خوه‌ينيشانداين وه‌سيله‌يگه‌ ئه‌را گوزارشكردن

شفق نيوز

له‌ى باوه‌تيشه‌و گشت ياساو به‌ڵگه‌يل ناوده‌وڵه‌تى مافه‌يل ئاده‌ميزاد ريككه‌فتن له‌بان ماف وڵاته‌يل له‌ داناين ياسايگ ك له‌تى ئى خوه‌ينيشانداينه‌يله‌ ريك بخريه‌ێد، وه‌لى هويچ به‌ڵگه‌يگ ناوده‌وڵه‌تى يا ياسايگ نيه‌ ماف بياده‌ خوه‌ينيشانداينه‌يل وه‌بى ريككه‌فتن وه‌ل سيستم، به‌ڵكوو گشت ئى به‌ڵگه‌يله‌ ريككه‌فتن له‌بان مافيگ ناوده‌وڵه‌تى ك نواگيرى له‌ هه‌ر سه‌رپيچييگ بكريه‌ێد له‌و خوه‌ينيشاندايه‌نه‌يله‌ جوور ئه‌وه‌گ له‌ ياساو ده‌ستوور هاتگه‌.

له‌ گيرنگترين ئه‌و به‌ڵگه‌يليشه‌: ريككه‌فتن ناوده‌وڵه‌تى تايبه‌ت وه‌ مافه‌يل مه‌ده‌نى و ئابوورى و ريككه‌فتن ئۆرپى و ريككه‌فتن ئه‌مريكى و ريككه‌فتن ئه‌فريقى، ئمجا هه‌ركه‌سيگ وه‌ دقه‌ته‌و ته‌ماشاى ئه‌و به‌ڵگه‌يله‌ بكا ئه‌ڕاى ده‌رئه‌كه‌فێد ك ريككه‌فتنيگ ناوده‌وڵه‌تى هه‌س له‌بان ڕى نه‌داين وه‌ هه‌ر خوه‌ينيشانداينيگ ناياسايى له‌ مه‌رز ياسا.

ده‌وڵه‌ته‌يل خوه‌رئاوا هيزه‌يل تايبه‌ت ئه‌يه‌رنه‌ كار له‌ خوه‌ينيشانداينه‌يل، ئه‌ويش له‌وه‌ر ئه‌وه‌گ له‌ڕى وشوون ياسايى نه‌چنه‌ ده‌يشت، يا وه‌ مانايگ تر بويشيم خوه‌ينيشانداين ماف گشت كه‌سيگه‌ له‌وه‌ختيگ وه‌سيله‌يگ بدێ ئه‌را گوزارشكردن، وه‌لى هه‌ناى له‌ مه‌رز خوه‌ى چيه‌ ده‌يشت ئه‌دێده‌ وه‌سيله‌يگ ئه‌را ئاژاوه‌و دروسكردن قه‌يرانه‌يل، چوينگه‌ دى ئه‌وه‌ وه‌خته‌ سه‌رپيچى كردگه‌ له‌و مه‌رز ياسا ك له‌ ده‌ستوور و به‌ڵگه‌يل ناوده‌وڵه‌تى هاتگه‌.

رووشنهويرى خوه‌ينشانداين وه‌ شيوازيگ ئاشتيانه‌ نيشانه‌ى هوشيارى هاووڵاتيه‌، وه‌لى وه‌ مه‌رجيگ دوير بدێ له‌ گرژى و تون وتيژى، له‌ كوردستانيش پرووژه‌ ياساى خوه‌ينيشانداين ريك ئه‌و خوه‌ينيشانداينه‌ ئه‌خاو بيبه‌شى ناكا، هه‌ر وه‌و خاتريشه‌ هه‌ڵوژانن وه‌خت گونجياگ فريه‌ گرينگه‌، ئه‌ويش له‌وه‌ر ئتست مقه‌يه‌تيكردن له‌بان ئاسايش و سه‌قامگيرى كوردستان، چوينكه‌ وه‌ قه‌يرانه‌يل گه‌ورايگ ئابوورى و سياسى گوزه‌ر ئه‌كا بيجگه‌ ئه‌وه‌كيش كه‌فته‌سه‌ ناو جه‌نگيگ وه‌ل ريكخرياگ ترۆريستى داعش، ئمجا دوياخريش كوردستان.

له‌يرا پرسياريگ ئه‌ياده‌ وجوود، ك ئه‌ويش ئه‌وه‌سه‌ ك ئايا بار ئيسه‌ى ناوخوه‌يى و ده‌ره‌كى كوردستان وه‌رگه‌ى ئه‌وه‌ ئه‌گرێد لايه‌نه‌يل ئاسايشى تايبه‌تمه‌ند ده‌س بكه‌نه‌ ئاماده‌كارى ئه‌را مقه‌يه‌تيكردن خوه‌ينيشانداينه‌يل، يه‌يش له‌وه‌ختيگ ك كوردستان پلكياسه‌ جه‌نگيگ نه‌خواست وه‌ل داعش ك لايه‌نه‌يليگ ئه‌خوازن له‌ڕى خوه‌ينشانداينه‌و مه‌سه‌له‌گه‌ بكيشن وه‌ره‌و دروسكردن ئاژاوه‌و تون وتيژى؟

من باوه‌ڕم ئه‌وه‌سه‌ ك ئاسايشى نه‌ته‌وه‌يى كوردستان جوور خه‌تيگ قرمز ئه‌را گشت هاووڵاتييگ كورد، يه‌يش بيجگه‌ ئه‌وه‌گ ك خوه‌يشنيشانده‌ره‌يل له‌ شوونيگ كوردستان زوورميان له‌ خيزانه‌يل پێشمه‌رگه‌ن.

د. سوزان ئامێدى