پيره‌ژن و ره‌شووڵه و قڕان

شفق نيوز

دياره‌ دوبه‌ش له‌ مانگ يه‌كه‌م وه‌رز وه‌هاريش مه‌ترسی فريه‌يگ له‌لای ئێڵ و هووزه‌يل كورده‌واری دروس كردگه‌و له‌و ماوه‌يشه‌ ترس قڕان داشتنه‌ له‌ رويداگ سه‌خت وه‌ تايبه‌ت قڕان له‌ په‌سه‌يليان و دياره‌ ئی مه‌سه‌له‌يشه‌ وه‌ڕاسی هاته‌سه‌ تويش ئاژه‌ڵه‌يليان و مه‌ردميش په‌ند له‌لی وه‌رگرتنه‌ ئه‌را ساڵه‌يل دوياتر.

فاتمه‌ حيجازی له‌باوه‌تيگ باس له‌وه‌ ئه‌كاو ئويشيد: پيشينه‌يل وتنه‌ تا بيس و يه‌ك رووژ له‌ وه‌هار بايه‌سه‌ له‌ قڕان ڕخد بچێد، چوينكه‌ باس ئه‌كه‌ن و ئويشن: ئه‌وسا له‌ رووژگاره‌يل كويه‌ن مه‌ردم خوازيار ئه‌وه‌ بوينه‌ بچن ئه‌را هه‌وار، پيره‌ژن سه‌رۆك ئێڵێش وتگه‌: ساڵ ديره‌ ئه‌را چگن ئه‌را هه‌وار، نيشانه‌يل وه‌هار بوننه‌و!

ئمجا مه‌ردمه‌گه‌يش وه‌ختی گه‌ردينه‌سه‌ شوون نيشانه‌ی وه‌هار دوينن ك ره‌شووڵه‌ ك مه‌ليگه‌ سيه‌ی مه‌يله‌و خاكی و كه‌ميگ له‌ مه‌لويچگ گه‌وراتره‌، له‌ گه‌رمه‌سير گله‌وخواردگه‌و لانه‌ دروس كردگه‌.

دی مه‌ردمه‌گه‌يش ئويشن ساڵ ديره‌و با بچيم ئه‌را هه‌وار، ئمجا وه‌ ماڵ و په‌س و پووڵه‌وه‌ ئه‌كه‌فنه ‌ڕی وه‌ره‌و هه‌وار، وه‌لی هه‌نای شه‌و ئه‌ياده‌ بانيان دی سه‌رماو سووڵه‌ی فريه‌يگ هه‌ڵئه‌كاو قڕيان ئه‌كا.

له‌ی حاڵه‌تيشه‌ پيره‌ژن ده‌سه‌يلی ئه‌را دوعاو نزا به‌رزه‌و ئه‌كاو نووڕ ره‌شووڵه‌ ئه‌كاو ئويشيد: ئه‌ی ره‌شووڵه‌ وه‌ی جووره‌ ماڵ من ويران و كاول كرديد خوازيارم له‌ خودا تنيش ماڵد كاول بدێ و بفه‌وتيه‌يد.

دوياخريش مه‌ردم وه‌ختی ته‌ماشای لانه‌ی ره‌شووڵه‌ ئه‌كه‌ن دوينن له‌ناو لانه‌گه‌ی ره‌قيه‌و بردگه‌، ك وه‌و خاتريشه‌ پيشينه‌يل وتنه‌: تا بيس ويه‌كڵه‌ی وه‌هار بايه‌سه‌ له‌ قات و قڕان رخد بچێد.

محه‌مه‌د سه‌لام

ج . أ