كوردستان و كورده‌يل فه‌يلی له‌ ناونی كابينه‌ی په‌نجم وهه‌فتم

شفق نيوز

له‌ ناونی كۆمپانيه‌يل جه‌هانی ئه‌را سه‌رمايه‌نان له‌ هه‌رێم فێشتره‌كه‌و بوود.

به‌قه‌راری ئاسايش و سه‌قامگيری هه‌رێم و ئه‌ی ياساێگ ك وه‌ده‌س حكومه‌ت هه‌رێم كوردستان ئه‌را گه‌ره‌نتی كردن ماف سه‌رمايه‌نه‌ره‌يل ده‌ركريايه‌، له‌ فاكته‌يل گرنگ ئه‌را هه‌ر رووژ وه‌ره‌ونواچێن و گه‌شه‌ی كوردستان وه‌هساو ئه‌ياد. ئه‌ی چنه‌ كارێگيش ته‌نانه‌ت له‌ روی سياسه‌ت ده‌ره‌كی هه‌رێم كوردستانه‌و وه‌ شێوه‌ێگ پۆزۆتيڤ كارگه‌ری داشتيه‌و بويه‌سه‌ ‌مه‌مه‌ر گه‌شه‌كردن په‌يوه‌نديه‌يل هه‌رێم كوردستان وه‌ل وڵاته‌يل تره‌ك له‌ جه‌هانا.

له هه‌ولێر پايته‌خت هه‌رێم كوردستان فێشتره‌ك له‌ ٢٠ كۆنسۆلگه‌ری و سه‌نته‌ره‌يل بازرگانی ده‌ره‌كی هه‌س، وه‌ بان يانه‌يشه‌و، دو وڵات عه‌ره‌و ميسر و ئوردون و وه‌زويشه‌ وڵاته‌يل عه‌روه‌ تره‌ك چوی فه‌له‌ستين و ئيماره‌تيش وه‌ شومار ئه‌ی وڵاته‌يل زيايه‌و دۆن.

حكومه‌ت هه‌رێم كوردستان، ئيداره‌ی ده‌ره‌كی هه‌رێم كوردستان ئه‌را كاروبار په‌يوه‌نديه‌يل ده‌ره‌كی و ديپلۆماتيك و هاوئاهه‌نگ بوين و هاوكاری وه‌ل كۆنسۆله‌يل و نۆينه‌ره‌يل وڵاته‌يل تره‌ك چ له‌ هه‌رێم و چ له‌ به‌غدايش دامه‌زرانيه‌.

بێجگه‌ له‌ يانه‌، ئه‌ی ئيداره‌ی په‌يوه‌نديه‌يل ده‌ره‌كی هه‌رێم كوردستان وه‌ل وه‌زاره‌ت ده‌يشت عيراقيش هاوكاری ئه‌كاو وه‌ كار نۆينه‌ره‌يل هه‌رێم كوردستان له‌ ده‌يشت له‌ هه‌رێميش چاودێری ئه‌كا.

بايه‌د وه‌يه‌يش ئيشاره‌ بكريه‌يد ك هه‌رێم كوردستان له‌ سه‌رده‌م ده‌سڵات رژيم به‌عس له‌ ئه‌ی چنه‌ په‌يوه‌نديه‌يل و هاوكاريه‌يل ناوده‌وڵه‌تی بێ به‌ش و دويره‌ خرياويد. ئمجا ده‌سڵاتداره‌يل هه‌رێم كوردستان ئه‌را گه‌شه‌ كردن و وه‌ره‌ونوابردن په‌يوه‌نديل ده‌ره‌كی هه‌رێم كوردستان وه‌ل وڵاته‌يل عه‌ره‌وی و خوه‌رئاوا، ته‌مام توانای خوه‌يان خسنه‌و كار و  ئه‌ی وڵاته‌يله‌ ئه‌را سه‌رمايه‌نان له‌ بواره‌يل جياوه‌جياوه‌ ئابووری و پێشه‌يی و فه‌رهه‌نگی و... هانيان دان و په‌يوه‌نديه‌يل زانكوه‌يل هه‌رێميش وه‌ل كاڵج و زانكۆه‌يل  ناودار جه‌هانا گه‌شه‌ دانه‌پێ.

ئمڕوو وڵاته‌يل فره‌ێگ خوه‌شيان ئه‌ياد تا په‌يوه‌نديل خوه‌يان وه‌ل هه‌رێم كوردستانا فره‌تره‌ه‌و بكه‌ن و كۆنسۆله‌يل خوه‌يان له‌ هه‌رێم كوردستان دامه‌زرنن.

فليپينيا يه‌كێگ له‌ ئه‌و وڵاته‌يل وه‌ شومار ئه‌ياد ك نۆينه‌ر ئه‌ی وڵاته‌ دويای يه‌گ سه‌ردان هه‌رێم كوردستان كرد، وه‌ مه‌يل ده‌وڵه‌ت وڵاته‌گه‌ی ئه‌را وازكردن كۆنسۆلی خوه‌ی له‌ هه‌رێم كوردستان ئيشاره‌ كرد. له‌ لای تره‌كيشه‌، هۆله‌ندا نياز وه‌ ديرێد تا وه‌ی زويه‌ كۆنسۆلی خوه‌ی له‌ هه‌رێمه‌ كوردستان دامه‌زرنێد.

هه‌رێم كوردستان، سياسه‌ت فره‌وه‌ كردن په‌يوه‌نديه‌يل خوه‌ی وه‌ل وڵاته‌يل تره‌كا له‌ دويای ڕميان رژيم به‌عس و دامه‌زريان ده‌وڵه‌ت تازه‌ی عيراق ده‌س وه‌پێكردو ئه‌ی په‌يوه‌نديه‌يله‌ له‌ كابينه‌ی په‌نجم حكومه‌ت هه‌رێم كوردستان ك نێچيرڤان بارزانی جيگر ئيسه‌ پارت ديموكرات كوردستان، سه‌روكايه‌تی ئه‌ی كابينه‌ گرتويده‌و مل، ره‌سيه‌ ئاست به‌رزێگ.

هه‌رێم كوردستان له‌ ئه‌ی كابينه‌، ئاڵشته‌يل وه‌رچه‌و وه‌ خوه‌ی له‌ بواره‌يل خزمه‌تگوزاری وه‌ هاوڵاتيه‌يل هه‌ولێر و ئه‌و دويای پارێزگايل شاره‌يل كودستان دی، كۆمپانيايل سه‌رمايه‌نه‌ر فره‌ی روی هاوردنه‌ هه‌رێم كوردستان.

له‌ كابينه‌ی په‌نج، سه‌روك حكومه‌ت هه‌رێم(نێچيرڤان بارۆانی) بايه‌خ و ئيهتمام خاسێگ دا وه‌ كاروبار كورده‌يل فه‌يلی و ئاو بان بردن رووحيه‌ و جوواوه‌ودان وه‌ خواسته‌يليان ديمن.

ئه‌ی چنه‌ رێه‌روێگيش وه‌ دڵنێاييه‌و جارتره‌ك له‌ كابينه‌ی هه‌فتم حكومه‌ت هه‌رێم كوردستان له‌ لايه‌ن سه‌روك كابينه‌ی هه‌فتم حكومه‌ت هه‌رێم كوردستان(نێچيرڤان بارزانی) ك سه‌ر‌كرايه‌تی گرێده‌و ده‌س، هه‌م له‌سه‌ردا بووده‌و دوينيمن ك جارتڕه‌ك نێچيرڤان بارزانی له‌ كورده‌يل فه‌يلی و مه‌سه‌له‌گيان پشتێوانی ئه‌كا.

محه‌مه‌د عه‌لی سه‌ماوی