ئى ڕووژه‌يله‌ خوه‌مان پرسه‌ ئه‌را خوه‌مان گريمن

شفق نيوز

قسيه‌يله‌ له‌ هوير خوه‌مان بوه‌يمن ك چز سه‌ردێگن له‌ ناونى هووزه‌يل كورد و ته‌نيا ئاواز سياسين ئه‌راى دويركه‌فتن پێكهاته‌يل يا بنه‌ماڵه‌يل هاوزوان  ملله‌ت به‌ش به‌شكرياگمان ئيمه‌ كورده‌يل گه‌رمه‌سير ئى رووژه‌يله‌ سه‌رقاڵيمن ك په‌ڕه‌ په‌ڕێ  يادگاره‌يل ژيرخاك ده‌راريمن تا به‌ڵكم نشانه‌يل ئاشنايى و برايه‌تيمان هه‌م له‌ نوو سه‌وز بوون  و له‌ بوونه‌و ياد ڕووڵه‌يل بيسه‌رو شوونمان گشت وه‌ يه‌ك ئاواز هووره‌ێ دڵته‌نگى بچڕيمن و داڵگه‌يل موور بارن !  گشت پرسه‌ و ماته‌م بوه‌يمنه‌ ناو قويلى چه‌وێڵمان و داخه‌يلمان هه‌م له‌ نوو داخ بكه‌يمن ك ئه‌را  له‌ شوون سی ساڵ كه‌س هيمان له‌ بان كوشيان چه‌ن هه‌زار جاهڵ و جوان كورد نه‌هاته‌ جواو و هويچ قانوونێگ ده‌سمه‌يتمان نه‌دا  تا به‌ڵكم  ناوونيشانێگ له‌ مه‌زاريان په‌يدا بكه‌يمن!؟ ئى ده‌رده‌ له‌ شوون ئه‌و ده‌رده‌س ك له‌ باوه‌ت  مه‌سه‌له‌ى ئه‌ڵوژانن و ده‌نگ كورد له‌ ده‌يشت هه‌رێم كوردستان  قسيه‌ و باس فره‌ێگ كريا ك فه‌يلييه‌يل خوه‌يان  گوم كردنه‌ ، وه‌ى خاتره‌ كورد ده‌نگ نه‌ هاورد!؟

سه‌خته ك ئايم نه‌تويه‌نێ له‌ خوه‌ى وه‌رگرى يا دفاع بكا وه‌لى له‌ هوير نه‌وه‌يمن ك سه‌ركه‌فتن و  سه‌رنه‌كه‌فتن له‌ هه‌ر پروژه‌ و كارێگ سه‌به‌ب خوه‌ى ديريد، ئمجا خه‌وير ئه‌ڵوژاردنيش يه‌كێگه‌ له‌و باوه‌ته‌يله‌ ك ئاو فره‌ كيشيد! چمان نازانيمن ك فه‌يلييه‌يل فره‌ ساڵه‌ گوم و بيسه‌روشوين كريانه‌ وه‌لى ئه‌را ئيسه‌ خه‌وه‌رى وه‌ گووش ره‌سێ ! يه‌ پرسيار  ئى باسمانه‌؟

ئيمه‌ نه‌ ئامار شه‌هيده‌يلمان ديريمن و نه‌ هيمان كه‌س زانى شماره‌ى ڕاسكانى كورد له‌ ده‌يشت هه‌ريم كوردستان چه‌نێگه‌ و چه‌ن كه‌سيان هووش و هويريان ها وه‌لاى كوردايه‌تى! چه‌نێگيان هانه‌ هوير دويا ڕووژ خوه‌يان و نه‌ويلياَن!  له‌ جه‌نگ ده‌نگه‌يل له‌ به‌غدا به‌رنامه‌ى ئيمه‌  وه‌ل ليسته‌يل سه‌ركه‌فتگ فه‌رق و جياوازيی داشت!  له‌ گشت گرنگتر ستراتيژى كورده‌ ك چه‌نى ئه‌ونوا چويه‌ و گرفته‌يلى كامانه‌ن و هه‌وڵ و ته‌قالايه‌ل ئه‌راى چاره‌سه‌كردنيان وه‌كوو ڕه‌سيه‌!؟

ئيمه‌ باس ملله‌تێگ ديريمن نه‌ ته‌نيا باس  حزب و لايه‌نێگ سياسى ك سه‌ركه‌فتن يا سه‌ر نه‌كه‌فتن خوه‌ى بكاده‌ به‌ڵگه‌ ئه‌راى يه‌ ك كورد له‌ ده‌يشت هه‌رێم كوردستان  هه‌س يا نيه‌! وه‌ باوه‌ڕم ئه‌و چه‌ن هه‌زار كه‌سه‌ كه‌ له‌ به‌غدا ده‌نگ وه‌ كورد دان شايان ئه‌وه‌ن ك هه‌ر كاميان ميدالياێگ ئازايه‌تى وه‌ پی بدريه‌ێد، چوين يه‌ ده‌رس گه‌وراى ئه‌ڵوژاردن بوى ك فه‌قيره‌يل دڵسووزتر بين له‌ ئه‌وانه‌ى ته‌نيا له‌ بوونه‌يل ده‌نگ ئه‌ڵارن  و وه‌ قه‌د و باڵاَى گه‌ورايه‌يلمان ئويشن! تا نه‌زانيمن عراق ئمڕوو ها له‌ چ وه‌زعێگ و كورد ده‌يشت هه‌رێم كوردستان ها له‌ چ وه‌زعێگ  نه‌بايه‌د تووڵه‌ يا ئنتقام له‌ مه‌ردمێگ بسێنيمن ك وه‌ مردگ حساويان كردنه‌ و ئی ڕووژه‌يله‌ هانه‌ پرسه‌ێ مه‌رگ خوه‌يان!! لاى خوه‌مه‌و چنه‌ هوير ئه‌كردم ك ئمڕوو يا سوو ئه‌راى هاو خه‌مى دڵ شكياگه‌يل ئى وه‌رز ماته‌مه‌ گه‌ورايه‌يلمان ده‌نگ ئه‌ڵارن!

جى داخه‌ ك ئى جاريش فره‌ كه‌س له‌ گه‌ورا وه‌رپه‌رسه‌يل عراق و كوردستانيش كه‌فتنه‌ قين و له‌ ياد سى ساڵه‌ى ده‌ركردن سه‌دان هه‌زار هاووڵاتى  و بيسه‌روشوون كردن هه‌زاران جوان كورد فه‌يلى بی تاوان هويچ په‌يام يا قسيه‌يگ نه‌ياشتن ك دڵ زامدار كه‌سوكاره‌يليان بلاونێ! جى داخه‌ ك خوين له‌ ڕه‌گه‌يل سياسه‌ت چنه‌ سيه‌ بيه‌ ك دى مه‌ردم نايه‌رنه‌ وه‌ر چه‌و ! له‌ هوير نه‌وه‌يمن ك بوونه‌يل فره‌ن و لايه‌نه‌يل سياسى و ده‌سه‌ڵاتداره‌يل  فيشتره‌ له‌ ئه‌وه‌ ك مه‌ردم نياز  وه‌پيان دێرن ئه‌وان وه‌ مه‌ردم نياز ديرن و كه‌س ناتوه‌نێ ملله‌تێگ و مه‌سه‌له‌ى وه‌ ياد هاوردن كاره‌ساته‌يل به‌شێگ له‌ ئه‌و ملله‌ته‌ زينگ وه‌چاڵ بكا ، هه‌رچه‌ن ئه‌وانه‌ كوردێگ بوين وه‌ له‌هجه‌ يا زاراوه‌ى فه‌يلى ك داڵگه‌يليان وه‌ختێگ گيسيان شانه‌ ئه‌كردن ئه‌وه‌تن:

هه‌ (مسته‌فا) بمينێ ... هه‌ق كورده‌يل بسينێ