه‌وه‌سه‌ ك كیشمه‌كیش عراقیه‌یل له‌ناونى یه‌كترى فراوانتره‌و بوود و بار سیاسى سه‌ختتره‌و بوود له‌وه‌ختیگ ك هه‌ڕه‌شه‌و گوڕه‌شه‌ى فره‌یگ ها له‌ وجوود و مه‌ترسى له‌بان سه‌روه‌رى عراق زیاتره‌و بویه‌، هه‌ر له‌وه‌ر ئه‌وه‌یش دوینیم ئاساییه‌ له‌ى وه‌خته‌یله‌ ئه‌را ده‌وڵه‌ته‌یلیگ نه‌ف له‌ى ده‌رفه‌ته‌ وه‌ربگرن و ڕى له‌ سه‌قامگیرى عراقى ته‌گه‌و كردنه‌و مه‌ترسى فره‌یگیش دروس بویه‌ له‌ گشت ناوچه‌و له‌لاى چین و نه‌ته‌وه‌یل عراقى وه‌گشتى.

 

هه‌ر له‌وه‌ر ئه‌وه‌یش بایه‌سه‌ له‌بان گشت لایه‌نه‌یل عراقى  هه‌ڵه‌په‌ڵه‌ بكه‌ن له‌وه‌ر خاتر دانیشتن و دیدار و گفتوگوو له‌باوه‌ت كیشه‌و ناكووكیه‌یل تا بتویه‌نن رزه‌یلیان یه‌كه‌و بخه‌ن و توانایان بخه‌نه‌ كار ئه‌را ئاماده‌كارى سیاسى و ره‌سانن و ئاسایش و سه‌ربازى و ئابوورى و دبلۆماسى ئه‌را روى وه‌ڕوى بوینه‌وه‌ى ئه‌و مه‌ترسیه‌یله‌ ك وجووج عراقى گریده‌ ئامانج جوور قه‌واره‌و ده‌وڵه‌ت و ملله‌ت.

 

ریاز هانى به‌هار

ج. ا