ئايينه‌يل غه‌يره‌ موسڵمان هانه‌ خه‌ته‌ر..!

شفق نيوز

من له‌يرا له‌ دكتۆره‌ سوعاد پرسم، ئايا سوپای موسڵمانه‌يل ك چين ئه‌را جه‌نگ وه‌ل مه‌ردمان تر له‌وه‌ر وه‌رگری له‌ ئايين موسڵمانه‌يل يا له‌وه‌ر رابواردن جنسی بوی؟ ئايا پشت وه‌ چ ياسايگ پشت به‌سانه‌ ك وه‌و جووره‌ مامڵه‌ وه‌ل ديله‌يل بكه‌ن؟

ئه‌و گوزاره‌يشه‌ ك ناوی ناێده‌"رابواردن جنسی"ئه‌ی دكتۆره‌، ئه‌وه‌ جوانكاريه‌ ئه‌را وشه‌ی هه‌تككردن، ك يه‌يش هه‌تك شه‌ره‌فه‌و تاوانيگه‌ ك سزا له‌بانی هه‌س له‌گشت ياسايه‌يل مه‌ده‌نی و ياسايه‌يل په‌يوه‌س وه‌ مافه‌يل ئاده‌ميزاد له‌ ده‌وڵه‌ته‌يل پيشكه‌فتگ و ته‌نانه‌ت ده‌وڵه‌ته‌يل دوياكه‌فتگيش.

من نازانم ئی چينه‌يله‌ له‌ كومه‌ڵگا خاوه‌ن چ فكره‌يليگن ك ڕی وه‌ هه‌تككردن و ده‌سدريژی ئه‌يه‌ن له‌بان نامووس مه‌ردمان تر له‌ژير مه‌هانه‌ی زه‌ليلكردن دوشمن جوور ئه‌وه‌گ سوعاد ساڵح باسی ئه‌كا، ك خوازياره‌ شه‌رعيه‌ت بياده‌ ئی هه‌تك و رفانن دويه‌ته‌يل غه‌يره‌ موسڵمانه‌ له‌ژير په‌رده‌ی ئايين ئه‌را ته‌بريه‌كردن ئی ناوانه‌يله‌ وه‌ گووره‌ی ديد ئيمه‌و ديد وباوه‌ڕ گشت ئاده‌ميزاديگ ئنسافدار و پشكه‌فتگ.

وه‌ل ئه‌وه‌يشا بايه‌سه‌ ئاماژه‌ وه‌يه‌يش بكه‌يم ك وه‌ل سه‌ره‌تای ده‌ركه‌فتن داعش وه‌ فكره‌يل تاوانكاريانه‌ی، بڕ فريه‌يگ له‌ فه‌قيه و زانايه‌يل په‌يا بوين و جه‌خت له‌وه‌ كردن ك ئی فكره‌ی داعشه‌ فريه‌ دويره‌ له‌ ئايين ئسلامی، وه‌لێ هه‌نای ك ئی شيه‌وكردن و شه‌رعه‌يله‌ له‌لايه‌ن كه‌سه‌يليگه‌و ده‌رچی بايه‌سه‌ بوی زاناو په‌روه‌رده‌كار نه‌وه‌يل و مامۆستای زانكۆ و عه‌ميد كۆليژ ئی فكره‌يله‌ بزانستياد و له‌ زانكۆيه‌يل ئاماژه‌ وه‌پی بكرديان و له‌بان ئه‌و بنه‌ما په‌روه‌ده‌ی نه‌وه‌يل بكرياتاد، چوينكه‌ ئيمه‌ هه‌وه‌جه‌ی فريه‌يگ وه‌ ئاشكراكردن ئی مه‌سه‌له‌يله‌ له‌ زانايه‌يل ئايينی ئسلامی ديرێم.

ئه‌مجا ئه‌گه‌ر ئه‌يه‌ فكره‌ی داعش بوی، مانای ئه‌وه‌سه‌ هه‌ر رووژيگ بوود داعش هه‌ر وه‌ره‌و نه‌مه‌ندن ئه‌چێد، وه‌لێ ئه‌گه‌ر ئه‌يه‌ فكره‌ی موسڵمانه‌يل بوود، ئه‌وه‌ موسڵمانه‌يل مه‌ندنه‌و ئه‌و وه‌ختيشه‌ بايه‌سه‌ ئايينه‌يل تر چاره‌سه‌ريگ ئه‌را خوه‌يان بويننه‌و.

دى مه‌ندن له‌بان ئی گووشه‌ی زه‌ويه‌ وه‌ل ئه‌وانه‌گ جوور كاڵايگ نوڕنه‌ ژنه‌يل غه‌يره‌ موسڵمانه‌يل وه‌ ئه‌وه‌ ئه‌وه‌گ هه‌ر وه‌ختيگ بخوازن رابواردن وه‌ليانا بكه‌ن، ئه‌وه‌ ئی مه‌سه‌له‌ كار خه‌ته‌رناكيگه‌و شايه‌ت چاره‌سه‌ری كووچكردن و وه‌جيهيشتن ئی وڵاته‌ بدێ وه‌بی هاتنه‌وه‌.

كووچكردنيش ئه‌را وڵات كافره‌يل ئه‌دێ جوور ئه‌وه‌گ مه‌ردمانيگ له‌ نموونوه‌ دكتۆره‌ سوعاد ناويان ئه‌وه‌ن، وه‌لێ ئه‌و وڵاته‌يل كافره‌ وه‌چه‌و ئنسانيه‌ته‌و نوڕنه‌ گشت ئاده‌ميزاديگ له‌ هه‌ر ئايين و باوه‌ڕ و مه‌زه‌ويگ و جياوازی له‌ناونی موسڵمان و مه‌سيحی له‌لايان نيه‌ ك هه‌رچه‌نی وڵاته‌يل مه‌سيحيين و جياوازی له‌ناونی سيه‌و چه‌رمگ و ئيماندار و مولحد ناكه‌ن.

له‌يرا بايه‌سه‌ له‌بان گشت ده‌وڵه‌ته‌يل ئسلامی موحاسبه‌ی ئه‌و كه‌سه‌يله‌ بكه‌ن ك فكره‌ی تاوانكارانه‌ بڵاو ئه‌كه‌ن ك ئه‌دێده‌ هووكار له‌كه‌داركردن ئايين ئسلام وه‌رجه‌ ئه‌وه‌گ كاريگه‌ری له‌بان غه‌يره‌ موسڵمانه‌ بياشتوود و فه‌توايه‌يليگ ده‌ربكه‌ن ك له‌تی هويچ زوڵم و ته‌عدايگ له‌ غيره‌ موسڵمانه‌يل نه‌كريه‌ێد.

ڤيان ده‌خيل