خاسسازى و چه‌تره‌يل جريوه‌دار!

شفق نيوز

له‌شوون رميان رژيم سه‌دام، كه‌سه‌يل فريه‌يگ خاوه‌ن چه‌تره‌يل جوان و ره‌نگامه‌و جريوه‌دار ئه‌ڕامان په‌يا بوين، جاريگ وه‌ چه‌تر جيهاد و جاريگ وه‌ چه‌تر نيشتمانى و جاريگيش وه‌ چه‌تر پاكى و ئيماندارى، ك ئامانجيش له‌لى ئاشكراسه‌و ويرانكردن وڵات و دزيكردن خه‌ير وبه‌يره‌گه‌يه‌.

عراقيه‌يل حاڵ خوه‌يان دانه‌ ده‌س چين فه‌رمانڕه‌وا ئه‌را ماوه‌ى 10 ساڵ و گشت تاوانيگ ده‌رهه‌ق ئى ملله‌ت سته‌مديده‌ جيوه‌جى كريا، هه‌ر له‌ دزى و تاڵانكردن دارايى گشتى و كاولكردن و فه‌وتانن خه‌يراته‌گه‌ى تا ڕه‌سيده‌ په‌يابوين ترۆر و داگيركردن رويوه‌ر فراوانيگ له‌ خاك عراق، يه‌يش بيجگه‌ كوشتن و بڕين و كووچ وه‌پيكردن، جوور ئه‌وه‌گ ئى عراقه‌ كه‌سيگ تر پاك نه‌ياشتوود بيجگه‌ ئه‌وان!

بڕيگ له‌ سياسيه‌يل نيشتمانى دقه‌ت حاڵه‌ته‌گه‌ كردن و وشدارى دان له‌باوه‌ت خاوه‌ن چه‌تره‌يل خه‌ڵه‌تاننكار و ئه‌وانه‌گ هويچ چشتيگ تر نه‌يرن بيجگه‌ دزيكردن خه‌ير وبه‌ير وڵاته‌گه‌، ك نفوز خوه‌يان له‌ناو ده‌زگايه‌يل ده‌وڵه‌ت چه‌سپاننه‌، وه‌لى جى داخه‌ كه‌س قسه‌يان نه‌ژنه‌فت و خاوه‌ن چه‌تره‌يل وه‌ جريوه‌ى چه‌تره‌يليان چه‌و مه‌ردم خه‌ڵه‌تانن.

مه‌رجه‌ع باڵا ئه‌و خاوه‌ن چه‌تره‌يل خه‌ڵه‌تاننكاره‌ ديارى كرد و چه‌نه‌ها جار وشدارى دا له‌باوه‌تيانه‌و، وه‌لى گووش نه‌وى ئه‌و ئامووژگاريه‌يله‌ بژنه‌فێد، تا كار ره‌سيه‌ هه‌قيقه‌ت و قسه‌ى خوه‌ى وه‌ ئاشكرا ده‌رخست.

ئيسه‌يش بايه‌سه‌ له‌بان حكومه‌ت وه‌گشت هيزيگه‌و ئه‌و خاوه‌ن چه‌تره‌يله‌ ئه‌را ملله‌ت عراقى ئاشكرا بكا ك دارايى ملله‌ت و خه‌ير وبه‌ير ئى وڵاته‌ وه‌ تاڵان بردنه‌، وه‌نا ئه‌گه‌ر له‌يوا نه‌كريه‌ێد ئه‌وه‌ بيگومان چه‌تره‌يل ئاڵشت ئه‌كريه‌ن، وه‌لى هه‌مان روخساره‌يل هه‌ر مينن.

ره‌حمان ئه‌لفه‌ياز