شلێر ئه‌را په‌شيمانه‌!؟

شفق نيوز

گوڵيگ جوان و ده‌سكرد خودايی له‌ناو باخچه‌ی گوڵه‌يل ك هه‌ميشه‌ كز و سه‌ره‌و خواره‌، له‌ كوردستان خوه‌مان ناسرياگه‌ وه‌گوڵه‌ "شلێر" و له‌ ناوچه‌يليگيش وه‌ "شلێره‌ی زاگرۆسی" و " هه‌ڵاڵه‌ برمه‌"ناسرياگه‌و ئی جووره‌ گوڵه‌ ره‌نگه‌يل جوراوجوور ديريد و باڵاكوڵ و قه‌ی باريكه‌ و فريه‌جاريش له‌ وه‌ر جوانی گوڵه‌يلی نريه‌يده‌ ناو گوڵدان له‌ ماڵه‌يل، وه‌لی وه‌ل ئه‌وه‌يشا وه‌پيشی ئويشن"گوڵه‌ په‌شيمان"، ئمجا با بزانيم ئى گوڵه‌ ئه‌را په‌شيمانه‌و هووكار په‌شيمانيه‌گه‌ی چه‌س‌؟

جوور ئه‌وه‌ك له‌ "گوڵنامه‌ی كوردی" ئاماژه‌ وه‌پی كرياگه‌ ئه‌وه‌ ده‌ركه‌فت ك گوڵه‌ په‌شيمان نزيكه‌ی ٤٠٠ جووره‌ گوڵ له‌لی ناسرياگه‌ وه‌ ره‌نگه‌يل جياجياو له‌ بريگ له‌ وڵاته‌يل تر وه‌ گوڵه‌ فه‌قير ناوداره‌، وه‌لی ئی گوڵه‌ وه‌سه‌رهات فريه‌يگ ديريد و يه‌كيگ له‌وانه‌يش ك له‌ وه‌ختيگ ك عيسای په‌يغه‌مبه‌ر له‌ دويا گه‌شت خوه‌ی وه‌ل مه‌ردمه‌گه‌يا ئه‌را ناو گولستانيگ چه‌وی كه‌فته‌ گوڵه‌يل و گشت گوڵه‌يليش سه‌ر ئه‌رای چه‌مانن، ته‌نيا گوڵه‌ شلێر نه‌ود ك وه‌ملبه‌رزی خوه‌ی مه‌ند و سه‌رنه‌چه‌مان و روی له‌ ئاسمان بوی، ئمجا عيسا ده‌س موباره‌كی خسته‌ بانی و وه‌گله‌ييگه‌و وته‌پی شلێره‌ ئه‌وه‌نه‌يش وه‌خوه‌ده‌و مه‌ناز، دی له‌وه‌ر ئه‌و قسه‌ گوڵه‌ شلێر له‌ خه‌جاڵه‌تی خوه‌ی په‌شيمانه‌و بوی و ئه‌سر له‌ناو تاج گوڵه‌يلی په‌نگه‌و خوارد وه‌بی ئه‌وه‌ك بڕشيه‌يده‌ بان زه‌وی و هه‌ر له‌و رووژه‌و تا ئيسه‌ ئه‌و ئه‌سره‌ له‌ناو ئه‌و گوڵه‌ جوور ئانگوو هه‌ر مينيد و ناڕشيه‌يده‌ زه‌وی و ئه‌گه‌ريش وه‌ ده‌سيش ئه‌و قه‌تره‌ی ئاوه‌ له‌قه‌ی گوڵه‌گه‌يش پاكه‌و بكه‌يد، دوينيد دويای كه‌ميگ تر چه‌ن قه‌تره‌يگ تر رشيه‌يده‌ شوونی.

وه‌لی وه‌ل ئه‌وه‌يشا ناو ئی گوڵه‌ شلێره‌ له‌ كوردستان له‌ گوڵه‌ نه‌رگس بترازيه‌يد هويچ گوليگ تر ئه‌وه‌نه‌ی ئه‌و ناودار نيه‌، ك ته‌نانه‌ت گوورانيچڕ و شاعره‌يل فريه‌يگيش وه‌ شعر و گوورانيه‌و ياد ئی گوڵ جوانه‌ كردنه‌.

جه‌مال ئه‌ركه‌وازی