خوه‌ى زه‌خمداره‌و زه‌خم مه‌ردمیش پیچید!!

شفق نيوز

بار ناسه‌قامگیرى و رویداگه‌یل دڵته‌زن و ته‌قینه‌وه‌یل رووژانه‌و كاره‌یل خوه‌یكوشى ترۆریسته‌یل و نا متمانه‌یى و كیشمه‌كیش تایفى و ره‌گه‌زى له‌ عراق، شوون له‌ ئارامى و ئاسووده‌یى له‌ق كردگه‌و هه‌ناسه‌یگ خوه‌شى نه‌یشته‌سه‌و ئه‌را ئه‌وه‌ك دڵ مه‌ردم وه‌پى شاد بوود.

ملله‌ت عراق وه‌بان ئه‌وه‌یشه‌و نوڕید تا ئیسه‌ ك نزیكه‌ى 10 ساڵه‌ وه‌ناو ئازادى و دیموكراسى ژیه‌یدو قورتارى بوى له‌زوڵم و سته‌م دڕه‌نده‌ترین خوینمژ و دیكتاتۆر و هه‌ر وه‌خاتریشه‌ خوین و قوربانیه‌یل فریه‌یگ پیشكه‌ش كرد، وه‌لى دونید وه‌ل ئه‌وه‌یشا خه‌م خه‌مداره‌یل تر خوه‌یدو وڵاته‌گه‌ى بویه‌سه‌ په‌ناگه‌ى لیقه‌ومیاگ و ئاواره‌یل.

ئیمه‌ گشتمان زانیم ك بار سوریا ها له‌كنار مه‌ترسى رمیان و مه‌ندنه‌وه‌ى هه‌ناسه‌بڕگى، ئه‌مریكاو بڕیگ له‌ هاوپه‌یمانه‌یلى ره‌سینه‌سه‌ ئه‌و باوه‌ڕه‌ وه‌خت ده‌سوه‌شانن له‌ رژیم سوریا دویا زه‌نگ كوتاگه‌، هه‌ر له‌وه‌ر ئه‌وه‌یش دوینید وه‌رده‌وام بوخت و پلان تازه‌یگ له‌ وه‌رانوه‌رى تیه‌ریده‌ كار وه‌خاتر ئه‌وه‌ك باوه‌ڕ وڵاته‌یل تر ناڕازى وه‌پى باریده‌ ده‌س، ئنجا له‌ى ناونیه‌ ئه‌را ماوه‌یگه‌ په‌نابه‌ره‌یل سورى په‌نا بردنه‌سه‌ وه‌ر خاك عراق و خیزانه‌یل فریه‌یگ هاتنه‌سه‌ ناو خاك عراق چ له‌ ده‌روازه‌یل خوه‌رئاواى وڵات چ له‌ ده‌روازه‌یل هه‌رێم كوردستانه‌و، ك بیگومان یه‌یش مایه‌ى شانازیه‌ ئه‌را ملله‌ت عراق ئه‌گه‌ر بتویه‌نن ده‌س هاوكارى و یارمه‌تى بڕه‌سننه‌ ئه‌و ئاواره‌یله‌.

مه‌رام له‌ى باوه‌ته‌ ئه‌وه‌سه‌ ك ملله‌ت عراق هیمان تائیسه‌ هویچ وڵات و هاوسایگى ژانه‌یلى ساڕیژ نه‌كردگه‌و بگر وه‌رده‌وام له‌دژیشى وسیانه‌و خه‌یر وه‌پى نه‌خواستنه‌، وه‌لى وه‌ل ئه‌وه‌یشا ئى ملله‌ته‌ دوینید ئه‌وه‌نه‌ به‌دبه‌ختى و ده‌رده‌سه‌رى هاته‌سه‌ بانى و گشت جووره‌ زوڵم و مه‌ینه‌تیه‌یلیگ وه‌خوه‌یه‌و دیه‌، زه‌خمه‌یل خوه‌ى هه‌ر وه‌و ژانه‌و له‌هویره‌و بردگه‌و زه‌خم مه‌ردمیش پیچید!!.

ملله‌ت عراق وه‌گشتى ئه‌را ماوه‌ى ده‌یه‌ها ساڵ ناڵان وه‌ده‌س گشت جووره‌ سزاو ناخوه‌شییگ ، ره‌سیه‌ راده‌یگ ئومید له‌ده‌سداو سه‌ر ئه‌را قه‌ده‌ر چه‌مان، وه‌لى خوه‌شبه‌ختانه‌ زوڵم ناهه‌ق كه‌فته‌ ژیر شمسیر هه‌ق و ده‌روازه‌یگ له‌ ره‌حمه‌ت ئه‌راى واز بوى و رژیم سته‌مكار هه‌واڵه‌ى مه‌رگ ئه‌به‌دى كریاو عراقیگ تازه‌ هاته‌ وجوود وه‌ناو عراق دیموكراسى ك هه‌رچه‌نى ئیسه‌یش مه‌رگ و خوینڕشیان كووتایى نه‌هاتگه‌و ده‌س ده‌ره‌كى و ریكخریاگ قاعیده‌و پاشمه‌نده‌یل به‌عس وه‌گشت جووره‌ كه‌ره‌سه‌یگ هه‌وڵ ویرانكردن شاره‌یل و له‌ناوبردن عراقیه‌یل ده‌ن، وه‌لى دوینید وه‌ل ئه‌وه‌یشا وژدان و مه‌ردایه‌تى زوورم ئى ملله‌ت چه‌وسیاگه‌ ڕى وه‌پیان نیه‌ید چه‌وپووشى له‌ په‌نابه‌ره‌یل و ئاواره‌یل سوریا بكه‌ن و خوه‌یان گیل بكه‌ن له‌ئاست ده‌سمیه‌تداینیان، نه‌خه‌یر هویچ وه‌ختیگ ملله‌ت عراق قاپى به‌زه‌یى له‌ڕوى كه‌س نه‌وه‌ساو هه‌میشه‌ خه‌مخوه‌ر مه‌ویس و چه‌وسیاگه‌یل بویه‌و خوه‌یشى هه‌ر چكه‌ى خوین زه‌خمه‌یلى هاتگه‌و ژانه‌یلى وه‌رده‌وام بویه‌، وه‌تایبه‌ت ملله‌ت كورد ك ئه‌وه‌سه‌ له‌ هه‌رێم كوردستان وه‌ دڵ و گیان خزمه‌ت وه‌ مناڵ و كورپه‌و پیر و په‌ككه‌فتگ كورده‌یل سوریا كه‌ن و ده‌س یارمه‌تى ئه‌رایان دریژه‌و كردنه‌و له‌ناو خاك هه‌رێم جوور ماڵ خوه‌یان ره‌فتار كه‌ن.

یه‌سه‌ ژیان ملله‌ت عراق ك هه‌میشه‌ له‌ ژان و ئازار بیبه‌ش نه‌ویه‌، وه‌ختیگیش ژان و مه‌ویسى مه‌رمان تر وه‌چه‌و دیه‌، دڵ ئه‌راى كرده‌سه‌ خه‌م و ئه‌وه‌ك له‌ تواناى بویه‌ پیشكه‌ش وه‌پى كردگه‌و له‌ ساڕیژكردن ژانه‌یلى به‌شدار بویه‌.

جه‌ماڵ ئه‌ركه‌وازى