نه‌فت كورد و سیاسه‌ت تورك

شفق نيوز

  ریككه‌فتن ناونى حكوومه‌ت هه‌رێم كوردستان و توركیا وه‌خاتر كلكردن نه‌فت ئه‌را ئه‌نقه‌ره‌ له‌لایگه‌و مایه‌ى خوه‌شاڵى و گامناینه‌ وه‌ره‌و په‌ره‌داین ئابوورى هه‌رێم و له‌لایگ تریشه‌و جى گومان و مه‌ترسیه‌ له‌لاى به‌شیگ له‌ تاك كورد.

ئیمه‌ ئه‌گه‌ر ته‌ماشاى ساڵه‌یلیگ وه‌رجه‌ ئیسه‌ بكه‌یم ك هیمان كوردستان كه‌رته‌ نه‌فتیه‌گه‌ى هه‌وه‌جه‌ وه‌ كومپانیایه‌یل ده‌ره‌كى داشت ئه‌را به‌رهه‌مهاوردن و هه‌ڵكه‌ندن چاڵه‌یل نه‌فتى، ئه‌وه‌ بیگومان له‌و وه‌خته‌ وڵاتیگ جوور توركیا ك ئیسه‌ سیاسه‌ته‌گه‌ى ئاڵشت بویه‌ كوردا ئه‌وه‌نه‌ گرینگى نه‌یا ئى هه‌رێمه‌ جوور حكوومه‌تیگ خاوه‌ن ده‌سڵات و په‌رله‌مان، هه‌ڵبه‌ته‌ جارجاریگیش قسه‌ى زبر كردیادو هه‌ڕه‌شه‌ى ئاشكرایش كردیاد له‌ خاك كوردستان عراق، وه‌لى ئیسه‌ باره‌گه‌ چه‌رخیاگه‌و هه‌رێم كوردستان چه‌وره‌و بترۆله‌گه‌ى بویه‌سه‌ مایه‌ى مه‌یلكیشانن گه‌ورا كومپانیایه‌یل جه‌هان ئه‌را وه‌به‌رهاوردن و گرینگیداین وه‌ نه‌فت خاكه‌یل كوردستان.

له‌یرا توركیا له‌ى ماوه‌یل دویاخره‌ مامڵه‌ى ئه‌وه‌ز بوى وه‌ل هه‌رێم و سه‌ركردایه‌تى كورد و ته‌نانه‌ت ملله‌ت كورد ژیر ده‌سڵات خوه‌یشى! ئنجا مه‌سه‌له‌ى به‌رژه‌وه‌ندى نه‌خش باڵایگ دیرید له‌ ئاڵشتكردن ره‌فتار و هه‌ڵسووكه‌فت، ئیسه‌ توركیا له‌ حاڵ حازر بویه‌سه‌ مایه‌ى سه‌رسوڕمه‌نین گشت لایگ و هیمان نیازه‌یلى وه‌ ته‌واوى ئاشكرا نیه‌و فریه‌جاریش گومان له‌لى كریه‌ید ئه‌را ئى په‌یوه‌ندى و جووره‌ ستراتیجیه‌ت تازه‌ وه‌ل هه‌رێم كوردستان و ته‌نانه‌ت سه‌ردان وه‌رپرسه‌یلیشى ئه‌را به‌غداو پیشنیاركردن دانیشتنیگ وه‌خاتر یه‌كلاكردنه‌وه‌ى كیشه‌ى ناونى هه‌ولێر و به‌غدا. دى نازانیم نه‌فت كورد و سیاسه‌ت تورك تا چه‌نیگ بووده‌ مایه‌ى چاره‌سه‌ركردن كیشه‌ى كویه‌ن و سه‌رخستن په‌یوه‌ندیه‌یل دولایه‌نه‌؟ چوینكه‌ مه‌سه‌له‌ى به‌رژه‌وه‌ندى شایه‌ت وه‌ختى بوود و خودانه‌خواسته‌ ئاینده‌ى رووشنكه‌ریگ نه‌یاشتوود، یه‌یش قسه‌ى تاریخه‌و توركه‌یلیش وه‌ دریژایى تاریخ چه‌و برینه‌سه‌ خاك كوردو به‌شیگ له‌ خاك كوردستان داگیر كردنه‌.

ئنجا سیاسه‌ت و ره‌فتار سه‌ركردایه‌تى كورد له‌ى قوناغه‌یل نازگه‌ ك هاته‌سه‌ تویش وڵاتیگ جوور عراق تا راده‌ى خاسیگ جى ده‌سخوه‌شى و په‌سه‌نكردنه‌ ئه‌را به‌سانن پیه‌ڵه‌یل په‌یوه‌ندى و به‌رژه‌وه‌ندى هاوبه‌ش و كه‌مه‌وكردن فشار له‌بان كورده‌یل وه‌ تایبه‌ت كورده‌یل باكوور، وه‌ل ئه‌وه‌یشا ئارامى و سه‌قامگیرى له‌ ناوچه‌یل كوردستان یه‌یش ده‌سكه‌فتیگ تره‌ ئه‌را مه‌ندنه‌وه‌ى ئه‌و كومپانیایه‌یل بیگانه‌ له‌ هه‌رێم، ك توركیایش به‌ش شیر له‌تى دیرید، وه‌لى ئایا ئامانج ئه‌نقه‌ره‌ له‌ى سه‌ردان و پیشوازى و هه‌ڵوژانن ئازادى و دیموكراسى تازه‌ ته‌نیا دروشمیگه‌ له‌وه‌ر مقه‌یه‌تیكردن له‌ به‌رژه‌وه‌ندى خوه‌ى له‌ هه‌رێم یا ئامانجى داناین پلانیگ مه‌ترسیدار و رخه‌وبه‌ره‌ ئه‌را ئاینده‌ى ملله‌تیگ جوور كورد و كزكردن وڵاتیگ جوور عراق؟

گشت ئه‌یانه‌ پرسیاره‌یلیگن له‌لاى تاك كورد له‌باوه‌ت په‌یوه‌ندى و ستراتیجه‌ت و ریككه‌فتن ناونى هه‌رێم و ئه‌نقه‌ره‌، وه‌لى له‌ هه‌مان وه‌خت ئیمه‌ى كورد له‌ حاڵ حازریش هه‌ڵویسته‌یل خاسیگیش له‌ توركیا دوینیم و له‌یوا ته‌ماشاى حزب ده‌سڵاتدار ئه‌و وڵاتیشه‌ كه‌یم ك وازبوین یا ئنفتاح خاسیگ گرته‌سه‌وه‌ر له‌وه‌ر خاتر یه‌كلاكردنه‌وه‌ى هه‌قه‌یل ئنسانى و بته‌وكردن ئابوورى و سه‌رخستن ئیراده‌ى دیموكراسى، ك هه‌ر وه‌و دیدیشه‌و ئومید سه‌ركه‌فتن نیازه‌یل پاك توركیا كه‌یم له‌وه‌ر ئه‌وه‌ك گشت كیشه‌یگ كووتایى وه‌پى باید له‌ناونى دو نه‌ته‌وه‌ى خاوه‌ن تاریخ.

جه‌ماڵ ئه‌ركه‌وازى