كورد، له‌ ناونى كووچ و ئه‌ڵه‌وگه‌رديان

شفق نيوز

بێگومان تا دويا ژيان ئنسانيه‌تيش وه‌رده‌وام ئه‌دێ.

مه‌مه‌ريل كووچ كردنيش وه‌ ئه‌ساس مه‌رج ژئوپۆليتيك له‌ ناوه‌چه‌ى وه‌ل ناوچه‌ى تر هه‌ميشه‌ ها له‌ خوه‌ى ئاڵشت كردن.

سه‌ره‌تا ئنسان له‌ شوون يه‌ بوى تا ژيان خوه‌ى وه‌ ڕيه‌و بواد وه‌ى مه‌به‌سه‌يشه‌ ده‌س كرده‌ راو كردن و نێچيرو زه‌وى گونجياى ئه‌را كشتوكاڵ و به‌رهاوردن په‌ياكردن، كووچ كرديه‌.

له‌و وه‌خته‌ تا ئيسه‌ كووچ كردن وه‌رده‌وامه‌و، وه‌لى مه‌مه‌ره‌يل كووچ كردن مه‌ردم تا راده‌ى وه‌رچه‌و ئاڵشتكارى وه‌ خوه‌ى ديه‌.

له‌ سه‌رده‌م ته‌كنۆلۆژياو جه‌هانگيرى، ئه‌ى ديارده‌يشه‌ پا ناسه‌ ناو قۆناغى نوو، وه‌ تايبه‌ت له‌ وڵاته‌يل خوه‌رهه‌ڵات ناوراس و باكوور ئه‌فريقيا ك دى وه‌ ده‌س هاوردن بژى مه‌مه‌رێ ئه‌را ژيان هاوكار كووچكردن نه‌وى، به‌ڵكو يه‌كێ له‌ مه‌مه‌ريلێ، هوير ئازاديخوازانه‌و ده‌رخسن هويرو باوه‌ڕ سياسى و ئايينى جياواز تاكه‌ كه‌سه‌يل بوى.

كورديش چوى ملله‌تێ ئازايخوازو رزگاريخواز له‌ ناوچه‌گه‌ فره‌جار ناچار كريا رێ كووچ كردن ئه‌ڵوژنێد ئه‌را يه‌گ بمێنێده‌ى. له‌ ئاخره‌يل هه‌فتاو سه‌ره‌تاى ده‌يه‌ هه‌شتا، ديارده‌ى كووچكردن ملله‌ت كورد له‌ ژێرفشار سه‌ركوت كردن هويروباوه‌ڕ سياسى و ئايدۆلۆژيا خوه‌ى كيشاو بان و دوياتر مه‌ردم وه‌ره‌و وڵاته‌يل خوه‌رئاوا چين. ئه‌ى ديارده‌ وه‌رده‌وام بوى تا ده‌يه‌ نه‌ود ك وه‌ ساڵه‌يل له‌يه‌ك شێويان كووچ كورديه‌ل وه‌ هساو ئه‌ياد.

ئمجا جى ديرێد‌ له‌يره‌ بپرسيم: تا چه‌نێ ئه‌ى كووچ كردن له‌ به‌رژوه‌ندى تاكه‌ كه‌سه‌يل كورد بويه‌؟ دوياتريش ئه‌و به‌رژوه‌نديه‌ تا چه‌نێ كارگه‌رێ له‌ بان ئاينده‌ ديرێدو له‌ وه‌رنوا بردن خه‌ت كورد له‌ به‌نيادنان كوردستان خاسێ هاوه‌ليا؟. ئايا تا ئيرنگه‌، له‌يه‌كه‌ودانێ زانستى كرياس له‌ بان سودوزيانه‌يل كووچكردن مه‌ردم كوردستان وه‌ خوه‌رئاوا؟.

كووچكردن مه‌ردم له‌ ئه‌ورووپا ئه‌را وڵاته‌يل يه‌كگرتێ ئه‌مريكا دوياى جه‌نگ جه‌هانى دويم، بويه‌ مه‌مه‌رێ ئه‌ر دامه‌زرانن وڵاتێ پيشه‌سازى خاوه‌ن ئابوورى بته‌و ك ئمڕوو وه‌ وڵات گه‌وراهێز ئه‌مريكا ناو ئه‌يريه‌ێد.

سودگرتن له‌ تواناو هێز به‌هره‌يل تاكه‌ كه‌سه‌يل ك له‌ وڵاته‌يل جياوه‌جياى ئه‌ورووپاو روسياى ئه‌وسا ئه‌را ئه‌مريكا كووچكردن‌، بويه‌ سه‌رمايه‌ى بێ بن ئه‌را ره‌سانن ئه‌و وڵاته‌ وه‌ ئه‌مريكاى ئمڕوو!.

وه‌ى مانا ك سودوه‌رگرتن له‌ ئه‌زموون وڵاته‌يل ئه‌مريكاو ئسراييل، ئه‌ڵه‌وگه‌رديان كورده‌يل به‌هره‌مه‌ند ئه‌را كوردستان چوى سه‌رمايه‌ى ئنسانى، هه‌وه‌جه‌ وه‌ يه‌ ديرێد تا ده‌سڵات كوردى له‌ بانێ كار بكاو گرنگى وه‌ پێ بداو بخاده‌ى به‌رنامه‌ى كارى ئاينده‌ى خوه‌ى. تا زانست و به‌هه‌ره‌و توانايل ره‌وه‌ن كوردى بكه‌فێده‌ خزمه‌ت بنيادكردن كوردستان./ش

هێمن حەسەن