خوه‌زگ وه‌ شوانیه‌گه‌ى جاران

شفق نيوز

  له‌ سه‌رده‌م ئمڕوو گله‌یى و ناڕه‌زایى فریه‌یگ له‌ده‌م كه‌سه‌یلیگ ژنه‌فیم ك جوور رووژگار شوومیگ نوڕنه‌ رووژه‌یل ئى سه‌رده‌مه‌و هه‌میشه‌ ئاخ و هه‌ناس پڕ مه‌رامیگ هه‌ڵكیشن ئه‌را ئه‌و رووژگاره‌یله‌ ك هویچ خه‌م و خوسه‌یگ له‌تى نه‌یاشتنه‌.  

وه‌رجه‌ ماوه‌یگ چه‌وم كه‌فته‌ كابرایگ تازه‌ ده‌وڵه‌مه‌ن و دارنده‌ ك له‌جیاى یه‌ك باڵه‌خانه‌ دووان 400 مه‌ترى دیرید له‌ خاسترین شوون له‌ به‌غداى پایته‌خت و یه‌كیگیان خوه‌ى له‌تى نیشتگه‌و ئه‌واكه‌یش داسه‌ى كرایه‌و سه‌یاره‌گه‌یشى مودێل به‌رز و سه‌یاره‌یگ تریش له‌ گراج ماڵه‌گه‌ى وسانگه‌ ته‌نیا ئه‌را بازاڕكردن و هه‌وه‌جه‌یل ناوماڵ، بیجگه‌ ئه‌وه‌یش سێ دوكان جومله‌فرووشى دیرید له‌ یه‌كیگ له‌ بازاڕه‌یل گه‌وراى شاره‌گه‌و جوور پاشا ژیه‌یدو له‌ خودا وه‌زیاى هویچ خه‌میگ ئه‌را ماڵ دونیاو هه‌وه‌جه‌ى ژیان نه‌یرید، وه‌لى ئى كابرا ك ئیسه‌ پا ناسه‌ نزیكه‌ى عومر 60 ساڵان، به‌ش فریه‌یگ له‌ رووژگار ئه‌وساى له‌ناو یه‌كیگ له‌ ئاوایه‌یل كورده‌وارى وه‌ شوانى بردیاده‌ سه‌ر و بیجگه‌ دراوردن هه‌ق رووژانه‌ى خوه‌ى چشتیگ تر له‌خوه‌ى نه‌یاشت و هه‌میشه‌ وتیاد" ئاى شوانى..داخ شوانى".

ئى كابرا ئه‌را نزیكه‌ى 24 ساڵه‌ هاته‌سه‌ به‌غداو ته‌نانه‌ت هه‌ر له‌ به‌غدایش ژیان هاوسه‌رگیرى دروسكردگه‌و بویه‌سه‌ خاوه‌ن ماڵ و مناڵ، وه‌لى ئه‌ڵڵاجه‌وى ها له‌ورا ئیسه‌یش حاشا له‌و پیشه‌ى شوانى خویه‌ نه‌كردگه‌و هه‌میشه‌ له‌لاى ئه‌ى و ئه‌و باس ئه‌و رووژگاره‌یل خوه‌یه‌ كردگه‌و ئیسه‌یش وه‌بان ئى هه‌مگه‌ ده‌وڵه‌مه‌نیه‌ دوینیده‌ى خوه‌زگ وه‌ شوانیه‌گه‌ى جارانى خوازید ك له‌تى سه‌رفراز و ئاسووده‌ بویه‌و خه‌مى جوور ئیسه‌ نه‌ویه‌و له‌ كه‌شیگ ئارام و ئاسایش ژیان بردیاده‌ سه‌ر.

ئنجا خوه‌ى وه‌ته‌نى ئه‌وسا راسه‌ ژیان شه‌كه‌تى بوى و مه‌ردم گشتى خه‌ریك جفتیارى و ئاویارى و دره‌وكردن و كشتوكاڵى و شوانى و ساوه‌له‌وانى و ئمایه‌تكردن په‌س وپوڵه‌ بوى و جوور ئیسه‌ پیشكه‌فتن نه‌وى و مه‌ردم وه‌ سوارى وڵاخ یا وه‌پا هامشوو ئاوایه‌یل تر كردیان، وه‌لى وه‌ل ئه‌وه‌یشا نه‌ ته‌قینه‌وه‌و نه‌ كوشت وكوشتار و نه‌ سه‌ربڕین و نه‌یش رواكانن وجوود داشت و شه‌وانه‌ مه‌ردم وه‌بى ئه‌وه‌ك خه‌ڵه‌ك درانه‌ بكردان تا شه‌وه‌كى وه‌ ئاسووده‌یى سه‌ره‌و نیان و شه‌وه‌كیان روى كردیانه‌ باخ و بوسان و ئیواره‌ى ده‌مه‌و خوه‌رئاوایگ وه‌ بیه‌ڵ بان شانیانه‌و وه‌ تویله‌ ڕییا هاتیانه‌و ئه‌را ناو ماڵ و مناڵ خوه‌یان.

به‌ڵى، تویه‌نیم بویشیم ئیسه‌ گشت هه‌وه‌جه‌یگ ها له‌وه‌رده‌س و گشت ڕى دویر و دریژیگ ئاسانه‌و بویه‌و هه‌ر ئامێریگ بتواید له‌ ژیان رووژانه‌د تویه‌نید باریده‌ى ده‌س، وه‌لى وه‌ل ئه‌وه‌یشا چشته‌یل فریه‌یگیش داسه‌ شه‌قه‌ى باڵ و هاتنه‌وه‌یان مه‌حاڵه‌ جوور ئاسایش و سه‌قامگیرى و ژیانیگ دویر له‌ مه‌ترسى، ئیسه‌ خاس و خراو بویه‌سه‌ یه‌كا، دز و جه‌رده‌و پیاوكوش وڵات هه‌راسان كردنه‌و ژیان ئاده‌میزاد شیواننه‌، ئیسه‌ كیشه‌ى تایفه‌گه‌رى و مه‌زه‌وى و كوشتن له‌بان ناسنامه‌ ترس و دڵه‌ڕاوه‌كى له‌لاى روڵه‌یل ئى عراقه‌ په‌یا كردگه‌و كار له‌كار ترازیاس.

سه‌لام ئه‌حمه‌د

ج . أ